1 Vat anuu me sa wa tarsa wa hiri wa tonno, wa ēn Yeso ahira Bilatus. 2 Wa hiri me inna banga ayari, unu gusa “Ta kem unun geme unu hara umu ruba manu, agi kati wa nya ikirfi ima nyanga ba, unu gusa agi memani Asere, Ugomo”. 3 Bilatus ma iki me “Ho mani Ugomo a Yahudawa?” Yeso makabirka me ma gu “Wa buka anime”. 4 Bilatus ma gun anu adandang aka tuma nan anuu gbardang, “Daki ma kem unun ugeme unu pilko ba. 5 Wa gaawe unu gusa “Ma bunkurko anuu unu bezizi umeme vat uyahuda, matuba ugalili nanu aye abame.” 6 Sa Bilatus ma kunna anime, ma iki nan unuu nuu Galili mani. 7 Sa ma rusa unun maran atari ti Hiridua tini, ma tuburko Yeso u hana ahira Hiridus u Jerusalem ati yee me. 8 Sa Hiridus ma ira Yeso, ma wu apuru arum, barki sa ma nyara u ira ume datti. Mamu kunna abanga ame, ma nyara ma iri imum ibiyau me sa ma wuza. 9 Hiridus ma iki Yeso timum gbardang, Yeso ma game kabirka me. 10 Unuu adandang aka tuma nan anuu nyerte wa hirri ummu ruba wa nya me ayari. 11 Hiridus nan ana nikara nini kono (Ma'Soja) wa zogizi me wa wuzi me nibassa. Wa sukki me udibi udandang wa kurzo me ahira Bilatus. 12 Barki Hiridus nan Bilatus wazin ruroni inna cece atiyee me (wazin inni erru atiyee ta dumo) 13 Bilatus ma titi anuu adandang aka tuma nan Agomo dandang nan nigura na nuu. 14 Ma gun we “Ya aye nime unu nuu ugeme kasi unuu sa mazin nuwuza anun wa wuzi imum izenzen, irani ma iko me ashin, daki ma kem me inna bur imumme sa ya booni anicee numeba. 15 Nan Hiridus sa ma kurzo me ahira aru ma ira me inna bur sa abari ahun me ba. 16 “Barki anime indi cobi me in ceki me”. 17 Bilatus maka nya a Yahudawa unun inde anyimo ande sa wa rani akura ani rere uganiya idin keterewa. 18 Wa meki tihunu vat uwe unu gusa “Ceki unuu geme u nyan duru Barabas”. 19 Barabas unuu me sa aka korso me udenge uni rere sa ma guri ahira ahun unuu. 20 Bilatus ma kuri ma buki we tize uguna ma ceki Yeso. 21 Wa wuu tihunu wa gu “Gankirka me, Gankirka me”. 22 Ma gun we uku taru, “Barki nyani, a ya bur ani unuu geme ma wuza shi? Daki makemme unu pilko sa wa bari ahume ba. Barki anime imma Cobo me indi ceki me”. 23 Wa game inti myiran inna za, unu nyara a nyawe me wa gankirka me. Tihunu tuweme tihunguko iruba i Bilatus. 24 Abinime Bilatus ma nya we me. 25 Ma ceki Barnabas sa maa guri ahira ahun unuu. Ma nyawe Yeso sa wa nyara. 26 Sa wa haka nan me, wa gurna nan Siman unanuu Sayirin, ma zeze usuro ani pin, wa canni me ukunti ugankirka ma tarsi Yeso. 27 Unu hem unu gura nanuu nan nanee intisso nan tihunu, unu tarsa ume. 28 Yeso ma gamirka ma gu “Acaa anu Jerusalem, kati ishinime ba, sooni acee ashi nan na hana ashi. 29 Irani barki, tiyee tieze sa wadi gu, 'Ani ruba irum wani anuu zattu yozo, nan tipuru sa daki ta yozo nan na hene sa daki a hamza ba. 30 Abini me wadi tubi ugusan na pana 'Rizo aharu', nan napoo, 'Impon duru', 31 Ingi awuza matiti mazu aname, nyanini idi kem mage sa mawaa?” 32 Ukassu anuu, akari waree wazi nigome nan me tantu kahuname. 33 Sa wa aye ahirame sa atisa “Ukunkuwa”, Wa gankirka me nan akari waree unuu inde atari tinanre unuu inde atari tinangure. 34 Yeso ma gu “Acoo, vette ucara uwemen, barki sa wa taawe imume sa wazin unuwuza ba”. Wa acece tirunga tumeme in bizawazawa. 35 Anuu wa turi unu hirame, agomo unu wuza ume nibassa, unu gusa “Ma bursa aye ca ma buri nice nume, ingi memani Ugomo Asere nan Asere sa a Zauka”. 36 Anani kara nini kono (Ma Soja) wa meki uhaza upuru ume unu wuza ume nibassa, unu ninza ume mei magbarara. 37 Unu gusa, “Ingi homan Ugomo wa Yahudawa, bura nicee nuwe”. 38 U'ira warani ame “Ugomo wa Yahudawa mazigeneme”. 39 Uye anyimo akarime mazogeme sa agankirka we nan me unu gusa “Inzo homani Ugomo Asere? Bura nicee nuwe nan haru”. 40 Unuu kureme ma tarika me, magu “Uda kunna we biyau ba Asere ba, tunsa imun inde ini ya kem shi? 41 Haru tiraa abame rep, barki ucara urun. Unuu ugeme daki ma cara imum ninba”. 42 Ma gu, “Yeso, ringinmi anyimo ati Gomo tuweme”. 43 Yeso ma gunme “Kadundura ma gunan huu, kani udizi nan mi akura Asere.” 44 Inna tii uwui (Azumu kirau in anaree) ahira abee Uhana uniyee. 45 Masaa mu wui ma inpino. Ugebtu udenge unigurame ujanika atii. 46 Inna soo, inni nyiran nidandang Yeso ma gu, “Acoo, ma nya Bibe bum atari tuwe”. Sa ma buka anime ma wii. 47 Sa una nikara nini kono (Usoja U Romawa) ma ira imumme sa ya cukuno anime ma gu “Kadundura unuu geme ma zome ma dini ba”. 48 Vat nigura nanbu sa wa aye bati iri imumme sa awuza, wa kuri unu tira igiri. 49 Vat ande sa wa rusa me, nan anee me sa wa tarsa me usuro u Galili, wa tonno pit, unu hira utimumme. 50 Russani, uru nun maa rani unaniza Isubu, de sa maa rani anyimo anuu hirra. Unuu uririn mani ini ruba ubenki. 51 Unuu ugeme daki ma hem ini mumme sa anuu hirra wa wuza ba nan bi wuzawuza buweme ba. Mee unanuu Yahuda mani ani pin nu Arimatiya mazin nunyara uti Gomo ta Asere. 52 Unuu me makem Bilatus, ma iki ikizi Yeso. 53 Ma tuzo ini, ma impi ini unu malti uririn, ma ka natta a ire ican upuru uni poo, sa daki amuwuna ire ikizin ba. 54 Uwui ubibarabara bini nan Asabar a ezi. 55 Anee me sa wa tarsi Yeso usuro U Galili, wa tarsi waka ira ican me nan nuvati me. 56 Wa kuri, waka nyara uturari nan mani munya urunta. Wa venke unu wui wa sabar kasi udungara U Musa.