16
Yesu Dinya Big Jír Ashinn Wùn Sukà Ri Sa Fig Bu-à Nsàn Bàna
1 Yesu dinya mpìrká ri bàg ku n rag, “Mpìr bài zyun rì shi sig áni, ku shi sig ma wùn sukà. Mpìrká yag gib mìr wùn sukàwá mà byarwá ni, n rag wàníng ri ji bàiwá.
2 Ku bar bi wùn sukàwá n bib wàníng rag, ‘Ma buká mì ri fig áshinnwú ni níng í kai rà? A wànn dinya mì buká à sa sig, jir kai bàna wá shi fig rag wùn sukàmí bàna.’
3 Wùn sukà-à kyab á pìkyinnwá ni n rag, ‘Asàin lumí kan rìghing mì á swàm. Tàma-à níng má sa rag í kai ra? N bàna ma gbam-à má nàm bu, mì ri sa zunái wà má vig mpìrká bu.
4 Tàma-à níng ǹ yì rag hing bu-à má sa, jirà kó kwa kan hing mì á swàm, má dìg mpìrká má zìm mì ń yag á lubá ni.’
5 Ku bar kwonn mpìrká àsàin luwá ri bàg big tonn bài. Ku bib jag mpìr zyun, n rag, ‘Asàin lumí ri bàg wù píná rà?’
6 Wàníng dang rag, ‘Asàin luwú ri bàg mì byìr garwa dìb-swana.’ A byar-à hi ku rag a wàníng zìg tarkada ma a wàníng ba sìnn kà dìpyànà agban dwib.
7 I byar-à ku bib jakàng mpìr zyun n rag, ‘Asàin lumí ri bàg wù píná rà?’ Wàníng dang rag, ‘Ku ri bàg mì bà jímyànn dìb-swana.’ A byar-à hi ku dinya wàníng n rag a wàníng ba sìnn kà bà dìb-yina.
8 Asàin lu-à swam yan wùn sukà ri lir ji ku níng jir yar-à wàníng shi sig ma kàhi. Mpìrká ri zìm buká á jànn-à níng ni yar kab sig mpìrká ri bàg Shìdun.”
9 Yesu dinya big n rag, “Mì ri dinya ning, aning sa bu-à sìsàn ma bàiká ning shi sig ma kàhi á dunyaru, jirà àyúnn-à na bàna ma bài, Shìdun má pànn ning vù pyànà mà luwá ni mà wai.
10 Mpìr-à ma pànn sàn hing bu títi, kwá pànn yì bu ùwài. Mpìr-à ma pànn sar fig bu títi ma kyinn ńzyun bàna, kwá pànn samyib fig wà ùwài bàna.
11 Wà na pànn yì sar fig bài á dunyaru bàna, í ni má ya ning bu ǹsàn nímá mà wai rà?
12 Wà na pànn yì sar fig bu mpìr bàna, í ni má ya ning bu shinn dìrná í ni rà?
13 “Mpìr ńzyun má wib sar fig àsàin lu pyànà bàna, kó kwá zìm zyun, má ngàng zyun. Kwá wib jir zyun, má ngàng jir zyun. Wà na zìm kab síg bài, ná zìm fig Shìdun bàna.”
Yesu Kan Dim Farisawaká
(Mat 11:12-13; 5:31-32; Mar 10:11-12)
14 Farisawaká fig jír-à Yesu dang sig níng, big màm jwann ku, jir kai bàna big ri kyab jir bài á pìkyinnbá ni.
15 Ku dang rag, “Ning í mpìrká ri gbar dù shinn á pyànn mpìrká ni, ama Shìdun yì rìghing bu-à á pìkyinn ná ni. Bu-à mpìrká ri myàng fòr hing bu á pyànnbá ni níng, ama á pyànn Shìdun fòr fig bu bàna.
16 “Sai-à Yohanna rì bi níng, big rìi tàg mpìrká jir doka Musa, ma bu-à yann aswamká bu Shìdun ba sig. Tàma-à níng big ri tàg rag jír á shinn barà Shìdun ri na kùrwá. Kó ni bidìm pár ri zìm aku kà á lu Shìdun.
17 Má fonn káb nì, wà waisháu ma jànn-à á jìnn ni abig pìnn rìg ma wà yìr jir Shìdun ńzyun má jànn.
Yesu Dang Jír á Shinn Uwà Kan Tafinn
18 “Mpìr-à ma kan tafinn wàwá ma zìg zyun, ku ri sa àyái. Mpìr-à ma zìg uwà big kan tafinn sig níng, ku má, ku ri sa àyái tìnn.
Mpìr Bài Zyun Ma Mpìr Ashi Zyun
19 “Mpìr bài zyun rì shi sig áni, ku rì wìr jà ǹsàn, ku ri fig àjwárwá kó ákaun.
20 Mpìr ashi zyun shi sig áni. Big ri bar ku Liyazaru. Dìrwá bidìm pár íri yun. Ku ri shi kyann á nu nkyun mpìr bài-à níng ni.
21 Ku ri fig àjwár aku ji mònn bujuká mpìr bài-à níng ri ji wìr wann á jìnn ni. Báiká bi mi ri tann ji yunwá.
22 Nonn fig bàna sái Liyazaru bi n wu rìg. Yann aswamká bu Shìdun mà wai bi zìg yag rìg Liyazaru mà byar Ibrahim. Mpìr bài-à níng wu rìg tìnn, big bi kab jì rìg ku.
23 Ku shi sig mà lu pyìr-à ni mi ri wa shwìn. Ku gbar dù nann zu shinnwá n myàng Ibrahim sar sig pyunn nunonn, ma Liyazaru á byarwá ni.
24 Sái ku bar nài abor n rag, ‘Tamí Ibrahim, á myàng ashimí, ma á swam bi Liyazaru aku du kà pwai vùwá á zàpìr, ma aku sa tag shinn anammí, jir kai bàna mì ri wa shwìn á pyìr-à níng ni.’
25 Ama Ibrahim dang rag, ‘Wùnmí, á kyab. Sai-à wù rì shi sig ma yonki á dunyaru, wù rìi fig àjwár, Liyazaru rìi wa shwìn. Ama tàma-à níng ku ri fig rag àjwárwá, wù bó wù ri wa shwìn.
26 Iri wàníng bàna má, shar ǹzwàun nímá shi sig áyauyí ni, pyù-à yá yag mà byarná ni bàna. Ning má ná bi sar fig á byaryí ni bàna tìnn.’
27 I byar-à àsàin bài-à níng í dang-à rag, ‘Tamí, mì ri vig wù á swam yag Liyazaru mà lu tamí ni á dunyaru.
28 N shi sig ma wunzàmí big àkunn swana. Liyazaru aku yag dinya big, kada abig bàg gbìb-à ǹ rì bàg sig níng bàna, jir kai bàna tàma-à níng mì ri wa shwìn á byar-à ǹ shi sig níng.’
29 I byar-à Ibrahim dang rag, ‘Wunzàwú big shi sig ma tarkada wà Musa ma mpìrká rìi dang kyann jir Shìdun ba sig. Abig jangga ma abig fig jír káníng.’
30 Mpìr bài-à níng í dang kàng-à rag, ‘A à, Tamí Ibrahim, mpìr-à ma wu rìghing, ma kàng yag síg nì, bá fig jírwá, bá vim bìr á bu pyìrbá ni.’
31 Ibrahim dang rag, ‘To, wà ba fig fig jir Musa ma jir mpìrká ri dang kyann jir Shìdun bàna, kó mpìr zyun-à wu rìghing má ma kàng yag, bá fig fig jírwá bàna tìnn.’ ”