3
Biô gêdêŋ gôlôac Sardesŋa
1 “Ma oto biŋ tonec êndêŋ gôlôac dabuŋ Sardesŋa nêŋ aŋela.
“Ŋac taŋ kêkôc Anôtônê Ŋalau 7 ma utitalata 7 naŋ, kêsôm biŋ tonec gebe Aê kajala nêm koleŋ ma waem gêc gebe gômoa matam jali, mago kôtu matê.
2 Matam êlêc ma ôpuc gêŋ ŋagêdô, taŋ gebe êmac êndugeŋ naŋ tôŋ, gebe aê galic aôm gôjac dabiŋ nêm koleŋ ŋapep kêtôm ênac Anôtô mataanô ŋajamŋa atom.
3 Amboac tonaŋ taêm ênam biŋ, taŋ gôŋô to kôkôc su naŋ, ma ômansaŋ e ônam taôm ôkwi. Embe matam êlac atom, oc jawac amboac geŋgeŋtêna, ma aôm oc ônam kauc noc jandêŋ aôm jawacŋa.
4 Mago aômnêm lau luagêcgeŋ tec sêŋgôŋ Sardes, taŋ sêgôm nêŋ ŋakwê ŋatêmui kêsa atom. Lau tonaŋ tec galic êsêac têtôm gebe oc sêsêlêŋ toŋakwê kwalam sêwiŋ aê.
5 Teŋ embe êku ŋacjo tulu, oc jakêŋ eŋ êsô ŋakwê kwalam sa ma janseŋ ênê ŋaê su aŋga buku mateŋ jaliŋa atom ma jasôm ênê ŋaê lasê êndêŋ Tamoc to nê aŋela.
6 Ŋac taŋ nê taŋasuŋ gêc naŋ, êŋô biŋ, tec Ŋalau kêsôm gêdêŋ gôlôac dabuŋ nec.
Biŋ gedeŋ gôlôac Piladelpiaŋa
7 “Ma oto biŋ tonec êndêŋ gôlôac dabuŋ Piladelpiaŋa nêŋ aŋela.
“Ŋac dabuŋ to ŋac biŋŋanôŋa,
taŋ kêkôc Dawidnê ki katamŋa naŋ,
embe êlai su, oc teŋ êlai auc êtôm atom,
ma embe êlai auc, oc teŋ êlai su êtôm atom,
ŋac tau tonaŋ kêsôm biŋ tonec gebe
8 Aê kaJala nêm koleŋ. Ôlic acgom, aê galêc katam teŋ su gêdêŋ aôm, tec kêkô, ma teŋ kêtôm gebe ênsaŋ aucŋa atomanô. Aê kajala gebe nêm ŋaclai ŋagec gêc, mago kômasaŋ ŋoc biŋ to gôsa aêŋoc ŋaê auc atom.
9 Ôlic acgom, oc jakêŋ êsêac aŋga Sadaŋŋê lôm, taŋ sê tauŋ gebe êsêac Juda, mago êsêac J uda atom, sêsau tauŋ naŋ, sêndêŋ aôm sêwac sêpôŋ aeŋduc sênêc aôm amkaiŋŋa, ec sêjala gebe aê têtac gêwiŋ aôm.
10 Aê jaŋgôm biŋ tonaŋ gebe aôm kômasaŋ ŋoc biŋ to gôc gêŋwapac totêmtac kêpa sugeŋ. Amboac tonaŋ aê oc jajop aôm êndêŋ noc Iêtômŋa, taŋ oc mêŋêsa aŋga nom ŋagamêŋ samob gebe ênsaê lau samob, taŋ sêŋgôŋ nom naŋ, gebe lêtôm tau êtap aôm sa êwiŋ atom.
11 Aê oc jawac sebeŋ. Gêŋ taŋ kôkôc kêtu nêm gêŋ su naŋ, ômêŋgôm ŋajaŋageŋ gebe ŋac teŋ êjaŋgo nêm sunsuŋ su atom.
12 Teŋ embe êku ŋacjo tulu, oc jakêŋ eŋ êtu alê êkô ŋoc Anôtônê lôm dabuŋ. Eŋ oc êwi lôm dabuŋ siŋ êsa êna atomanô. Ma aê jato ŋoc Anôtônê ŋaê to ŋoc Anôtônê malac Jerusalem wakuc ŋaê ênsac eŋ. Ŋoc Anôtô oc êkêŋ malac tau êsêp aŋga undambê êmêŋ. Ma jato tauc ŋoc ŋaê wakuc ênsac eŋ êwiŋ.
13 Ŋac taŋ nê taŋasuŋ gêc naŋ, êŋô biŋ, tec Ŋalau kêsôm gêdêŋ gôlôac dabuŋ nec.
Biŋ gêdêŋ gôlôac Laodikeaŋa
14 “Ma oto biŋ tonec êndêŋ gôlôac dabuŋ Laodikeaŋa nêŋ aŋela.
“Biŋŋanô ŋatau tau, taŋ gêwa biŋ sa ŋaŋêŋ to biŋŋanôgeŋ, gêŋ taŋ Anôtô kêkêŋ naŋ, samob ŋamôkê naŋ, kêsôm biŋ tonec gebe
15 Aê kajala nêm koleŋ ma kajala gebe aôm ŋaluc atom me ŋandaŋ atom. Ojae, jalic aôm ŋaluc me ŋandaŋ acgommaŋ.
16 Mago aôm ŋaluc atom ma ŋandaŋ atom, aôm ŋakola-kola, amboac tonaŋ aê gabe jakasôp aôm siŋ aŋga aocsuŋ.
17 Aôm kôsôm gebe Aê ŋac toawa ma ŋoc waba taêsam, tec kapô lêna gêŋ teŋ atom. Mago aôm gôjam kauc taôm. Aôm gômoa jageo ŋanô ma lau embe sêlic, oc taêŋ walô aôm. Aôm ŋac ŋalêlôm sawa ma matampec to gômoa ôlim ŋaômageŋ.
18 Amboac tonaŋ aê gabe jawa lêŋ teŋ sa êndêŋ aôm acgom. Ônam ôli gold, taŋ sêpac ŋa ja e ŋawasi kêsa naŋ, êndêŋ aê gebe ôtu ŋac tolêlôm. Onam ôli ŋakwê kwalam gebe ênsaŋ aôm gebe majam êsa êtu ôlim ŋaômaŋa atom, ma ônam ôli ŋalêsi gebe ôniŋ oso matamanô e ôlic gamêŋ ŋaŋêŋ êsa.
19 Aê embe têtac êwiŋ lau teŋ, oc jamêtôc to jakôniŋ êsêac. Amboac tonaŋ ôpôŋ taôm topalêgeŋ e ônam taôm ôkwi.
20 Alic acgom, aê tec kakô katamdêmôê ma kamadi kakô. Teŋ embe êŋô aê aoc ma êlêc katam su, oc jasô jandêŋ eŋ jana ma janiŋ gêŋ jawiŋ eŋ ma eŋ êniŋ gêŋ êwiŋ aê.
21 Teŋ embe êku ŋacjo tulu, oc jakêŋ eŋ êŋgôŋ ŋoc lêpôŋ êwiŋ aê, amboac aê kaku ŋacjo tulu ma gaŋgôŋ Tamocnê lêpôŋ gawiŋ eŋ.
22 Ŋac taŋ nê taŋasuŋ gêc naŋ, êŋô biŋ, tec Ŋalau kêsôm gêdêŋ gôlôac dabuŋ nec.”