16
Anôtônê têtac ŋandaŋ ŋalaclu 7
1 Ma gaŋô awa kapôêŋ kêsa aŋga lôm dabuŋ ma kêsôm gêdêŋ aŋela 7 tonaŋ gebe “Ana akêc Anôtônê têtac ŋandaŋ ŋalaclu 7 êsêp nom êna.”
2 Go aŋela ŋamata jakêkêc nê laclu kêsêp nom gêja. Ma lau, taŋ sêkôc bôcnê ŋatalô sa to teteŋ mec gêdêŋ ênê ŋakatu naŋ, têtap gwatêlê sec to ŋandaŋ sa.
3 Go aŋela kêtu luagêcŋa kêkêc nê laclu kêsêp gwêc gêja e kêtu dec. Ma dec tau amboac ŋacmatê ŋadec. Ma gêŋ mateŋ jali samob, taŋ sêmoa gwêc naŋ, sêmac endu.
4 Go aŋela kêtu têlêacŋa kêkêc nê laclu kêsêp bu to bumata samob gêja e kêtu dec.
5 Ma aê gaŋô bu tau ŋaaŋela kêsôm gebe
“O ŋac dabuŋ tau, taŋ galoc gômoa to andaŋgeŋ gômoa naŋ,
aôm ŋac gêdêŋ, tec kômêtôc biŋ ŋalêŋ amboac tonaŋ.
6 Êsêac sêkêc Anôtônê lau to propete nêŋ dec siŋ,
ma galoc kôkêŋ dec gêdêŋ êsêac sênôm.
Ŋagêjô tonaŋ jakêtôm êsêacnêŋ keso solop.”
7 Ma gaŋô awa kêsa aŋga altar gebe
“Biŋŋanô, Apômtau Anôtô, ŋaniniŋ Ŋatau,
aômnêm mêtôc tau biŋŋanô to jagêdêŋgoc.”
8 Go aŋela kêtu aclêŋa kêkêc nê laclu kêsêp oc e kêkêŋ oc ŋaja kapôêŋ kêpac ŋamalac.
9 Ŋandaŋ kapôêŋ tau kêpac ŋamalac, e sêsôm biŋ alôb-alôb kêpi Anôtônê ŋaê, gebe ênê ŋaclai kêtu gêŋwapac tonaŋ ŋamôkê, tec sêjam tauŋ ôkwi ma tetoc eŋ sa atom.
10 Go aŋela kêtu lemeŋ teŋŋa kêkêc nê laclu kêsêp bôc tau nê lêpôŋ. Ma bôcnê gamêŋ samob ŋakesec kêsa. Ma ŋandaŋ gêgôm ŋamalac e sêŋac imbeleŋ.
11 Ma sêsôm biŋ alôb-alôb kêpi Anôtô undambêŋa kêtu nêŋ ŋandaŋ to gwatêlêŋa. Mago sêjam tauŋ ôkwi sêwi nêŋ lêŋ laŋgwa siŋ atom.
12 Go aŋela kêtu 6ŋa kêkêc nê laclu kêsêp bu kapôêŋ Euprat e bu tau kêpa. Gêgôm tonaŋ gebe êmansaŋ kiŋ aŋga oc ŋamŋa nêŋ intêna.
13 Ma aê galic ŋalau ŋatêmui têlêac amboac ôpoac sêsa aŋga lêŋuckêm agêc bôc ma propete dansaŋ aweŋsuŋ sêmêŋ.
14 Êsêac ŋalau sec, taŋ sêgôm gêŋtalô naŋ, nêŋ ŋalau. Êsêac dêdêŋ kiŋ, taŋ sêŋgôŋ têtôm nom ŋagamêŋ samobgeŋ naŋ sêja, gebe sejoŋ êsêac sa ma sênac siŋ êndêŋ ŋaniniŋ Ŋatau Anôtô nê bêc kapôêŋ.
15 “Alic acgom, aê oc jawac amboac ŋacgeŋgeŋ. Aê aoc êôc êsêac, taŋ sêjam jali ma sêsô nêŋ ŋakwê baŋgeŋ naŋ, gebe sêsêlêŋ toôliŋ ŋaôma e lau sêlic êsêac ôliŋ ŋagêŋ majeŋŋa atom.”
16 Go ŋalau sec sêkac kiŋ sa sêpi tageŋ aŋga gamêŋ, naŋ sêsam ŋa Ebolai aweŋ gebe Harmagedon.
17 Go aŋela kêtu 7ŋa kêkêc nê laclu kêsêp ŋalaulau. Ma awa kapôêŋ kêsa aŋga lêpôŋ kiŋŋa, taŋ kêkô lôm dabuŋ naŋ, gebe “Gêjac dabiŋ sugac.”
18 Ma ôsic kêkac to gamêŋ ŋakicsêa kêsa ma wapap gêjac to ôjô gêjam secanô. Ôjô secanô amboac tonaŋ gêjam gêdêŋ têm ŋamalac sêŋgôŋ nomŋa teŋ atomanô.
19 Malacsêga tau kêkac tau kêkôc gêja ŋapopoc têlêac, ma lau samuc nêŋ malac sêku sa. Ma Anôtô taê gêjam malac Babel kapôêŋ, tec kêkêŋ wain laclu teŋ gêdêŋ eŋ gênôm. Wain tau ênê têtac ŋandaŋ kapôêŋ.
20 Go nuc samob sêc su ma lôc samob maleŋmê.
21 Ma kompoc ŋamatu kapôêŋ-kapôêŋ, teŋ ŋawapac kêtôm padi talu teŋ gêjac aŋga undambê kêsêp mêŋkêpi ŋamalac e ŋamalac sêsôm biŋ alôb-alôb kêpi Anôtô kêtu kompoc tau ŋagêŋwapacŋa, gebe gêŋwapac tonaŋ kapôêŋanô sec.