36
Lau secwaga nêŋ biŋ alôb-alôb to lau gêdêŋ
1 Ŋac alôb-alôb gêŋô sec ŋaawa aŋga tau nê ŋalêlôm.
Eŋ gedec Anôtô, tec ketoc eŋ sa atom.
2 Eŋ ketoc tau sa e taê gêjam kêtu tôŋ gebe
Anôtô oc êkip sa to atiŋ eŋ su atom.
3 Biŋ samob, taŋ eŋ kêsôm naŋ, biŋ alôb-alôb to biŋ dansaŋ.
Eŋ gêwi nê gêŋ, taŋ andaŋgeŋ gêgôm tokauc ma ŋapep naŋ, siŋ su.
4 Eŋ kêsa tau sic jagêc nê mê naŋ taê gêjam biŋ alôb-alôb.
Eŋ kêsa sec ŋalêŋ ma laŋô gelo biŋ keso tau atom.
Anôtônê moasiŋ
5 O Apômtau, nêm têmtac gêwiŋ teŋgeŋŋa kapi e jagêdêŋ undambê
ma nêm biŋ ŋaŋêŋ kapi e jakêpuc kêpi tao.
6 Aômnêm biŋgêdêŋ kêtôm Anôtônê lôc sêkô ŋajaŋa. Aômnêm mêtôc kêtôm gwêc ŋagêdimbob.
O Apômtau, aôm gôjam ŋamalac to bôc sa.
7 O Anôtô, nêm têmtac gêwiŋ teŋgeŋŋa ŋajamanôgoc,
tec ŋamalac latuŋi sêlamu aôm magêm ŋaajuŋlabu.
8 Aômnêm andu ŋamoasiŋ taêsam gêjac êsêac mateŋ su.
Aôm kôkêŋ êsêac sênôm aômnêm gêŋlêwê ŋajam ŋabu,
9 gebe aôm kôtu daŋgôŋ mateŋ jali ŋamôkê.
Aômnêm ŋawê kêpô aêac, tec tauŋ ajala ŋawê amboac tonaŋ.
10 Nêm têmtac gêwiŋ teŋgeŋŋa êmoasiŋ êsêac, taŋ sêjala aôm naŋ,
to êmoasiŋ êsêac, taŋ sêsa nêŋ lêŋ tolaŋôŋnêm sawageŋ naŋ.
11 Ôkêŋ lau teŋbeleŋ aŋgeŋ eŋkaiŋ êka aê tôŋ atom.
Ma êsêac, taŋ sêkac tauŋ su aŋga Anôtônê naŋ, sensoc aê atom.
12 Secwaga sebeŋ jasêc
oc sêndi naeo.