8
Tanam Anôtônê lau sa
1 O lasitêwaac, aêac anac Anôtônê moasiŋ, taŋ kêkêŋ gêdêŋ gôlôac dabuŋ Makedoniaŋa naŋ, ŋamiŋ êndêŋ amac aŋô acgom.
2 Gêŋwapac kêkôniŋ êsêac, mago sêpuc tauŋ tôŋ ma sêmoa totêntac ŋajam samucgeŋ. Êsêac lau ŋalêlôm sawaanô, mago sêkêŋ da totêntac wapômgeŋ sêjac ŋawae.
3 Aê galic, tec jawa sa endeŋ amac gebe tauŋ nêŋ ŋalêlôm kêkac êsêac tec sêkêŋ da kêtôm gêŋ, taŋ gêc êsêacŋa ma sêkêŋ kêlêlêc su.
4 Êsêac teteŋ aêac ŋapaŋ gebe alôc ma sêwê kaiŋ sakiŋ sênam Anôtônê lau saŋa sêwiŋ.
5 Êsêac sêkêŋ da kêtôm aêac taêŋ kêka necgeŋ atom, êsêac sêkêŋ tauŋ samucgeŋ dêdêŋ Apômtau gêmuŋ, ma Anôtô kêpuc êsêac tôŋ, go sêkêŋ tauŋ gêdêŋ aêac amboac tonaŋgeŋ.
6 Tec aêac asakiŋ Titi, taŋ gêmuŋgeŋ gêjac m moasiŋ tonaŋ ŋakoleŋ naŋ, gebe ênac dabiŋ kôm tau aŋga amacnêm.
7 Amac atu lau tolêlôm gêŋ samob tonec ŋaiŋa, akêŋ gawiŋ, asôm mêtê, ajala biŋ, ajam kôm toôlim palêgeŋ ma têmtac gêwiŋ aêac, tec galoc atu lau tolêlôm amoasiŋ Anôtônê lauŋa êwiŋmaŋ.
8 Aê gabe jakac amac atom. Lau ŋagêdô sêgôm toôliŋ palêgeŋ, tec gabe jansaê amac gebe oc têmtac gêwiŋ ŋanô amboac tonaŋ me masi.
9 Amac ajala aêacnêŋ Apômtau Jesu Kilisi nê moasiŋgac. Eŋ ŋac tolêlôm, mago kêtu ŋac ŋalêlôm sawa kêtu amacŋa, gebe ênê ŋalêlôm sawa tonaŋ êkêŋ amac atu lau tolêlôm.
10 Aê jawa ŋoc taêc gêjam sa êpi biŋ tau acgom. Biŋ tonec oc êmoasiŋ amac. Gêdêŋ jala laŋgwa amac ajac m kôm tau, mago ajam ŋaômageŋ atom, têmtac gêwiŋ ŋanôgeŋ tec ajam.
11 Amboac tonaŋ galoc anac dabiŋ kôm tau ma aŋgôm biŋ, taŋ nêm ŋalêlôm êkac amacŋa naŋ, ŋanô êsa ŋa gêŋ, taŋ gêc amacŋa naŋ.
12 Embe nêm ŋalêlôm êkac amac ma akêŋ êtôm gêŋ, taŋ gêc amacŋa, go Anôtô êlic ŋajam. Akêŋ geŋ, taŋ taôm apô lêna amoa naŋ atom.
13 Aê taêc gêjam biŋ tonec gebe lau ŋagêdô sêmoa ŋajam ma sêlêwaŋ tauŋgeŋ ma amac aôc gêŋwapac nec atom. Amac samob atôm taômgeŋ.
14 Galoc tonec amacnêm gêŋ taêsam gêc, tec anam êsêacnêŋ sêpô Iênaŋa sa. Ma êsêacnêŋ gêŋ ŋagêdô embe ênêc, go sênam amacnêm apô lênaŋa sa amboac tonaŋ ma amoa atôm taômgeŋ.
15 Êtôm biŋ, taŋ teto gêc gebe
“Ŋac taŋ kejoŋ mana taêsam naŋ,
nê mana kêlêlêc su atom.
Ma ŋac, taŋ kejoŋ luagêc naŋ,
kêpô lêna atom.”
Titi to nê launêŋ biŋ
16 Aê gajam daŋge gêdêŋ Anôtô gebe kêkac Titinê ŋalêlôm e ôli palê kêsa kêtu amacŋa ma gêgôm kêtôm aê gagôm.
17 Aêac alêŋ biŋ ŋac tau tec kêkêŋ taŋa ma tau ôli palê kôm tonaŋŋa e nê ŋalêlôm kêkac eŋ ma gêdêŋ amac gêwac.
18 Aêac asakiŋ lasiŋi teŋ, taŋ gôlôac dabuŋ samob sêŋô eŋ gêjam mêtê ŋajam ŋawae naŋ, tec gêwiŋ eŋ gêwac.
19 Mago kêtu tonaŋŋageŋ atom, gôlôac dabuŋ samob sêjaliŋ eŋ sa gebe êsêlêŋ to ênam sakiŋ êwiŋ aêac êtu moasiŋ tonaŋŋa, gebe Apômtaunê wae êsa to êwaka aêacma têntac gêwiŋ kôm tonecŋa sa.
20 Aêac agôm tonaŋ gebe lau teŋ sêŋgoliŋ biŋ êpi aêac êtu moasiŋ kapôêŋ, tec aêac akôc necŋa atom.
21 Aêac taêŋ gêjam gebe aŋgôm ma gêŋ ŋapep sawa êtu Apômtau taugeŋ êlicŋa atom, aŋgôm êtu ŋamalac sêlicŋa amboac tonaŋgeŋ.
22 Ma aêac asakiŋ lasiŋi teŋ gêwiŋ. Aêac asaê eŋ kêtu dim taêsam kêtu kôm ŋagêdôŋa ma alic eŋ gêgôm gêŋ toôli palêgeŋ. Eŋ taê kêpa amac su, tec ôli palê kêsa amacŋa.
23 Titi tau tec jawa eŋ sa gebe ŋoc ŋac eŋ, naŋ gêjam kôm kêpi amac gêwiŋ aê. Ma aêac lasiŋiagêc têtu gôlôac dabuŋ nêŋ aposolo sêwaka Kilisinê wae saŋa.
24 Atôc nêm têmtac gêwiŋ êndêŋ êsêac ma awaka aêacma biŋ lanemŋa, taŋ asôm kêpi amac naŋ sa, gôlôac samob sêjala gebe biŋŋanô.