4
N-yemobu nwoke ono
1 Iphe, ị dụkwanu l'ọo ùbvù;
gụbe onye dụ mu l'obu!
Iphe, ị dụkpokwana l'ọo ùbvù!
Ẹnya ngu ono,
i phuchiteru ẹkwa ono
dụepho gẹ kẹ
ndo-nwẹnu
Ẹgbushi ngu tụko ejigbaa
g'ẹka eghu dzeberu shi l'eli
úbvú Giladu awụ-zeta.
2 Eze ngu achaẹpho
pemu pemu g'igwe atụru,
e bushigbaaru ẹji k'ọ̀phúú;
bya awụa ya ẹhu;
ẹphe tụko shi l'ẹka ono
awụfuta.
G'ẹphe ha tụko chịgbaaru
ụnwu ẹbo ẹbo;
ọphu ọ dụdu mẹ nanụ,
gba ẹka nwa.
3 Ụgbonu ngu ẹphenebo tụko
nwua kẹ pfụu g'oghu
uswe.
Ọnu ngu l'onwiya tụko
ama ntụmatu!
Agbagba nchị ngu,
i phuchiteru ẹkwa
yeru ụdara,
e buwaharu ẹbo.
4 Olu ngu mịtaru ogologo
g'ụlo-eli, Dévidi kpụru,
bụ ẹka eedobeje ngwọgu.
Ọo l'igbulọ iya bẹ e kokaaru
iphe,
eegudeje ezeru ndzụ l'ọgu,
dụ ụnu labọ l'ụkporo iri.
Ndu ojọgu egudeje iya
ezeru ndzụ l'ọgu.
5 Ẹra ngu ẹphenebo dụ
g'ụnwu umoro labọ.
Mbụ g'ụnwu umoro,
a nwụru ẹbo,
bụepho ẹka ojimbvu dụ
bẹ ẹphe anọduje
akpa nri.
6 Mu e-je anọdu l'eli úbvú,
a dzarụ oshi mẹru;
mẹkwapho l'eli-òbvù,
a dzarụ isẹnsu;
jeye l'ụzenyashi;
teke onyonyo-anwụ
adụedu.
7 Gụbe onye dụ mu l'obu;
ị bụkwa nwọmarima;
mbụ l'o to nwedu ẹka
ntụcha dụ ngu l'ẹhu
mẹ nanụ.
8 Gụbe nwanyị,
mu lụru k'ọ̀phúú;
shi l'úbvú úbvú Lébanọnu
tsoru mu!
Jiko shinu l'úbvú úbvú
Lébanọnu tsoru mu
g'anyi je!
Ngwa; gbẹnu l'eli úbvú
Amana nyizeta!
Shirọ l'eli úbvú Seniru,
bụ iya bụ
mkpọkponu úbvú
Hamọnu lụfuta;
mbụ ẹka ono bụ
ọgba oduma ono;
ẹka agụ edomishije
onwophẹ.
9 Gụbe nwamgbọko,
mu lụru k'ọ̀phúú;
bya abụru nwune mu;
obu, mu yeru ngu
hatakwaru mu meji.
Ẹnya, i leru mu mgbo lanụ;
mẹ iphe-olu,
ị tụkporu l'olu;
bẹ i gudeẹpho hata
mu meji.
10 Lewarọ gẹ n-yemobu
ngu aatsọ-beru ụtso;
gụbe onye bụ nwamgbọko,
mu lụru k'ọ̀phúú
bya abụru nwune mu.
N-yemobu ngu kakwa mẹe
atsọ ụtso.
Ọ bụkwarupho nno bụ gẹ
manụ,
ị nyịru kakọtakwapho
manụ ọzo eshi mkpọ.
11 Gụbe nwanyị,
mu lụru k'ọ̀phúú; opfu,
eshije ngu l'ọnu fụta
anọduje atsọ gẹ
manụ-ẹnwu,
shi l'ẹbakala-ẹnwu
atada.
Ire ngu bụ mini ẹra-eswi;
waa manụ-ẹnwu
jiru iya.
Uwe ngu eshi
kwẹekweekwee
g'úbvú úbvú Lébanọnu.
12 Gụbe onye bụ nwanyị,
mu lụru k'ọ̀phúú;
bya abụru nwune mu;
ị dụepho gẹ mgbabu,
a tụ-chiru atụ-chi.
Ị dụ g'òbvú, anwụshi mini,
e kpuberu iphe;
mbụ g'ọgba-mini,
a dọberu iphe.
13 Ụdara, amịshi akpụru,
dụ ree bụ iphe,
jiru mgbabu ngu.
Oshi hena;
mẹ nadụ jikwaphọ
mgbabu ngu ono ejiji.
14 Oshi nadụ;
mẹ ọphu aza safarọnu
dụ iya.
Oshi kalamọsu;
mẹ oshi sinamọnu
dụkwa iya phọ.
Iphe, bụkpoo oshi isẹnsu,
dụ iche iche pfụru
iya.
Mẹru; mẹ alowe;
mẹkota oshi,
eegudeje eme iphe,
eshi mkpọ
pfụkotakwaru iya phọ.
15 Ị bụ ọgba-mini, doru rịsaa;
nọ l'ime mgbabu;
tẹme ị bụru wẹlu-mini,
l'anụ ndzụ;
bya abụru nggele,
shi l'úbvú úbvú
Lébanọnu asọshihu.
16 Gụbe phẹrephere ụzo isheli;
tehu etehu!
Watanụ ezizi;
gụbe phẹrephere ọphu
shi l'ụzo ndọhali!
Unu bya ezia lẹ mgbabu
mu-a;
gẹ mkpọ iya atụko mgboko
vọo pfurupfuru!
Jiko batanu lẹ mgbabu ngu
gụbe onye mu
yeru obu;
bya awọta akpụru-iphe,
a kụru iya ọphu kachaa
ree ria.