22
Ebvu ajaja, Dévidi gụru
(Ebvu 18:1-50)
1 Dévidi gụru ebvu-a nụ Chipfu lẹ mbọku, Chipfu nafụtakotaru iya l'ẹka ndu ọhogu iya l'ophu; kelekele kẹ Sọlu.
2 Ọ gụru sụ:
Ọo Chipfu bụ agbara-mkpuma nkemu;
bya abụru ụlo-ezeru-ndzụ mu; bụru onye agbafụtaje mu nụ.
3 Ọo Chileke mu bụ agbara-mkpuma, mu agbabajẹ je edomia onwomu.
Ọo ya egbobutaje mu g'ọ tọ dụ iphe, e-me mu nụ.
Ọ bụru iya bụ onye eegudeje ọkpehu iya dzọo mu.
Ọo l'ime iya bẹ mu agbabajẹ je anọdu zeeru ndzụ.
Tẹme ọ bụru iya bụ onye ndzọta mu;
ọo yẹbedua adzọje mu l'ẹka ndu eme mu mkpawere.
4 Ọo Chipfu ono, bụ onye gbaru g'a jajẹ iya ajaja ono bẹ mu arakuje;
l'ọ dzọta mu l'ẹka ndu ọhogu mu.
5 Anwụhu shiwaa chie mu ẹgbirigba l'olu.
Ọla-l'iswi nọdu asọ gborogboro gẹ mini asọ-pfuta mu.
6 Ẹkpa oyi alị-maa nwụa mu kpalaa.
Anwụhu shiwaa woru ọ́nyà gbabẹru mu.
7 Ọle teke mu eje iphe-ẹhuka bẹ mu rakuru Chipfu.
Mu rakuru Chileke mu.
Ọ gbẹ l'eze-ụlo iya nụma olu mu;
mkpu, mu chiru chiku iya rwua ya nchị.
8 Noo ya bụ; eliphe l'ophu tehu kparịkpari; nmakọta jiijiijii.
Ẹka a tụru ọkpa imigwe l'ophu nmaghukọta anmaghu;
kẹle Chileke bẹ ẹhu eghu eghu.
9 Ẹnwuru ọku, shi iya l'imi akpụ kẹ tụutuutuu.
Ọku, shi iya l'ọnu afụshi tụkoepho iphemiphe ekepyashị.
Icheku-ọku iphe, o kepyashịru tụko ẹkameka ata pfụpfupfu.
10 Ọ dọjaha akpaminigwe kẹ tararara; ọ bụru iya alụfuta.
Ọchii, gbahụru kẹ tsụkiribaa nọdu iya lẹ mkpula ọkpa.
11 Ọ nọdu l'eli chierobu phezeta.
Ọ bụru lẹ ǹkù phẹrephere bẹ o degeru ezi phuphuphu.
12 O woru ọchii kpuchia onwiya;
mbụ l'urwukpu, mini jiru ejiji bẹ nọ-pheru iya mgburugburu.
13 Icheku-ọku, ata pfụpfupfu
shi l'ogbunwịinwii ya agụshihugba.
14 No iya; Chipfu gbẹ l'akpaminigwe tụa egbigwe.
A nụma olu onye ono, bụ Ọkalibe-kakọta-shii ono.
15 Ọ gbaa apfụ gude chịkaa ndu ọhogu iya.
Ebemu-igwe bẹ ọ kụru kẹ phoo;
ẹphe zẹkota l'ọso gbalachaa.
16 Chipfu ziru unme fuu gbọoru ndu ọhogu iya ụja.
Eze Ẹnyimu sọkahu ẹbo; k'ọphu a hụmachaaru ọhu-ẹnyimu l'ẹnya;
kpuhachaa ẹka a tụru ọkpa-alị mgboko; a hụma.
17 Chipfu gbẹ l'imigwe tụfu ẹka;
zụ mu gburumu; gụfuta mu l'ogbu-mini.
18 Ọ nafụtakwaru mu phọ l'ẹka ndu ọhogu mu, ọkpehu dụ;
mẹ l'ẹka iphe, bụkpoo ndu mu dụ ashị;
noo kẹle ẹphe kariru mu ẹka.
19 Mbọku ono, mu eje iphe-ẹhuka ono bẹ ẹphe tsoru mu ọgu;
obenu l'ọo Chipfu gbatarụ mu ike.
20 Ọo yẹbedua kutaru mu dobe l'ẹka mu nọ tụsaru ẹhu.
O yeru mu ẹka nafụta mu l'ọgu; kẹle mu dụ iya l'obu.
21 Chipfu buru mu nggo; kẹle mu bụ onye pfụberekoto;
mbụ kẹle mu bụ onye iswi dụ mma.
22 Noo kẹle ọ bụepho ụzo, Chipfu tọru bẹ mu anọduje etso.
Ọphu mu egudejedu eme ẹjo-iphe gbakụta Chileke azụ.
23 Ekemu Chipfu bẹ mu nwụbekotaru ẹnya g'ọ ha.
Tẹme ọphu mu aghajẹduru iphe, ọ sụru g'e meje okotazụ.
24 Ọ tọ dụkpodaa ẹka ụta dụ mu l'ẹhu l'atatiphu iya.
Mu sedekpọerupho onwomu; ọphu ọ dụdu ẹjo-iphe, mu yejeru ẹka.
25 Chipfu buru mu nggo; kẹle mu bụ onye pfụberekoto;
mbụ l'o buru mu nggo; kẹle mu bụ onye iswi dụ mma l'iphu iya.
26 Ndu yeru ngu obu bẹ iigoshije l'i yeru obu.
Ndu dụebe ree bẹ ịiduebejeru ree.
27 Ndu obu phẹ gụru ìphóró bẹ iidobejeru obu ìphóró.
Ị nọdu emejeru ndu doberu ụzo phẹ nggọdogo nggọdogo g'umere phẹ gbaru.
28 Ndu wozeru onwophẹ alị bẹ ịidzotaje;
obenu l'ẹnya ngu adụje l'ẹka ndu eku onwophẹ nọ g'i wozeta phẹ alị.
29 Ọo gụbedua, bụ Chipfu bụ orọku mu.
Ọo gụbe Chipfu emeje g'ìphóró dụru mu l'ẹka ọchii agba.
30 Eshinu iiyeru mu ẹka bẹ mu e-tso ikpoto ndu ojọgu ọgu.
Igbulọ mkpụkpu phẹ bẹ mu e-nyi; eshinu mu lẹ Chileke swị.
31 Ụzo Chileke bẹ ntụcha adụdu m'ilile;
opfu Chipfu bụkota ọkpobe opfu.
Oogbobutaje ndu gbabarụ l'ime iya je anọdu ezeru ndzụ.
32 ?Bụ onye bụbaa Ọkalibe, dụ nụ, abụdu Chipfu kpoloko?
?Bụ onye bụba agbara-mkpuma, abụdu Chileke anyi?
33 Ọo Chileke emeje g'ike dụ mu.
Ọ bụru iya meru ụzo mu; ọphu ntụcha adụdu iya.
34 Oomeje gẹ mu pfụ shọoshoo gẹ mgbada;
mbụ l'oomeje gẹ mu pfụru pfụshia ike l'eli úbvú.
35 Ọ ziru mu; mu maru g'aalwụje ọgu;
k'ọphu bụ l'ọ tọ dụdu m'obeta ọ bụru apfụ, e kweru l'igwe; mu adụele-a ike gbaa ya.
36 Ọo gụbe Chipfu egbobutaje mu; shi ẹgube ono dzọo mu ndzụ.
Ẹka iiyeru mu ekutseje mu.
37 I mesataru ụzo mu ọsa; g'ọkpa te echiswafu mu.
38 Mu gude ọso chịa ndu ọhogu mu; gwee phẹ arakabya;
ọphu mu anmadụru nggụ; jasụ mu mee phẹ; ẹphe bụru mkpurupyata.
39 Mu chiru phẹ pyakapyaka; k'ọphu ẹphe ta adụedu ike gbelibaa ishi ọzo.
Ẹphe zẹgbaepho kẹ manyọo lẹ mgboru ọkpa mu.
40 Ọo ike nkengu bẹ mu gude eje ọgu.
Ndu etso mu opfu bẹ i meru; ẹphe gbushiru mu ikpere.
41 Ndu ọhogu mu bẹ i meru; ẹphe chie ọkpa l'ọso.
I mee; mu tụko ndu mu dụ ashị gbushikọta.
42 Ẹphe chia mkpu; ọphu ọ dụdu onye gbaru phẹ mkpu.
Ẹphe raku Chipfu; ọphu o yedụru phẹ ọnu.
43 Mu gwerụ phẹ uji mee phẹ; ẹphe dụ g'urwuku, dụ l'alị.
Mu tsụa phẹ ọtsuepfu; zọo phẹ tọlitoli g'ẹpuchi, nọ lẹ gbororo.
44 Ị nafụtaru mu l'ẹka ndu etso mu opfu;
bya emee mu; mu bụru ishi ọhamoha;
k'ọphu ndu mu eshidu maru byaru alwakọta mu l'ẹka.
45 Ndu ọhozo ephozekọtaru mu.
Ẹphe -nụma l'ọwa-a iphe, mu sụru g'e mee baa; ẹphe emee ya ẹgwegwa.
46 Meji tọfukota iphe, bụ ndu ọhozo ono;
tẹme ẹphe nọdu eshijegbaa l'ẹka ẹphe shi wohaa onwophẹ phụru yẹyeye byapfuta mu.
47 Chipfu nọkwa ndzụ; unu tua agbara-mkpuma nkemu ono ẹpha!
Unu kutsee Chileke; l'ọo ya bụ onye adzọje mu nụ!
48 Ọo Chileke ejeje agwata ụgwo iphe, ndu ọhogu mu meru mu.
O meru; ụnwu-eliphe nọdu mu lẹ mkpula.
49 Ọonafutaje mu l'ẹka ndu ọhogu mu;
oowolije mu eli woru mu doghaa ndu etso mu opfu.
Ọogbafutaje mu l'ẹka ndu emeje nemadzụ iphe-kpangangaa.
50 Noo g'o gude mu je a-pfụru l'iphu ọhamoha kele gụbe Chipfu ekele.
Mu a-gụ ebvu gude tua ngu ẹpha.
51 Onye eze, ọ họtaru bẹ oomeje g'o mekpee l'ọgu.
N-yemobu iya bẹ ọonoduje egoshi onye ọ wụru manụ l'ishi,
bụ Dévidi yẹe oshilọkpa iya jasụ lẹ tuutuutuu lẹ mịimiimii.