16
1 Ọo ya bụ; ẹphe pabata okpoko Chileke ono; woru iya dobe l'ime ụlo-ẹkwa ono, Dévidi kpọberu g'e dobe iya ono. Ẹphe bya egweshia ngwẹja-akpọ-ọku; mẹ ngwẹja-ẹhu-guu l'iphu Chileke.
2 Dévidi gweghechaẹpho ngwẹja-akpọ-ọku ono; mẹ ngwẹja-ẹhu-guu ono; o gude ẹpha Chipfu gọru ọnu-ọma nụ ndu Ízurẹlu.
3 Ọ bya ekeeru ndu ono ishi buredi nanụ nanụ l'ẹhu l'ẹhu; mẹ akara, e meru l'akpụru oshi detu; mẹ akara, e gheru l'akpụru vayịnu; kedzuru iya ndu Ízurẹlu ono l'ophu; unwoke; mẹ ụnwanyi.
4 Ọ bya a harụ ndu Lívayi họta g'ẹphe jeje ozi l'atatiphu okpoko Chipfu ono; mbụ g'ẹphe rwọje Chileke iphe; mẹ g'ẹphe tuje iya ẹpha; jajẹ Chipfu, bụ Chileke kẹ Ízurẹlu ajaja.
5 Asafu bụ ishi; Zekaraya bụru otsota. Ndu ọzo bụ Jieyẹlu; mẹ Shemiramotu; mẹ Jiehiyẹlu; mẹ Matitaya; mẹ Eliyabu; mẹ Benaya; mẹ Óbẹdu-Edọmu; mẹ Jieyẹlu. Ẹphebedua bẹ a-nọduje akpọ une; mẹ ogumogu. Asafu akụ ogelenda.
6 Benaya yẹle Jiahaziyẹlu, bụ ndu-uke Chileke bẹ a-nọduje egbu opu tekenteke l'atatiphu okpoko ọgbandzu Chileke ono.
Ebvu-ekele
(Ebvu 105:1-15; 96:1-13; 106:1,47-48)
7 Mbọku ono bẹ Dévidi vuru ụzo pfuaru Asafu; mẹ ndu ọgbo-ebvu iya g'ẹphe gụa ebvu ekele nụ Chipfu.
8 Unu kele Chipfu ekele;
unu kua ẹpha iya!
Unu mee g'ọhamoha
madzuru iphe,
o meru!
9 Unu guku iya l'ebvu!
Unu gụa ebvu gude tua ya ẹpha!
Unu pfukashịkwapho iphe,
bụkpoo iphe, dụ biribiri,
ọonoduje eme!
10 Unu gude ẹpha iya ono,
dụ nsọ tua onwunu ẹpha!
G'obu ndu achọ Chipfu
teje ẹswa!
11 Unu wojeru ẹnya dabẹ
lẹ Chipfu mẹ ọkpehu iya!
Unu achọje iphu iya
mkpụrumkpuru!
12 Unu nyatakwa iphe,
dụ biribiri, o mekọtaru;
waa iphe-ọhumalenya,
o meshigbaaru; waa ikpe,
o kperu;
13 unubẹ oshilọkpa Ízurẹlu,
bụ onye-ozi iya;
unubẹ ụnwu Jiékọpu,
bụ ndu o gude ẹka iya họta!
14 Ọ kwa iya bụ Chipfu;
bya abụru Chileke anyi;
ikpe o kperu tụkoru
mgboko l'ophu sweta.
15 Unu nyatajẹ ọgbandzu iya
jasụru asụru.
Ukwe-iphe, o kweru bẹ anọje;
e -shi l'ọgbo sweru ọgbo.
16 Ọgbandzu ono,
yẹle Ébirihamu gbaru ono;
mbụ angụ ono,
o riburu Áyizaku ono;
17 bẹ o meru; ọ bụru
ekemu l'ẹhu Jiékọpu.
Ndu Ízurẹlu bẹ o meru iya;
ọ bụru ọgbandzu,
a-nọ ojejoje;
18 sụ phẹ: “Ọo unu bẹ mu
a-nụ alị Kénanu
g'ọ bụru okiphe, unu ketarụ.”
19 Teke ono bẹ ẹphe shi habe
nwahabe; mbụ teke ẹphe
shi ha nwa chịaka-chịaka;
bụru ndu lwarụ alwalwa
l'alị ono.
20 Ẹphe shi etsojeru ọhamoha
aghaphe.
Ẹphe -shi l'alị-eze ọwa-a;
ẹphe alụfu l'alị-eze ọphuu.
21 Ọphu ọ dụdu onye o
kweru g'o mee phẹ ewere.
Ọ nọdu egudeje opfu ẹhu phẹ
baarụ ndu eze mba;
22 sụ phẹ: “Unu te edenyikwa
ndibe mu, mu, a wụru manụ,
ẹka!
Ba adụkwa iphe,
unu e-me ndu epfuchiru
mu nụ!”
23 Unu gụa ebvu nụ Chipfu;
unubẹ eliphe l'ophu!
Unu rajẹ iya arara
mbọkumboku l'ọodzoje
nemadzụ!
24 Unu tụaru ndu ọhozo ọnu
g'ọ dụ-be biribiri!
Unu epfuaru ndiphe l'ophu iphe,
dụ biribiri, oomeje!
25 Noo kẹle Chipfu parụ ẹka;
bya abụru onye gbaru g'a
jajẹ iya ajaja.
G'a tsụjekwa iya phọ ebvu
l'ọ kakọta iphe,
bụ agwa ndu mgboko
l'ophu shii.
26 Kẹle agwa ndiphe l'ophu
bụkota iphe,
e gude ẹka mee;
obenu lẹ Chipfu bụ iya gude
ẹka iya mee igwe l'onwiya.
27 Akpabiri yẹe ogbunwịinwii
bẹ nọ iya l'atatiphu;
tẹme ọkpehu waa ẹhu-ụtso
tụko ẹka o bu sweta.
28 Unubẹ ipfu l'ipfu,
dụ lẹ mgboko-a;
unu kwabẹ Chipfu ùbvù!
Unu pfua g'ọ dụ-be biribiri;
yẹe g'ọkpehu iya habe shii!
29 Unu kwabẹ Chipfu ùbvù,
gbaru ẹpha iya.
Unu gude iphe bya l'iphu iya.
Unu yee adụ nsọ g'onye yeru
uwe baarụ Chipfu ẹja.
30 Unu nmahụkwa
pyaapyaapyaa l'iphu iya;
unubẹ eliphe l'ophu.
Mgboko bẹ e mewaru ọ
ngụru angụru;
ọphu ọ dụdu iphe,
sụru iya enwubata.
31 G'imigwe l'ophu tee ẹswa;
ẹhu atsọo ndiphe l'ophu ụtso!
G'ẹphe karụ ọhamoha l'ọo
Chipfu bụ eze.
32 G'eze-ẹnyimu yẹe iphemiphe,
nọ iya l'ime tụkokwa tụa
oke akparamini.
G'ẹgu l'ophu mẹkpoo iphemiphe,
nọ iya nụ tụko gbọo ọgboo!
33 Noo teke iphe, bụ oshi,
dụ l'ọswa a-gụ ebvu ẹhu-ụtso
l'iphu Chipfu.
Noo kẹle ọobyawaa gẹ ya
kpee ụnwu-eliphe ikpe.
34 Unu kele Chipfu ekele
kẹle ọ bụ onye ọma!
N-yemobu nkiya anọje jasụ
l'ojejoje.
35 Unu rarụ kpua ya sụ:
“Dzọnaa anyi; gụbe Chileke,
bụ onye ndzọta anyi!
Rwukọbenu anyi;
dzọta anyi l'ẹka ndu ọhozo ono;
k'ọphu anyi e-tu ngu ẹpha;
gụbe onye ono,
ẹpha ngu dụ nsọ ono;
gude ajaja, anyi a-ja ngu baa aba.
36 G'ajaja bụru kẹ Chipfu,
bụ Chileke kẹ Ízurẹlu;
e -shi lẹ gbururu jeye lẹ gbururu.”
Noo ya; ndu Ízurẹlu l'ophu tụko zụkota mgbede sụ: “Nokwa g'ọ dụ. G'ajaja bụru kẹ Chipfu.”
Eke ozi
37 Ọo ya bụ; Dévidi bya ahaa Asafu mẹ ndu ọgbo-ebvu iya l'atatiphu okpoko ọgbandzu Chipfu ono; g'ẹphe jeje ozi dụ l'ẹka ono tekenteke; mbụ g'ọ gbarụ g'e jeje iya mbọkumboku.
38 Ọ hakwarụpho Óbẹdu-Edọmu waa ụnwunna iya, dụ ụkporo ẹto l'ụmadzu ẹsato. Óbẹdu-Edọmu nwa Jiedutunu; yẹle Hosa nọdu eche ọnu ẹka ono nche.
39 Ọ haa Zadọku, bụ onye uke Chileke; waa ụnwunna iya, bụkwapho ndu-uke Chileke g'ẹphe nọdu l'atatiphu ụlo mkpu Chipfu, dụ l'ẹka aagwajẹ iphe lẹ mkpụkpu Gibiyọnu ono.
40 Ozi phẹ bụ g'ẹphe gwejeru Chipfu ngwẹja-akpọ-ọku l'ọru-ngwẹja; eswe l'ẹnyashi; mbụ tekenteke; ẹgube ono, e deru iya l'ẹkwo ekemu, Chipfu tụru nụ ndu Ízurẹlu ono.
41 Ndu a gụru yeru phẹ bụ Hemanu; mẹ Jiedutunu; mẹwaro ndu a họtaru kua phẹ l'ẹpha l'ẹpha g'ẹphe keleje Chipfu ekele kẹ n-yemobu iya ono, anọje jasụ l'ojejoje ono.
42 Hemanu; yẹle Jiedutunu bẹ egbu opu dụru; mẹ akụ ogelenda; mẹwaro ngwa-ebvu ọzo, e gude agụ ebvu, dụ nsọ. Ụnwu Jiedutunu bẹ bụ ndu eche ọnu-ọguzo.
43 Tọbudu iya bụ; ndu Ízurẹlu l'ophu wụkashihu lashịa ibe phẹ. Dévidi lashịa ibe nkiya g'ọ gọru ọnu-ọma nụ ndibe iya.