14
Ndibe Dévidi
1 Tọbudu iya bụ; Hiramu, bụ eze ndu Taya bya eye ndu-ozi iya g'ẹphe vutaru Dévidi oshi sida; bya eyekwaphọ ndu edoje ẹja ụlo; mẹ ndu kapyịnta; ẹphe tụko swịru; g'ẹphe je akpụaru Dévidi ụlo.
2 Dévidi bya amaru lẹ Chipfu bẹ mewaru gẹ ya ngụru angụru l'abụru eze ndu Ízurẹlu; tẹme l'alị-eze iya bẹ e gudewaa iswi ẹhu ndu nkiya ono, bụ Ízurẹlu palia imeli.
3 No iya; Dévidi bya alụshibaa ụnwanyi igwerigwe lẹ Jierúsalẹmu; bya anwụshibaa ụnwegirima; unwoke mẹ ụnwanyi.
4 Waa ẹpha ụnwegirima, a nwụshiru iya lẹ Jierúsalẹmu baa: Shamuwa; mẹ Shobabu; mẹ Nétanu; mẹ Sólomọnu;
5 mẹ Ibuha; mẹ Elishuwa; mẹ Ẹlupeletu;
6 mẹ Noga; mẹ Nẹfegu; mẹ Jiafiya;
7 mẹ Elishama; mẹ Beluyada; mẹ Elifẹletu.
Dévidi alwụ-kpee ndu Filisitayinu
(2Sám 15:11-16)
8 Ndu Filisitayinu bya anụmaepho l'a wụwaru Dévidi manụ l'ishi g'ọ bụru eze ndu Ízurẹlu l'ophu; ẹphe tụko g'ẹphe ha jeshia ya egude k'ẹhuka. Dévidi nụma iya; bya ejepfushia phẹ.
9 Teke ono bẹ ndu Filisitayinu byawaru egwee tụtua lẹ nsụda Refayimu.
10 Ọo ya bụ; Dévidi bya eje ajịta Chileke sụ: “?Bụ gẹ mu jepfu ndu Filisitayinu ọgu tọo? ?Ii-woru phẹ-a ye mu l'ẹka?”
Chipfu yeeru iya ọnu sụ iya: “Jerọo ya; mu e-woru phẹ-a ye ngu l'ẹka.”
11 Ọo ya bụ; Dévidi waa ndu nkiya jeshia mkpụkpu Belu-Perazimu; je alwụ-kpee phẹ l'ẹka ono. Ọ sụ; “Ọo g'ukporo-mini ekpoje-a bụ gẹ Chileke shiwaa l'ẹka mu kpota ndu ọhogu mu.” Ọo ya meru g'o gude a gụa ẹka ono Belu-Perazimu.
12 Ndu Filisitayinu gbadochaa agwa phẹ l'ẹka ono. Dévidi tụa ekemu g'a kpọo ya ọku.
13 E mechaa; ndu Filisitayinu byakwa egwee tụtua lẹ nsụda ono ọzo.
14 Dévidi byakwa eje ajịta Chileke ọzo; Chileke sụ iya: “Te eshikwa phẹ atatiphu nhamụnha; shichia okotazụ gbaa phẹ mgburugburu l'iphu ẹka ono, oshi balusamu pfụgbaaru ono tsoo phẹ ọgu.
15 Teke unu bebeẹrupho nụma iphe, ada g'igiji ọkpa l'eli oshi balusamu ono; unu emekebe ẹgwegwa jeshia alwụ ọgu; noo kẹle ọo teke ono bẹ Chileke vutawaru unu ụzo g'unu je egbushia ndu ojọgu ndu Filisitayinu.”
16 Noo ya; Dévidi meẹpho gẹ Chileke ziru iya. O shiẹpho lẹ mkpụkpu Gibiyọnu gbushia ndu ojọgu ndu Filisitayinu jasụ lẹ mkpụkpu Geza.
17 Tọbudu iya bụ; ụ́dù Dévidi tụko mgboko l'ophu ngakọta. Chipfu mee; ọhamoha nọdu atsụkota iya ebvu.