8
Mmamiphe eku ngu oku
1 ?Tọbudu oku bẹ mmamiphe
eku ẹgube phọ?
Mbụ ?tọ bụdu olu
nkwamẹnya ada
g'ọoda phọ?
2 Ọo l'ẹka dụ ephekerephe,
nọ l'agụga gbororo;
mbụ lẹ mgbakata-ụzo bẹ o
jeru je apfụru.
3 Ọ pfụru l'agụga ọnu-abata
ẹka eeshije abahụ
l'ime mkpụkpu ono.
Ọo l'ọnu mgbo mkpụkpu ono
gẹdegede bẹ ọ pfụru
echi mkpu sụ:
4 Ọ kwa unubẹ nemadzụ
l'ophu bẹ mu eku;
mbụ l'ọo ndiphe g'unu ha
bẹ mu akpọru okwe.
5 Unubẹ ndu enwedu
egomunggo; g'iphe
dojenụ unu ẹnya!
Unubẹ ndu eme eswe;
unu kwanaa ẹnya!
6 Unu ngabẹ nchị;
kẹle iphe, mu epfu bụkwa
ọkpobe iphe.
Mu sakwarụ ọnu k'epfu iphe,
pfụru nhamụnha.
7 Iphe, mu epfuje bụ ire-lanụ;
kẹle ẹjo-iphe adụjekwa mu
ashị.
8 Iphe, bụ opfu, shi mu l'ọnu
bụkota opfu,
pfụru ọto.
Ọ tọ dụdu opfu, gberu nggọ;
ọzoo ọphu
apfụduru-ọto, eshije mu
l'ọnu.
9 Onye iphe edoje ẹnya maru
lẹ g'ọ hakọta pfụru ọto.
Ndu maru iphe bẹ maru
l'opfu ono pfụgbaaru
nhamụnha.
10 Hakwa mkpọla-ọchaa;
hatachia mba,
mu abarụ ngu!
Mmamiphe kakwa ọkpobe
mkpọla-ododo ree!
11 Kẹle mmamiphe kakwa
mkpuma, aswa dụ ere ire.
Ọ tọ dụkwa iphe, agụje
nemadzụ ẹgu enweru
mẹ nanụ,
aa-nọdu atụ eyeru iya.
12 Mụbe mmamiphe bẹ yẹe
nkwamẹnya bukwa
l'ẹka lanụ.
Amaru iphe yẹle eye ọnu
l'opfu tụkokwaru bụru
mu nwe iya.
13 Atsụ Chipfu ebvu bụkwa
akpọ ẹjo-iphe ashị.
Iphe, dụ mu ashị bụkwanu
eku-onwonye yẹe etu
onwonye ọphushugbu;
yẹe eme ẹjo-ememe;
waa epfu iphe,
apfụduru-ọto.
14 Ọkpobe idzu yẹe mmamiphe
bụ nkemu.
Nkwamẹnya yẹe ike
bụkwarupho nkemu.
15 Ndu eze gude mụbe mmamiphe
nọdu l'aba-eze phẹ.
Ndu-ishi gude mu atụ ekemu,
pfụru nhamụnha.
16 Ọo mu bẹ ndibe ndu eze
gude nọdu l'aba-eze phẹ;
mẹkpoo iphe, bụkpoo ndu
ha shii, nọkota l'ọkwa
bụru ishi ụnwu-eliphe.
17 Ndu yeru mu obu bẹ mu
yekwarụ obu;
tẹme ndu achọ mu nụ
achọshi mu ike je
l'achọta mu.
18 Enweru iphe; yẹe akwabẹ
ùbvù bụkota nkemu.
Ẹku, a-nọ jasụ l'ojejoje;
waa apfụbekoto tụko
nọdu mu l'ẹka.
19 Urwu, eeritajẹ lẹ mbẹdua
kakwa ọkpobe
mkpọla-ododo ree;
tẹme iphe, mu agbatajẹ
tukobe onwomu
kakwaphọ ree eme
l'ọkpobe mkpọla-ọchaa.
20 Ụzo, mu eshije bụ ụzo
apfụbekoto.
Ọ bụru gbororo k'ikpe,
pfụru nhamụnha bẹ
mu etsoje.
21 Ndu yeru mu obu bẹ mu
emeje g'ẹphe baa ụba;
tẹme mu nọdu emeje
g'ụlo-ẹku phẹ ji ejiji.
22 Ọo mụbe mmamiphe bẹ
Chipfu vuchakpọo ụzo
nweru;
tẹme ọ wata eme iphemiphe
ono,
o meshiru lẹ teke ndiche ono.
23 A họtahawaru mu rọ teke
aama;
mbụ lẹ mbụlembukpoo;
tẹme e meje mgboko.
24 Teke oke-ẹnyimu teke
adụkpodanu bẹ mu
nọhawa;
mbụro teke ọgba, mini jiru
ejiji eteke eshidu dụ.
25 Tẹme e mee úbvú úbvú
dobegbaa l'ọnodu iya;
mbụ tẹme e mee úbvú,
hagbaa nwanshịi bẹ
mu nọhawa.
26 Tẹme Chipfu mee eliphe-a
l'ophu; yẹe obotẹgu,
dụ iya nụ;
mbụkponu tẹme e
mee urwuku, jiru
mkpoji-ẹka.
27 Mu nọkwa l'ẹka ono teke
o meru igwe dobe;
mbụ teke o meru
akpaminigwe;
o phoze je agẹbe ọnu
l'oke-ẹnyimu.
28 Teke o meru urwukpu dobe;
bya edobegbaa ọgba ọgba,
mini ime alị shi asọfuta
lẹ mgboko.
29 Teke ono, ọ kparụ
eze-ẹnyimu oke;
k'ọphu bụ lẹ mini ta
asọghatadu ẹka ọ sụru
g'ọ sọ-beru;
mbụ teke ono, ọ tụru ọkpa
eliphe-a l'ophu;
30 bẹ bụkwa mụbe mmamiphe
bụ nnajịuphu, shi nọdu
iya lẹ mgburẹku emeru
iya ọna.
Mu meru; ẹhu nọdu
anọduje atsọ iya ụtso
mbọku-mbọku;
tẹme mu shi
anọdujekwapho
ete ẹswa l'iphu iya
mkpụrumkpuru.
31 Mụbe mmamiphe bẹ mgboko,
o meru shi emeje;
ẹhu-ụtso eji mu obu;
tẹme ndiphe l'ophu nọdu
adụjekwa mu phọ ree.
32 Ọo ya bụ; unubẹ ụnwu mu;
unu ngabẹnuru mụbe
mmamiphe nchị.
Ẹhu-ụtso bẹ a gọru nụ onye
etso ụzo mu.
33 Unu ngabẹ nchị nụma mba,
mu abarụ unu;
g'unu amaru iphe!
B'e wokwaru iya hua l'alị!
34 Ẹhu-ụtso bẹ a gọru nụ onye
ngabẹru mu nchị l'olu;
onye anọduje l'ọnu
mgbo ibe mu eche nche
mbọku-mbọku;
mbụ onye anọduje l'ọnu-ụlo
mu ngabẹru mu.
35 Kẹle onye chọru mụbe
mmamiphe chọta bụkwa
ndzụ bẹ ọ chọtaru;
tẹme onye ono bụwaru
onye tụbaru Chipfu l'ẹnya.
36 Obenu l'onye jịkaru achọ
mụbe mmamiphe bụkwa
onwiya bẹ oometa iya.
Iphe, bụkpoo onye mu dụ
ashị bụkwa ọnwu bẹ
o yeru obu.