30
1 Ọwaa bụ opfu-ọnu
Agụru, bụ nwa Jiake;
ozi, Chipfu ziru iya:
Nwoke ono pfuru iya Itiyẹlu;
mbụ l'o pfuru iya Itiyẹlu
pfuaru iya Ukalu sụ:
2 Ọ kwa mu kachaa b'a ama
iphe l'iphe,
bụkpoo unwoke.
Egomunggo nemadzụ ta
adụkwa mu l'ẹhu.
3 Mmamiphe bẹ mu ta
nwụkpodaaru ilile.
Ọphu mu amadụ Onye nsọ
ono amama ophu.
4 ?Bụ onye bahụjewaru
l'imigwe;
bya eshi iya lwazeta?
?Bụ onye gudejewa ẹka
kpokọbe phẹrephere?
?Bụ onye gudejewa uwe iya
kechia mini mini,
nọgbaa nụ?
?Bụ onye meru g'ẹka mgboko
l'ophu beru kpọo
g'abara?
?Ẹpha onye ono bụ gụnu?
?Bụ gụnu bẹ nwa iya aza?
Kanụru mu iya mẹ ọ -bụru
l'ị maru iya.
5 Opfu Chileke l'ophu l'ophu
dokwaru rịsaa.
Tẹme ọ bụru onye egbobutaje
iphe,
bụkpoo ndu gbabarụ
l'ime iya je anọdu eze ndzụ.
6 B'e yekwakwa iphe l'opfu iya.
Ọdumeka bẹ ọo-bakwarụ
ngu mba goshi ọha l'ị
bụ onye adzụje ụka.
7 Iphe labọ bẹ mu akpa ngu
ishi iya jiko Chipfu.
Mekwaaru mu iya jiko tẹme
mu anwụhu.
8 Menaa gẹ atụkporoko yẹe
adzụ ụka nọdu mu
ẹnya.
B'emekwa gẹ mu kpaa nri;
ọphu i mekwa gẹ mu
nweru iphe.
Iphe, ịi-nụje mu phọ bụ
nri, asụje mu eriri
mbọku-mbọku.
9 Ọdumeka bẹ mu
e-nwenụkakwaru iphe
shi nno jịka ngu:
pfuahaa sụ:
?Bụ onye bụ Chipfu ọbu?
Ọzoo lẹ mu jeru je akpanụka
nri; je ezia iphuru;
shi nno mebyia ẹpha
Chileke mu.
10 Ta anọdukwa l'iphu nnajịuphu
pfubyishia onye-ozi iya.
Ọdumeka bẹ ọo-tụkwa ngu
ọnu, a-vụru ngu nụ.
11 O nwekwarụ ndu anọduje
ephu nna phẹ iphu.
Ọphu ẹphe agọjedu ọnu-ọma
anụ ne phẹ.
12 Mbụ ndu dụebe ree l'ẹnya
nkephẹ.
Ọle a ta safụkwaru phẹ
ideyideyi, ẹphe dụ.
13 Ndu anọduje avọru nemadzụ
ẹnya;
bya elephuje nemadzụ
ibe phẹ.
14 Eze, dụ phẹ l'ọnu bụ
ogu-echi;
Iphe, doru phẹ jọo l'ọnu
bụru ọkarara,
ẹphe e-gude tụko ndu ụkpa
tagbushikọta g'ẹphe
bvụ l'eliphe;
tụko ndu adụdu g'ọ dụ phẹ
lwụa g'ẹphe ta phọdu
l'echilabọ ndu nọ ndzụ.
15 Etu-ụda nwụtaru
ụnwumgboko labọ.
Ọ bụru iphe,
ẹphe anọdujeepho ara
mkpụrumkpuru bụ:
Nụ mu! Nụ mu!
Mbụ l'o nweru iphe ẹto,
ẹpho te ejijedu ejiji;
mbụ iphe ẹno,
teke asụswee:
O jiwaru mu!
16 Mbụ alị-maa;
yẹe ẹpho nwanyị,
ta atsụdu ime; yẹe alị;
kẹle alị teke
angụnyadaa mini bya
asụ lẹ ya ta angụedu;
waa ọku, enwu enwunwu;
ọku, enwu enwunwu
teke anọnyakpoo
bya asụ: O jiwaru mu!
17 Onye asụ̀ nna iya ẹnya ruu;
ọphu ọ kpadụ ishi eme iphe,
ne iya sụru g'o mee
bẹ okpoko-ọ́hà e-shi lẹ
wukirima bya agụta
ẹnya onye ọbu.
Ọ bụru udele l'e-ri iya.
18 Ọ dụru iphe ẹto,
dụ mu oke biribiri;
mbụ iphe ẹno,
te edokpọdaru mu
ẹnya edodo ophu:
19 ụzo ugo l'akpaminigwe;
waa ụzo agwọ l'eli
mkpuma;
waa ụzo ụgbo-mini
l'eze-ẹnyimu;
yẹle ụzo nwoke waa
nwamgbọko.
20 Waa gẹ nwanyị ovuọba
emeje iya baa:
Oorije nri woru ọnu
huchachaa;
sụ: Ọ tọ dụkwa iphe,
dụ ẹji, mu meru.
21 Ọ dụru iphe ẹto,
mgboko l'ophu anọduje
lẹ mkpula anma jiijiijii;
mbụ l'ọ dụru mkpula
iphe ẹno,
mgboko ta adụkpodaa
ike apfụru apfụru ophu.
22 Mbụ lẹ nwata-ozi phelihuru
bya abụru onye eze;
waa l'onye-eswe
wafụru bya enweru nri;
23 nwanyị, a kpọru ashị,
lụru ji;
ọzoo nwamgbọko,
yẹe nemadzụ bu;
ọ kapyabẹ onye ọbu ẹnya.
24 Ọ dụru iphe ẹno, dụ l'eliphe,
ha nwanshịi;
ọle ẹphe mashịru iphe ike.
25 Ndada bụ iphe, e meru dobe
l'eliphe; ọphu ike aduzidu iya;
ọle ẹphe akwajẹ nri
l'ọnanwu dobe,
ẹphe e-ri l'udzumini.
26 Nchi-ọgba bụ iphe,
e meru dobe l'eliphe;
ọphu ọkpehu aduzidu iya;
ọle ẹphe ebvuje
agbara-mkpuma
dozia buru.
27 Igube te enwedu onye-eze;
ọle ẹphe anọduje ephe
l'ọgbo l'ọgbo.
28 Ngwere ta adụdu m'obetaru
ọ bụru ẹka be egude
achị iya; ọphu egude iya;
ọle ọo-nọdujechaa
nọdu l'oke-unuphu ibe eze.
29 Ọ dụru iphe ẹto,
anọduje agụ ije ọgu;
mbụ l'ọ dụru iphe ẹno,
ije iya dụshi ree ike.
30 Oduma bụ iya kachaa ọkpehu
l'iphe, bụ anụ;
ọphu ọ dụdu anụ,
ọogbaru ọso.
31 Ọzo bụ oke-ọku,
azọ pfukangu pfukangu;
mkpi;
yẹe onye eze yẹe ndu
ojọgu iya,
nọ-pheru iya mgburugburu.
32 Ọ -bụru l'i shi mewaa iphe
onye-eswe;
mbụ l'i shi ekutse onwongu;
ọzoo l'ọ dụru idzu ẹjo-iphe,
i shi chịwaa;
dẹkwaa ẹka l'ọnu!
33 Kẹle ọo g'a pyịje ẹra-eswi
meta iya manụ-a;
ọ bụru g'ọ bujeru;
a -swịkpoo imi aswịkpo
l'ọ lwaa mee-a
bụ g'ọ bujeru;
a -kpatsu ẹhu-eghu;
opfu abya.