3
Idzu, aachị-koshi
ụnwokorobya
1 Nwa mu; ta zọhakwa iphe,
mu ezi ngu.
Wochikwaaru iphe ono,
mu sụru g'i mee ono
kwakọbe l'ime obu ngu;
2 kẹle oo-me g'eswe
ndzụ ngu kabaa ogologo;
mbụ l'oo-me l'ị kaa nka;
tẹme l'oo mekwaphọ
g'ẹhu dụ ngu guu.
3 B'ekwekwa gẹ n-yemobu
yẹe ire-lanụ nahụ ngu.
Woru iya tụkpoo l'olu g'ọleka;
l'i woru iya dee pfube
l'ime obu ngu.
4 Ọo ya bụ l'ị bụru onye a-tụba
Chileke yẹle nemadzụ
l'ẹnya;
tẹme l'i nweru ẹpha ọma.
5 Gude obu ngu g'ọ ha
dakobe Chipfu.
Ba chịkwaru ụpfu kwẹe lẹ
nkwamẹnya nkengu.
6 Ị -nọdu emekpọo iphemiphe,
iimekpọo ememe;
nyatajẹ Chipfu;
kẹle ọo ya e-me g'ụzo ngu
pfụru ọto.
7 Ta arịjekwa l'ị maru iphe.
Ọ chịkwa g'ị tsụje Chipfu ebvu;
kpọ-yijeru iphe-ẹji ukuvu.
8 Noo iphe, e-me g'ẹhu dụ
ngu ike;
mee g'ọkpu shihukwa ngu
phọ ike.
9 Gude ẹku ngu; yẹle iphe-mbụ,
ị kpatarụ l'opfu ngu;
kwabẹ Chipfu ùbvù.
10 Ọo ya bụ gẹ nri eji ọba ngu
bushihu ebushihu;
tẹme mẹe ejikwaphọ
mgbaja ngu ejiji.
11 Nwa mu; Chipfu -nọdu abarụ
ngu mba;
b'e wokwaru iya hua l'alị;
ọphu ị dzụrubejekwa
mẹ ọ -nọdu alọ ngu ẹka
lẹ nchị.
12 Kẹle ndu Chipfu ahụ̀je ahụ̀hù
bụ ndu o yeru obu;
ẹgube ono nna, ahụ̀je nwa,
o yeru ẹnya ono.
13 Ẹhu-ụtso bẹ a gọru nụ onye
chọtaru mmamiphe;
mbụ onye natarụ
nkwamẹnya.
14 Kẹle ọ ka mkpọla-ọchaa
aba urwu;
tẹme ọ nọdu anwụta iphe,
ka shii eme l'ọphu
mkpọla-ododo anwụta.
15 Ọ ka mkpuma, aswa dụ
ere ire.
Ọ tọ dụdu iphe, agụ ngu ẹgu
g'i nweru iya mẹ nanụ,
aa-nọdu atụ eyeru iya.
16 Iphe, o gude l'ẹkutara bụ
ndzụ ogologo;
ọphu o gude l'ẹkicha bụru
enweru iphe yẹe
akwabẹ ùbvù.
17 Etso ụzo iya bụ ẹhu-ụtso;
tẹme gbororo iya bụkotaru
ẹhu-guu.
18 Ọ bụ oshi, anụje ndzụ l'ẹhu
ndu nmataru iya akpa.
Ndu tụru iya gburumu l'a-bụru
ndu a gọru ẹhu-ụtso nụ.
19 Ọo mmamiphe bẹ Chipfu
gude tụa ọkpa
mgboko-a l'ophu.
Ọ bụru nkwamẹnya iya bẹ o
gude dobe igwe.
20 Ọ bụru amaru iphe iya bẹ o
gude mee gẹ mini ime
alị nwụshije;
bya emee g'iji shije
l'urwukpu kwaa.
21 Nwa mu; iphe, ii-gudeshi ike
bụ ọkpobe mmamiphe;
yẹle amaru eye ọnu l'opfu.
B'ekwekwa g'ọ nahụ ngu.
22 Ọo ya a-bụru ngu ndzụ;
bya abụru ịyagba, a-tụkpo
ngu l'olu gude mee
l'ị bụru ẹguru.
23 Ọo ya bụ l'iijekpọepho
l'ụzo ngu chiriri werere.
Opfu ta adụdu ngu l'ọkpa.
24 Ị -zẹe azẹe; ndzụ ta agụedu
ngu.
Mbụ-a; mgbẹnya atsọaha
ngu ntụmatu mẹ ị zẹe azẹe.
25 Ẹjo iphe-ẹhuka -tụ ngu l'ụpfu;
b'atsụkwa ebvu!
Ọphu ị tsụkwa iphe, emeje
gẹ ndu ẹjo-iphe bụru
mkpurupyata ebvu mẹ
ọ dapfu ngu!
26 Ọo Chipfu a-bụru agbara-ike
ngu.
Ọo ya bụ l'oo-me g'ị tị
nmalahụ l'ọ́nyà.
27 Ta lọ-phukwa iphe,
dụ ree azụ g'o to rwu ndu
o rwuberu ẹka;
mẹ ọ -dụ ngu l'ẹka ememe.
28 Ọphu ị sụkwa nemadzụ ibe
ngu g'ọ bya echele bya
anata iphe ọ bụ;
l'ẹka ị gbẹkwa gude iphe,
ọ bụ l'ẹka ono.
29 Ta achịjekwaru nemadzụ ibe
ngu ẹjo idzu;
mbụ onye unu l'iya bu
tụsaru ẹhu.
30 Te bokwa nemadzụ ibo eswe;
l'ẹbe abụ l'o mekarụ ngu
iphe.
31 Te kokwaru onye bụepho
iphe ike adụje iya ree
okophoo!
Ọphu ọ dụkwa ụzo iya ọphu
ịi-họta sụ l'ọ dụ ngu ree!
32 Kẹle onye eegudedu ire iya
ẹka dụkwa Chipfu ashị;
obenu l'onye obu iya gụru
ìphóró bẹ amajẹru
iya ime.
33 Chipfu tụakwaru ọnu-ụlo ndu
ẹjo-iphe ọnu;
obenu l'ọonoduje agọ ọnu-ọma
anụ unuphu ndu pfụberekoto.
34 Ndu achị ndu ọzo ọchi bẹ
Chipfu achịlatajekwa;
ọ nọdu emejeru ndu
wozeru onwophẹ alị
eze-iphe-ọma.
35 Ndu maru iphe bẹ okiphe
phẹ bụ akwabẹ ùbvù;
obenu lẹ ndu eswe bẹ
oogbobejeru iphere.