9
1 Ọ dụ g'a sụ l'ishi mu bụ
nggele, mini shi asọshihu.
Ẹnya mu bụru ẹka ẹnya-mini
futaru!
Mu gege anọduepho ara
ẹkwa eswe l'ẹnyashi
k'egbushi,
eegbushi ndibe anyi.
2 Ọ dụ g'a sụ lẹ mu nweru
ẹka ndu ije akwajẹ
l'echiẹgu;
mẹ mu ahaẹpho ndibe
anyi;
mbụ tụgbukpoepho lụfuru
phẹ;
kẹle ẹphe erikọta ogori
g'ẹphe ha;
ndu kụru l'ẹka ono
bụkota ndu egudedu
ire phẹ ẹka.
3 Ẹphe ekweje ire phẹ g'onye
kweru apfụ gude agba
ụka agbagba.
Ọ tọ bụdu ire-lanụ bẹ ẹphe
gude atụ okoo l'alị-a.
“Ẹphe eshije l'eme iphe-ẹji
ọwa-a daba l'eme ọzo;
ọphu ẹphe amadụ onye
mu bụ.”
Nokwa iphe, Chipfu eepfu
bụ ono.
4 Sụ-a; onyenọnu kpakwaru
ndu ẹphe l'iya eshi
ọ̀nyà l'aphara!
Ọphu unu akpọkwaru obu
yeru unwune unu
unwoke; kẹle nwoke,
yẹle nwibe iya bụ
nwune agbakwarụ
iya ẹregede.
Tẹme iphe, bụkpoo onye
unu l'iya eshi ọ̀nyà
bụru onye mgbamu.
5 Ọ̀nyà nọdu agbarụ
onye yẹle iya eshi
ẹregede.
Ọphu ọ dụedu onye
epfuje ire-lanụ.
Ẹphe tụkowaru zia ire
phẹ adzụ ụka.
Ẹphe mewaru iphe-ẹji
jasụ ẹphe tụhu
onwophẹ ayị.
6 Ọ bụepho l'unu bu
l'echilabọ ẹregede.
“Ẹphe gude agba
ẹregede ono jịka
amaru onye mu bụ.”
Nokwa iphe, Chipfu eepfu.
7 Ọo ya bụ lẹ-a; wakwa iphe,
Chipfu, bụ
Ọkalibe-Kakọta-Ike
eepfu baa:
“Lekwa; mu a-hụkwa phẹ
ama; nụchaa phẹ anụcha;
kẹle-a; ?bụbaa gụnu ọzo
bẹ mu e-meba lẹ k'iphe-ẹji,
ndibe mu eme?
8 Ire phẹ bụ apfụ, egbu
egbugbu.
Ẹphe anọduje epfu opfu
l'ẹregede.
Onyemonye nọdu
egudeje ire
mecha-mecha epfu
eyeru nwibe iya;
o bekwanụ l'o gude
obu iya agbaru iya
ọ́nyà.
9 ?Mu ta ahụ̀shi phẹ ahụ̀hù
iphe ono,
ẹphe eme ono tọo?
?Mu te emelatashị phẹ iphe,
ẹphe meru mu;
mbụ ndu alị-a tọo?”
Nokwa iphe, Chipfu eepfu
bụ ono.
10 “Mu a-kwashị ẹnya-mini;
kpọo mkpu-ẹkwa
l'opfu-ẹhu úbvú úbvú.
Mu abya agụa aphụ irwu
ẹswa, dụ l'echiẹgu;
kẹle ọ kpọshihuwaru nkụ;
ọphu ọ dụdu ndu
eshiswetajẹkwadu iya nụ;
ọphu ọ dụedu onye
anụmaje ọ́rà eswi l'ẹka
ono.
Ụnwenu, ephe l'eli
phekashịhuwaru;
ụnwanu gbakashịhu.”
11 Wakwa iphe, Chipfu epfu
baa:
“Jierúsalẹmu bẹ mu e-me
g'ọ bụru ikpọzu;
ẹka nkụta-ọswa e-buru.
Mu jekwa e-mekwaphọ gẹ
mkpụkpu lẹ mkpụkpu,
nọgbaa l'alị ndu Jiuda
bụru ochobu;
k'ọphu bụ l'ọ tọ dụdu onye
ebu iya ebubu.”
12 ?Dẹnu onye bụ nwoke, maru iphe kẹ g'iphe-a doo ya ẹnya? ?Bụ onye bẹ Chipfu ziru iphe k'ọphu bụ l'ọo-dụ ike kọo ya g'o doo ẹnya? ?Bụ gụnu meru g'o gude e mebyishia alị-a woru iya tọgbo ophorokpo g'echiẹgu, a ta adụdu onye aghajẹ iya aghagha?
13 Wakwa iphe, Chipfu epfu baa: “Ọ kwa iphe, kparụ iya nụ bụ l'ẹphe gbadoru eme iphe, mu tụru l'ekemu, bụ ọphu mu tụru doberu phẹ. Ẹphe te emeduru iphe, mu sụru g'ẹphe meje; ọphu ẹphe angaduru nchị l'ekemu mu.
14 Ọ bụ-chiaru iphe, ẹphe jeru etsoru bụ ẹjo ọkpoma phẹ. Ẹphe jeru awata agwọ nshi, bụ Balụ, bụ iphe, ndiche phẹ ziru phẹ.
15 Ọo ya bụ lẹ-a; wakwa iphe, Chipfu, bụ Ọkalibe-Kakọta-Ike eepfu baa; mbụ Chileke kẹ ndu Ízurẹlu: Lekwa; mu e-me ndu-a g'ẹphe ria nri, atsọ ilu. Mu emee phẹ; ẹphe angụa mini, e yeru iphe, egbu egbugbu.
16 Mu a-chịkashi phẹ g'ẹphe dzuru ọhamoha, bụ ẹka ẹphe ta majẹduru; ọphu ndiche phẹ amajẹduru iya. Ọzo bụ l'ọo ogu-echi bẹ mu e-gude chịa phẹ jasụ mu emebyishibẹbe phẹ.”
17 Wakwa iphe, Chipfu,
bụ Ọkalibe-Kakọta-Ike
eepfu baa:
“Unu rịnaa ya arịri nta!
Unu kunaa ụnwanyi,
ákàjẹ́ àkàkà ẹkwa
g'ẹphe bya!
Unu zikwaa g'e kua ndu
ọphu kachaa ara
ẹkwa ẹrengete
g'ẹphe byakwaphọ!”
18 “G'ẹphe bya ẹgwegwa bya
akarụ anyi àkàkà ẹkwa
jasụ ẹnya-mini awata anyi
asọ gborogboro l'ẹnya;
mbụ g'ẹnya-mini nọdu
awụ anyi gbụkugbuku
l'ishishi ẹnya.”
19 Aanụkwa àkàkà-ẹkwa,
aaka lẹ Zayọnu ẹka
ẹphe ara sụ:
“Waa g'e mebyishiru anyi!
Waa g'iphere anyi habe shii!
Anyi hafụtajekwa alị anyi-a
kẹle ụlo anyi bẹ e
mebyishichawaru.”
20 Nta-a bụ lẹ-a; unubẹ
ụnwanyi;
unu nụmakwa
Opfu Chipfu!
Unu saa nchị nụma opfu,
shi iya l'ọnu!
Unu zikwa ụnwada unu
g'aakajẹ àkàkà ẹkwa!
G'onyenọnu zia nwibe iya
g'eechije mkpu ẹkwa!
21 Ọnwu shiwaa lẹ windo-ụlo
anyi pyobata
bya abahụ l'ẹka anyi meru;
ọ ngụru angụru.
Ọ bapfu ụnwegirima l'etsuzọ;
bya emee ọphu
ụnwokorobya
edzukọedu
l'edupfu-ọha.
22 Pfua sụ: “Wakwa iphe,
Chipfu epfu:
Odzu ụnwu-eliphe l'a-daka
gẹ nshị l'ọma-ẹgu;
g'ẹka e gburu ereshi;
ẹswa iya wụshiru;
ọphu ọ dụdu onye
achịkobe iya nụ.”
23 Wakwa iphe, Chipfu epfu
baa:
“G'onye maru iphe te
egudekwa mmamiphe
iya kua onwiya!
Ọphu onye ọkpehu dụ
egudekwa ọkpehu iya
kua onwiya!
Ọphu onye nweru iphe
egudekwa iphe,
o nweru kua onwiya!”
24 Ọchia l'onye achọ aba abaa;
bụ iphe, oo-gude aba
abaa bụ;
lẹ mu doru iya ẹnya;
tẹme ọ maru mu ree;
mbụ maru lẹ mu bụ Chipfu;
lẹ mu emeje iphe-ọma;
bya ekpe ikpe,
pfụru ọto;
bya egoshi lẹ mu
pfụberekoto.
Ọ bụru l'eliphe bẹ mu
emekọta iphe ono;
kẹle ọ bụkota iphe,
ememe iya adụje
mu ree.
Nokwa iphe, Chipfu eepfu.
25 Wakwa iphe, Chipfu epfu baa: “Lekwa; mbọku abyakwa, bụ mbọku, mu a-nụ phẹ aphụ; mbụ ndu e buru úbvú l'ẹhu kpoloko;
26 mbụ ndu Ijiputu; yẹe ndu Jiuda; waa ndu Edọmu; waa ndu Amọnu; waa ndu Mówabu; mẹkpoo iphe, bụkpoo ndu bukọta l'echiẹgu; mbụ ndu akpụje ishi dabunụka iya adabu. Kẹle ọhamoha ono g'ẹphe ha te ebuduru úbvù ililekpọo; tẹme je akpaa lẹ ndu Ízurẹlu l'ọphu te ebukwarụpho úbvù l'ime obu phẹ.”