4
Oku izimanụ alwa azụ
1 Wakwa iphe, Chipfu epfu baa: “Ọ -bụru l'ịi-lwa; gụbe Ízurẹlu; g'ị lwapfutanụ mu! Ọ -bụru l'ịi-tso agwa ono, bụ mu ẹbyi ono ọgu gẹ mu ta ahụmajehe iya; ọphu ị kpa-phuhuẹduru akpaphuhu;
2 tẹme ọ -bụru l'ịi-nọduje egude ire-lanụ; waa ikpe, pfụru ọto; waa apfụbekoto ribua angụ sụ: ‘Eshinu Chipfu nọ ndzụ g'ọ nọ iya-a’ bẹ Chileke e-gude iswi ẹhu iya kebe ọhamoha l'ọma; tẹme ọhamoha ono egude iswi ẹhu iya riaha ùbvù.”
3 Sụ-a; wakwa iphe, Chipfu epfu anụ ndu Jiuda waa ndu Jierúsalẹmu: “Unu kọpyashinaa ẹka a kọduru akọko! Unu ta akụshinu iphe l'ẹgbudu!
4 Unu bunaa onwunu úbvù; buaru iya Chipfu! Unu bunaa onwunu úbvù ime-obu; unubẹ ndu Jiuda yẹe ndu Jierúsalẹmu. Ọdumeka bẹ oke ẹhu-eghu yẹbe Chileke a-gbanwuhukwa tsuaha g'ọku. Ọ bụru iphe, a-kpa iya nụ bụ ẹjo-ememe, unu mewaru. Ọ -wata etsutsu; ta adụkwa onye a-gbanyị iya nụ.”
Ọla-l'iswi, e-shi l'isheli
5 “Unu raa ya arara l'alị ndu
Jiuda!
Unu echia ya lẹ mkpu lẹ
Jierúsalẹmu sụ:
‘Unu gbua opu-ọgu tsoru
alị ndu Ízurẹlu l'ophu!’
Unu rashịa ọ́rà ike sụ:
‘Unu dzukọbe l'ẹka lanụ!
G'anyi gbala laa mkpụkpu,
a kpụ-pheru igbulọ
mgburugburu!’
6 Unu palia ẹkwa-ọhubama
g'e jeshia úbvú Zayọnu!
Unu gbalaa je anọdu ndzụ!
Be ejekpọkwa anmarwụbe;
kẹle mu shikwa l'ụzo
isheli gude ọla-l'iswi abya;
mbụ mgbu-ọnwu, a-dụ ẹjo
ẹji.”
7 Oduma shiakwa
l'ẹpfukala iya wafụta.
Ọla-iphe-l'iswi k'ọha l'ophu bẹ
gbalihuakwaru nụ.
O shiakwa l'ẹka ọ nọ tụgbua
eje g'o mee alị unu ono
g'ọ bụru ochobu.
Mkpụkpu unu a-tụko
bụchaaru ikpọzu;
ọphu ọ dụdu onye bya
l'ebubaru l'ime iya.
8 Ọo ya bụ lẹ-a;
unu yee uwe-aphụ;
raa ẹkwa;
chia mkpu-ẹkwa;
kẹle o-re-phuruphuru,
bụ ẹhu-eghu Chipfu
teke alaphukwa azụ
l'ẹhu anyi.
9 Chipfu sụru-a: “O -rwua mbọku ono bẹ meji a-tọfukwa ndu eze ẹphe lẹ ndu-ishi. Ndzụ-agụgu egude ndu-uke Chileke; ndu mpfuchiru Chileke agbachihuchaa nchi.”
10 Ọ bụru iya bụ; mu sụ: “Haa; gụbe Nnajịuphu, bụ Chipfu; ndu-a ẹphe lẹ ndu Jierúsalẹmu bẹ i dusweakwaru ụzo rengurengu kpọ; kẹle ị sụru phẹ lẹ nchị a-dụkpokwaa phẹ doo. Ọle ogu-echi bẹ a dabẹkwanuru anyi l'ẹkpiri!”
11 O -rwua teke ono bẹ aa-karụ ndu-a ẹphe lẹ ndu Jierúsalẹmu sụ phẹ-a: “Ẹjo phẹrephere, erebushi anụ l'ẹhu, e-shi lẹ nggeregede, nọ l'echiẹgu ono; l'e-zi zipfuta ndibe mu; ọphu ọ bụkwa g'ọ phụchaa phẹ aphụcha ọzoo g'o mechaa phẹ emecha.
12 Phẹrephere ọphu a-ka ono njọ, bẹ l'e-shikwaphọ mụbe Chipfu l'ẹka. Nta-a bụ gẹ mu bya anmaa phẹ ikpe.”
13 Lenu! Ọhogu ọbu l'asọkwa pulapula g'urwukpu abya. Ụgbo-ịnya phẹ nọdu ezi phaaphaaphaa g'oke-phẹrephere abya. Ịnya phẹ kakwa ugo eme ẹgwa. Nshịo anyi! Anyi laakwaru l'iswi!
14 Gụbe Jierúsalẹmu; sashịnaa ẹjo-ememe, nọ ngu l'obu hụma l'aa-dzọta ngu! ?Bụ jasụ teke ole bẹ ịi-ha g'ẹjo ọriri kwaa ngu l'obu?
15 Ọ dụru onye-ozi, shi lẹ mkpụkpu Danu ara iya arara epfu l'ẹjo-iphe byapfutaru alị úbvú úbvú Ifuremu.
16 “Woru iphe-a pfuaru ọhamoha! Raarụ iya ndu Jierúsalẹmu arara; sụ phẹ lẹ ndu ọhogu phẹ shikwa l'alị ẹka dụ ẹnya abya. Ẹphe nọdu echi mkpu-ọgu ekpu mkpụkpu lẹ mkpụkpu, nọgbaa l'alị Jiuda.
17 Ẹphe nọ-phee ya mgburugburu gẹ ndu eche nche l'ẹgu; opfu l'o kwefuru mu ike. Nokwa iphe, Chipfu eepfu.
18 “Ọ kwa umere ngu; yẹe iphe, i gude ẹka ngu meta bẹ lọtaru iphe-a kobe ngu. Ọwaa bụkwa iphe, bẹ eechi ngu. Oomeshikwa ẹhuka ike; tẹme ọ nọdu alọ ẹka lẹ meji!”
Jieremaya agụ aphụ ndibe iya
19 Ẹpho mu-o! Ẹpho mu-o!
Ọolokwa mu ẹka lẹ meji.
Meji edekwa mu kukuku
l'ime mu.
Mu ta adụkwa ike edobe
ọnu doo;
kẹle mu nụmawaru
opu-ọgu.
Mu nụmawaru mkpu,
eechi l'iphu ọgu.
20 Ọla-l'iswi tsopyabẹ ọla-l'iswi.
Alị ono l'ophu bụakwaa
ikpọzu.
Ibe mu g'ọ ha bẹ a
tụkoerupho mebyia
lẹ buregedegengu;
tụko ụlo mu
mebyishia lẹ
ntabu-ẹnya lanụ.
21 ?Bụ jasụ teke ole bẹ mu
a-nọdu ele ọgu ẹnya
l'oophukọ;
mu anụkwapho ẹka
eegbu opu-ọgu?
22 “Ndibe mu bụkwa ndu eswe;
kẹle ẹphe ta amadụ onye
mu bụ.
Ẹphe bụ ụnwegirima,
enwedu egomunggo.
Tẹme ọphu iphe edojedu phẹ
ẹnya.
Iphe, ẹphe maru ẹnya iya bụ
eme ẹjo-ememe;
ọphu ẹphe amadụ eme iphe,
dụ ree.”
23 Mu bya elee ẹnya l'eliphe
mgburugburu;
ọphu o nwedu ụgbugba;
tẹme ọphu ọ dụdu iphe,
dụ iya nụ.
Mu bya elee l'imigwe;
ọphu ọ dụedu ìphóró,
dụ iya nụ.
24 Mu bya elee ẹnya l'eli úbvú
úbvú;
ẹphe tụko anmagbaa
jiijiijii;
obvu obvu nọdu angagbaa
anganga.
25 Mu bya elee ẹnya;
ọphu ọ dụedu nemadzụ,
mu hụmaru.
Iphe, bụkpoo ẹnu,
ephe l'eli tụkowaa
phehuchaa.
26 Mu bya ejeshia ele ẹnya;
alị, e shi emehujẹ iphe
a kọru iya;
bụwaru mgbẹgu-evevee.
Iphe, bụ mkpụkpu,
nọkota iya nụ g'ọ ha
bụkotawaru ikpọzu
l'iphu Chipfu; mbụ l'iphu
o-re-phuruphuru,
bụ ẹhu-eghu iya onoya.
27 Wakwa iphe, Chipfu epfu baa:
“Alị ono l'ophu a-bụkwaru
ikpọzu;
ọle mu tee mebyishibebedu
iya rọ l'ophu.
28 Ọo ya bụ l'eliphe a-gụ aphụ.
Imigwe, nọ l'ephekerephe
agbahụ ọchii;
kẹle mu pfuakwaru iphe,
mu pfuru;
ọphu mu alakwa azụ azụ.
Mu pfuakwaru g'ọo-dụ;
ọphu mu a-ghakwa ẹnya
l'azụ.”
29 Ndu mkpụkpu ono l'ophu
-nụmaepho igiji ndu chị
ịnya abya ọgu;
yẹe ndu chị apfụ abya ọgu;
ẹphe agbalaa je edomigbaa
onwophẹ l'ẹgbudu;
ndu awụba l'ọgba,
dụ l'úbvú je edomishia
onwophẹ.
Ẹphe atụko mkpụkpu phẹ g'ọ
ha gbadogbua gbalaa.
Ọ tọ dụedu ọphu nemadzụ
eburu.
30 ?Bụkwanu gụnu bẹ iime
gụbe ochobu onoya?
?Dẹnu g'o gude i yee uwe,
eke meemee;
tẹme i yee ịyagba,
e meru
lẹ mkpọla-ododo?
?Dẹnu g'o gude i gude iphe
techishia ẹnya?
Akwa, ị kwarụ onwongu
bụkwa kẹ mmanụ.
Ndu gụ l'ẹphe eshi ọ̀nyà
bẹ ị dụkwaa ashị.
Ẹphe gbẹkwanu achọwa
ndzụ ngu.
31 Mu nụmakwaru olu-ẹkwa
onye dụ gẹ nwanyị,
ime eme; mbụ l'ude,
ọotsu dụ gẹ k'onye
ime-ọduu l'eme.
Olu ono bụkwa kẹ Nwada
Zayọnu,
l'eme g'oome tụa unme;
machịru ẹka iya epfu sụ:
“Oowaa! Ike abvụakwaa mu.
Ndzụ mu bẹ e woakwaru nụ
ndu mgbugbụmadzu.”