30
Chileke ekwe ukwe alwalwa ndu Ízurẹlu
1 Wakwa opfu, shi l'ọnu Chipfu rwua Jieremaya nchị.
2 “Wakwa iphe, oopfu; mbụ Chipfu, bụ Chileke kẹ ndu Ízurẹlu: Tụko opfu-a, mu pfuru nụ ngu-a dekọta l'ẹkwo.
3 Kẹle-a: wakwa iphe, Chipfu epfu baa: mbọku abyakwa; teke mu e-je l'ẹka a kpụru ndibe mu lẹ ndzụ laa; mbụ ndibe mu bụ ndu Ízurẹlu ẹphe lẹ ndu Jiuda; je eduphuta phẹ azụ; bya edophu phẹ azụ l'alị ono, mu nụru nna phẹ oche g'ọ bụru nkephẹ ono. Nokwa iphe, Chipfu eepfu.”
4 Wakwa opfu, Chipfu pfuru pfudoru ndu Ízurẹlu ẹphe lẹ ndu Jiuda.
5 “Wakwa iphe, Chipfu epfu
baa:
Anyi anụkwa mkpu,
ẹphe echi;
mbụ ndu ndzụ agụ.
Mbụ l'ọo n-yemebvu dụ;
ọ tọ bụdu nchị-adụ-doo.
6 Jịnaa ajị hụma; nwoke
?ọ tsụje ime nwa?
?Dẹnukwanu g'o gude mu
hụmagba unwoke l'ẹhu
l'ẹhu g'ẹphe chịgbaaru
ẹka kwẹe l'ẹpho gẹ nwanyị,
ime eme;
onyenọnu wochaaru iphu
gbanwụbe ọnwu ọnwu?
7 Tụswekwa! Mbọku ono
a-dụkwa ẹjo ẹji;
k'ọphu bụ l'ọ tọ dụedu
eswe a-dụbaa ẹji g'ọo ya.
Teke ono bẹ oshilọkpa
Jiékọpu e-je iphe-ẹhuka;
obenu l'ee-mechaa
dzọta iya l'ime iya.
8 “Wakwa iphe, oopfu; mbụ Chipfu, bụ Ọkalibe-Kakọta-Ike: O -rwua mbọku ono bẹ mu a-nyakwo agadagba-njịgba ono, nọ phẹ l'olu ono; mu abya atọshia phẹ ẹgbu, e keru phẹ; ọphu ndu ọhozo emebaẹdu phẹ ohu phẹ.
9 Ẹphe a-nọdu ejeru Chipfu, bụ Chileke phẹ ozi; yẹe Dévidi ono, bụ eze phẹ ono, bụ onye mu e-me g'ọ fụtaru phẹ.
10 “Gẹ ndzụ ba agụkwa ngu;
gụbe Jiékọpu, bụ onye-ozi mu!
Nokwa iphe, Chipfu eepfu.
G'e be yekwa ngu ebvu;
gụbe Ízurẹlu;
kẹle-a; lekwa lẹ-a;
mu e-shikwa l'ẹka dụ
ẹnya dzọta ngu.
Mu adzọta ụnwu ngu l'alị
ẹka a kpụru phẹ lẹ
ndzụ laa.
Noo teke Jiékọpu a-lwa azụ
bya anọdu l'ẹhu-guu.
Tẹme ọ tọ dụedu iphe,
byaru emebaa ya nụ;
ọphu ọ dụdu onye
byaru emebaa ya g'ọ
bụru onye ndzụ agụ.
11 Wakwa iphe, Chipfu epfu baa:
Mu nọkwa swiru ngu eswiru;
mu a-dzọ ngu!
A makwarụ-a lẹ mu tụkoru
ọhamoha emebyishibẹbe,
bụ ndu mu shi woru
ngu ghakaa l'ime phẹ.
Obenu lẹ mu tee
mebyishibẹbedu ngu
gberegedege.
Mu a-hụ̀ ngu ahụ̀hù l'ụzo,
pfụru nhamụnha.
Ọphu mu ahakwanụ ngu
phuruphuru gẹ mu
ta anụ ngu aphụ l'ophu
l'ophu.”
12 Wakwa iphe, Chipfu epfu
baa:
Onwo, aba ngu nụ bẹ e tee
metakwa emeta.
Ọphu iphe, e mekarụ ngu
akpọhudu akpọhu.
13 Ọ tọ dụdu onye a-gbaru
ngu ọdzori.
Ọphu ọ dụdu iphe ọzo,
ee-mebaa l'ọ́nyá ọbu,
aba ngu nụ ọbu.
Ọphu ịi-kaẹdu mma akaka.
14 Iphe, bụkpoo ndu gụ
l'ẹphe shi eshi ọ̀nyà
zọhakotawaru ngu.
Ẹphe ta akpaẹdu ngu ishi
ililekpọo.
Mu tsuwaru ngu iphe,
onye ọhogu etsuje
ọhogu iya.
Mu bya echia ngu iphe,
onye dụru nemadzụ
ẹhuka echije iya.
Ọ bụru iphe, kparụ iya
nụ bụ l'i menụkaru
ẹjo-iphe.
Tẹme iphe-ẹji, i meshiru
paa igwerigwe.
15 ?Dẹnu g'o gude ị nọdu ara
ẹkwa iphe, mekarụ ngu nụ;
mbụ iphe, eme ngu ẹhuka,
bụ iphe,
taa kpọhudu akpọhu?
Ọ kwa l'ị metanụkaru
iphe-ụta; tẹme iphe-ẹji,
i meshiru paa igwerigwe;
meru g'o gude mu mee
ngu iphemiphe ono.
16 Obenu l'iphe, bụkpoo
ndu eripya ngu bẹ
ee-ripyakwa.
Iphe, bụkpoo ndu ọhogu
ngu bẹ aa-kpụ lẹ ndzụ.
Ndu kwarụ iphe ngu
l'ọkwata bẹ
aa-kwakwaphọ ọkwata.
Ndu keru iphe ngu l'ọgu
bẹ ee-kekwaphọ iphe
phẹ l'ọgu.
17 Obenu lẹ mu e-me g'ẹhu dụ
ngu ike;
mee g'ọ́nyá, dụ ngu l'ẹhu
kpọhu.
Nokwa iphe, Chipfu eepfu.
Ọ bụru iphe, kparụ iya
nụ bụ l'e kuru ngu
onye a chịfuru achịfu;
Zayọnu, adụedu onye
akpa ishi iya.
18 “Wakwa iphe, Chipfu epfu
baa:
Ọnu-ụlo Jiékọpu ono,
e shi kpụa lẹ ndzụ ono
bẹ mu e-dophu azụ l'ọnodu
iya.
Mu aphụaru ẹka ẹphe bu
obu-imemini.
Mkpụkpu ono bẹ aa-kpụ-phu
azụ l'eli ọzu iya ono.
Ibe eze ono abyakwa
anọ-chia l'ẹka ọ gbaru
g'ọ nọdu.
19 Ẹphe awata agụ ebvu-ekele;
atụ ụzu ẹhu-ụtso.
Mu emee g'ẹphe kabaa igwe;
ọphu ẹphe abyadụ alwa
alị alị.
Mu e-me g'ẹphe bụru ndu
aakwabẹ ùbvù;
ọphu ẹnya abyadụ alwa phẹ.
20 Ụnwu phẹ bụ g'ẹphe shi
dụ teke ndiche bụ
g'ẹphe a-dụ.
Tẹme edzudzu-ọha abụru
iphe, ngụchaaru
angụru l'iphu mu.
Mu anụa ndu eme phẹ ewere
aphụ.
21 Onye eze phẹ a-bụru onye
lanụ l'ime ndibe phẹ.
Onye a-bụru onye-ishi phẹ
abụru l'echilabọ phẹ bẹ
oo-shi.
Mu a-kpụritaru iya;
l'ọobya anọdu mu ntse;
kẹle-a: ?bụ onye sụru
g'oo-dobe onwiya iche
bya bya anọdu mu l'iphu?
Ọ kwa Chipfu epfu iya.
22 Ọo ya bụ l'unu a-bụru ndibe
mu;
mu abụru Chileke unu.”
23 Lekwa! Chipfu gudeakwa ẹhu-eghu ezi oke-phẹrephere; mbụ ẹjo oke phẹrephere. Ọ bụru l'ishi ndu ẹjo-iphe bẹ ọophu temutemu;
24 ọphu ẹhu eghubuhukwa Chipfu eghu gbiriri jasụ l'o meẹbekota iphe, dụ iya l'ọkpoma k'ememe. Mbọku abya-a l'ụzo iphu teke iphe-a l'e-dokọta unu ẹnya ree.