14
Anwụ a-kpọbe; ụnwu abya; ogu-echi etso iya
1 Wakwa opfu, Chipfu pfuru Jieremaya k'anwụ-akpọbe ono:
2 “Ndu Jiuda agụkwa aphụ.
Mkpụkpu, nọkota iya nụ
gbajọshihukota
agbajọshihu.
Ẹphe nọdu ara ẹkwa l'opfu
ẹhu alị-a.
Tẹme a nọdu echikwaphọ
mkpu lẹ Jierúsalẹmu.
3 Ndu a maru ẹpha phẹ ziru
ndu-ozi phẹ g'ẹphe je
ekuta mini.
Ẹphe je l'obvu-mini;
ọphu ọ dụdu mini,
dụ iya nụ.
Ẹphe parụ ite phẹ
l'ophorokpo lwa.
Iphere dụ phẹ;
tẹme meji tọfuwa
phẹ.
Ẹphe woru iphe kpuchia ishi
l'ẹka iphere dụ phẹ.
4 Alị gbaakwaru ọru;
kẹle igwe te edzeduru mini
wụshi iya.
Iphere gude ndu akọ opfu.
Ẹphe woru ẹka kpubegbaa
l'iphu.
5 Mbụ je akpachaa lẹ ne ele,
bu l'ẹgu
gbaghachaaru ụnwu,
ọ nwụru k'ọ̀phúú;
ẹka ọ tọ hụmaduru ẹswa,
ọo-ta.
6 Nkapfụ-ịgara-ọswa pfụchaaru
lẹ nggeregede
atụ phẹpfuphepfu gẹ
nkụta-ọswa.
Ẹnya gbahụkota phẹ ọchii
kẹle ọ tọ dụdu ẹka ẹphe
a-nọdu taa nri.”
7 “A makwarụ-a l'iphe-ẹji,
anyi meru agba anyi ekebe;
ọle gụbe Chipfu;
menaa iphe;
g'ẹpha ngu apfụru;
kẹle anyi lawarụ azụ lamihu;
tẹme anyi mewaa ngu
iphe-ẹji.
8 Gụbe onye bụ ngu bụ ẹka
ẹnya ndu Ízurẹlu dụ;
onye adzọtaje phẹ
nụ m'ẹphe -nọdu
eje iphe-ẹhuka.
?Dẹnu g'o gude ị bya adụ
g'ị byaru abyabya l'alị-a?
Mbụ ị bya adụ g'onye ije,
l'a-nọ ẹnyashi lanụ
kpoloko.
9 ?Dẹnu g'o gude ị dụ gẹ
nwoke, a tụru l'ụpfu;
g'onye ike ọgu dụ;
obenu l'ike ta adụedu
iya kẹ g'ọ dzọo ndzụ?
Gụbe Chipfu;
anyi lẹ ngu tụkonuru
nọdu.
Tẹme anyi nọdu aza
ẹpha alaru ngu.
Ta agbadoshinu anyi!”
10 Wakwa iphe, Chipfu epfu l'opfu ẹhu ndu-a: “Iphe, adụje phẹ ree shii bụ aghaphe. Ẹphe te esedejedu ọkpa phẹ. Ọo ya bụ lẹ mu taa natadụ phẹ. Ọo nta-a bẹ ọobya anyata ẹjo-iphe ono, ẹphe megbabẹru ono; bya ahụ̀a phẹ ahụ̀hù k'iphe-ẹji, ẹphe meru.”
11 No iya; Chipfu bya asụ mu: “Te pfukwa g'ọ dụru ndu-a lẹ ree.
12 A makwarụ-a l'ẹphe aswịjeru Chileke ẹgu; obekwanu lẹ mu ta angadu nchị l'ẹkwa, ẹphe ara. A makwarụ-a l'ẹphe egweru mu ngwẹja-akpọ-ọku; bya egwekwaru mu phọ ngwẹja-nri. Obenu lẹ mu taa natadụ iya. Ọ bụ-chia iphe, mu e-me bụ lẹ mu e-gude ogu-echi mebyishia ndu-a. Mu egude ọkpa-nri; yẹe ẹjo iphe-ememe mebyikwaa phẹ phọ.”
13 Ọ bụru iya bụ lẹ mu asụ: “Gụbe Nnajịuphu, bụ Chipfu; ndu mpfuchiru Chileke anọdujeekwapho epfuru phẹ sụ phẹ l'ẹphe taa ahụmakwa ogu-echi ahụma ophu; ọphu ẹgu emekwa phẹ. Mbụ lẹ gụbe Chileke e-me gẹ nchị dụ phẹ doo nọo ọdu l'alị-a.”
14 Tọbudu iya bụ; Chipfu byakwa bya asụ mu: “Ndu mpfuchiru ono gudekwa ẹpha mu adzụ ụka. Ọ tọ bụkwa mbẹdua ziru phẹ g'ẹphe bya; ọphu ọ bụkwa mbẹdua tụru phẹ ẹka; ọphu ọ dụkwa iphe, mu pfuru nụ phẹ. Mpfuchiru, ẹphe epfu anụ ngu bụ ọphulenya ẹregede. Ẹphe nọdu agba ẹja, adụdu iphe, ọ bụ; yẹe iphe, ẹphe rịtaru l'ọkpoma phẹ.
15 Ọo ya bụ lẹ-a; wakwa iphe, Chipfu epfu l'opfu ẹhu ndu mpfuchiru ono, gude ẹpha mu epfu ono; mbụ ndu abụdu mbẹdua ziru phẹ g'ẹphe je; ẹphe je anọdu epfu sụ l'ọ tọ dụdu ogu-echi; ọzoo ẹgu, byaru edenyi ndu alị-a ẹka. Ndu mpfuchiru ono l'onwophẹ bẹ bụ-a ogu-echi ono; yẹe ọkpa-nri ono e-mechaa mee g'ẹphe laa l'iswi.
16 Tẹme ndu ono, ẹphe epfu anụ ono bẹ ee-mechaa tuphaa etuphaa l'ọma gbororo Jierúsalẹmu; ọ bụru iphe, a-kpa iya nụ bụ ọkpa-nri ono; yẹe ogu-echi ono. Ọphu ọ dụdu onye a-dụkwadunu kẹ g'o lia phẹ elili; ọzoo lia nyee phẹ; ọzoo nwa phẹ nwoke mẹ kẹ nwanyị. Aphụ, rwuberu phẹ nụ bẹ mu a-wụ phẹ l'ẹhu.”
17 Ọo ya bụ lẹ-a; pfuru iphe-a
yeru phẹ:
“G'ẹnya-mini sọkwa mu
gborogboro l'ẹnya
eswe l'ẹnyashi
mkpụrumkpuru.
Ndu mu a-nọdu araru ẹkwa
ono bụru nwada mu
ono,
adụdu nwoke jepfujeru
iya nụ ono;
mbụ ndibe mu ono;
kẹle onwo,
aba phẹ nụ dụ ẹjo ẹji.
Ọ bụru pyaapyaa bẹ e chiru
iya.
18 Teke mu bamiru l'ime
ọha ono;
mu ahụma odzu ndu e
gude ogu-echi gbua.
Teke mu bahụru lẹ mkpụkpu
phẹ; mu ahụma iphe,
ọkpa-nri mebyishiru.
Ndu uke mẹ ndu mpfuchiru
Chileke tụkoakwaru
lashịa alị ẹka ẹphe amadụ.”
19 ?Ọ dụ g'ị jịkawaru Jiuda
jịkaghaa tọo?
?Tọ dụedu iphe, ị gụberu
Zayọnu tọo?
?Dẹnu g'o gude i meka anyi
iphe, ta akpọhudu
akpọhu?
Anyi leru ẹnya nchị-adụ-doo;
ọphu ọ dụdu iphe,
dụ ree byaru anyi.
Anyi lee ẹnya teke ee-me
g'ẹhu dụ anyi ike.
Ọ bụerupho ebvu bẹ a gbẹnu
eye anyi.
20 Gụbe Chipfu; ẹjo-iphe,
anyi emegbabẹ rwuakwaru
anyi l'ẹhu; yẹe ikpe,
nmarụ nna anyi oche
phẹ.
Anyi meakwaru ngu iphe-ẹji
eviya kpọ.
21 Jiko ta agbadokwa anyi;
g'ẹpha ngu apfụru!
Te ewokwaru aba-eze ngu ono,
dụ biribiri ono hua
l'alị!
Nyatakwa ọgbandzu anyi
lẹ ngu!
Te emebyikwa iya!
22 ?O nweru nshi nshi ono,
nọgbaa l'ọhamoha ono,
adụdu iphe, ọ bụgbaa ono;
?o nweru ọphu adụje ike
dzee mini?
Mbụ-a ?bụkponu igwe
alwajẹ g'ọ ka mma l'ọo
yẹgeyege mini?
Waawakwa. Ọo gụbedua;
mbụ gụbe Chipfu,
bụ Chileke anyi.
Ọo ngu bụ ẹka ẹnya dụ anyi;
kẹle ọo ngu emekọta
iphemiphe ono.