12
Jieremaya agụ aphụ
1 Gụbe Chipfu; ọ tọ dụdu
teke ị bụedupho onye
pfụberekoto;
jasụkpoo lẹ gẹ mu echi
ngu opfu-a.
Ọle ọ bụ; mu e-pfukwaru ngu
phọ k'ikpe, pfụru ọto,
iikpeje.
Sụa; ?bụ gụnu kparụ iphe,
ụpete agbaru ndu
ẹjo-iphe l'ụzo phẹ?
Mbụ-a; ?bụ gụnu kparụ iphe,
ẹhu adụje ndu e gudedu
ire phẹ ẹka guu?
2 Ọo ngu dzarụ phẹ;
ẹphe gbaa ọgbarabvu;
bya evua mịahaa amịmi.
Ẹphe akpụjeru ngu l'ọnu
tekenteke.
Obenu l'o to rwujedu phẹ l'obu.
3 Obenu lẹ mbẹdua bẹ gụbe
Chipfu maru.
Ịihumaje mu; tẹme ị nọdu
enyochajẹ ọriri,
mu arịru ngu enyocha.
Kpụtanu phẹ kpụfu g'atụru,
a kpụ eje egbugbu!
Wonụru phẹ dobe iche
kwabẹru mbọku,
aa-phụ phẹ!
4 ?Bụ jasụ teke ole bẹ alị a-gụ
aphụ gụ-beru; mbụ ẹswa,
nọgbaa l'alị
akpọshihukota nkụ?
Ọ bụru iphe, kparụ iya nụ bụ
lẹ ndu bu iya nụ bụ
ndu eme ẹjo-iphe;
o mee ụnwu anụ mẹ ụnwu
ẹnu; ẹphe lakọta l'iswi.
Ọphu kachaakpọnu bụ lẹ
ndu ono bụ iphe,
ẹphe epfu bụ:
“Ọ tọo hụmakwa iphe,
e-mechaa mee anyi.”
Ọnu, Chileke yeru
5 “Ọ -bụru lẹ gụ lẹ ndu gude
ọkpa gbaru ọso;
ẹphe lọo ngu phelephele;
bụ-chia ndu ọphu gude
ịnya bẹ gụ l'ẹphe sụru
atụtu?
Ọzo bụ lẹ-a; ọ -bụru l'ụpfu
adụ ngu l'alị,
adụdu iphe dụ iya nụ;
?dẹnu g'ii-shi mekọta
iya l'ọswa ono,
nọ lẹ mgboru ẹnyimu
Jiọ́danu ono?
6 Mbụ-a; unwune ngu nwoke;
mbụ ndu unu ẹphe shi
l'unuphu lanụ;
ẹphebedua deru ngu
ye g'e gbua.
Ẹphe woliru olu ara g'e mee
ngu iphe,
a-tsụru ngu nụ.
Ba adakobekwa phẹ;
m'obeta ẹphe nọdu
epfuru ngu opfu
ọma!”
7 “Mu gbadowaru ndu ọnu-ụlo mu.
Mu gwọbewaru ndu ono,
bụ okiphe mu ono.
Ndu ono, dụ mu l'obu ono
bẹ mu yeakwaru l'ẹka
ndu ọhogu phẹ.
8 Okiphe mụbe Chileke ono
byaakwaru bya adụ
mu g'oduma, bu l'ọswa.
Ọonoduje agbọru mu ụja.
Ọ bụru iphe ono meru
g'o gude ọ dụ mu ashị.
9 Ndu ono, bụ okiphe mu ono;
dụwaa mu g'ẹnu,
vọru kịdikidi,
bụ ẹnu, erije anụ ẹnu ọzo;
ụnwu-ẹnu ọzo
erijekwaphọ anụ ibiya
nọ-phee ya mgburugburu
abya iya etso ọgu.
Ẹphe je atụko iphe,
bụkpoo anụ,
bu l'ẹgbudu rwukọo
g'ẹphe bya avụa anụ
iya kpatakpata!
10 Ikpoto ndu eche atụru
mebyishiwaru
opfu-vayịnu mu.
Tẹme ẹphe gude ọkpa zọo
opfu mu pyakapyaka.
Ẹguru opfu mu ono bẹ
ẹphe meru;
ọ bụru echiẹgu,
dabyiru kẹ mmanụ.
11 E meru iya; ọ bụru
okorobo-ẹgu.
Eshinu ọ bụ okorobo-ẹgu;
ọ gụahaa aphụ
rakuahaa mu.
Mbụ l'alị ono l'ophu bẹ
e meru;
ọ bụru okorobo-ẹgu;
ọphu ọ dụdu onye
akpa iya ishi.
12 Ndu mgbupya zeru
gbiigbiigbi bya
asọpyabe nggeregede,
nọgbaa l'echiẹgu.
Ogu-echi Chipfu e-shi l'ishi
alị-a ishi lanụ sụa
nemadzụ pyaapyaa
jasụ l'ishi iya ọphuu;
ọphu ọ dụdu m'onye lanụ,
ẹhu adụ guu.
13 Ẹphe kụru witi; ọle iphe,
ẹphe mechaarụ kpata
bụ obvu obvu.
Ẹphe sekashịru onwophẹ
l'akanya;
ọle ọ tọ dụdu iphe,
ẹphe setarụ.
Iphere iphe, ẹphe kpatarụ
l'opfu phẹ nọdu
adụje phẹ.
Ọ bụru ẹka ẹhu eghu Chipfu
eghu.”
14 Wakwa iphe, Chipfu epfu baa: “Ọ -bụru kẹ ndu iwe ono, bụ obutobu mu ono g'ẹphe ha; mbụ ndu ono, denyiru ẹka l'okiphe, mu hẹru ndibe mu, bụ ndu Ízurẹlu g'ọ bụru okiphe phẹ ono; lekwa lẹ ndu ono bẹ mu e-phefu ephefu l'alị phẹ. Mu abyakwaphọ ephefu ndu Jiuda g'ẹphe ba nọhe l'echilabọ phẹ.
15 Teke mu phefuchaẹru phẹ phọ; mu abya aphụaru phẹ obu-imemini; duphutachaa phẹ azụ nanụnanu g'ẹphe haa; g'ẹphe lwaphuta azụ l'okiphe phẹ ono;
16 gude ẹpha mu riaha angụ sụ: ‘Eshinu Chipfu nọ ndzụ g'ọ nọ iya-a’; ẹgube ono, ẹphe shiwaa zia ndibe mu ẹphe shi egudeje agwa, bụ Balụ eri angụ ono; bẹ ẹphe a-ngụkwaru angụru l'echilabọ ndibe mu.
17 Obenu teke ọ bụ l'o nweru ọha, ete ekwedu ngabẹ nchị bẹ mu e-phefukpọe phẹ phọ rengurengu woru phẹ mebyishia. Nokwa iphe, Chipfu eepfu.”