3
Ikpe, ee-kpe ọhamoha
1 “Kẹle-a; o -rwuẹpho lẹ
mbọku ono,
bụ teke mu e-dophu ndu
Jiuda ẹphe lẹ ndu
Jierúsalẹmu azụ
l'ọnodu phẹ;
2 bẹ mu a-chịkobe ọhamoha
tụko g'ẹphe ha chịta
jeshia lẹ nsụda
Jiehoshafatu.
Noo ẹka mu a-nọdu kpee phẹ
ikpe;
ikpe ẹhu ndu ono,
bụ okiphe mu ono;
mbụ ndibe mu,
bụ ndu Ízurẹlu;
kẹle ẹphe chịkaru ndibe
mu; ẹphe dzuru
ọhamoha;
bya eworu alị mu kekashịa.
3 Ẹphe tụaru ndibe mu
ono ido;
bya achịta ụnwu phẹ
ụnwu-okoro
gude je agbanweta
ụnwanyi-ụkpara;
bya achịta ụnwu phẹ
ụnwumgboko reshia
gude gaa mẹe ngụa.
4 “Sụ-a; ?bụ gụnu bẹ unu a-gụru nụ mu; unubẹ ndu mkpụkpu Taya yẹe ndu mkpụkpu Sayịdonu; mẹkpoo unubẹ ndu bukọta l'alị ndu Filisitayinu l'ophu? ?Bụ iphe, mu meru bẹ unu apfụ mu ụgwo iya tọo? Ọ -bụru l'ọo ụgwo bẹ unu apfụ mu bẹ mu e-kwo-a gburumu mee ẹgwegwa woru iphe, unu meru tukobe unu l'ishi;
5 kẹle unu wotaru mkpọla-ọchaa mu; yẹe mkpọla-ododo mu bya atụko ẹku mu ndu ọphu kachaa ama mma vuta je akụbe l'ụlo nshi unu.
6 Unu woru ndu Jiuda yẹe ndu Jierúsalẹmu ree ndu Gurisu g'ee-shi g'unu mee g'ẹphe nọdu ẹnya l'oke alị ẹka ẹphe shi.
7 “Lekwa; mu e-mechakwaa je achịfuta phẹ l'ẹka ono, unu chịru phẹ je eree ono. Mu ewophutakwanụ iphe, unu meru azụ bya atukobe unu l'ishi.
8 Mu a-chịta ụnwu unu unwoke mẹ ụnwu unu ụnwanyi chịru reshia ndu Jiuda; ẹphe achịta phẹ ree ndu Seba; mbụ ọha kwata dụkpoo ẹnya ọkpobe adụdu.” Ọ kwa Chipfu bẹ pfuru iphe ono.
9 Unu woru iphe-a pfuaru
ọhamoha: Unu
kwakọbekwa k'ọgu!
Unu mekwaa gẹ ndu ike ọgu
dụ tsulihu!
G'iphe, bụkpoo ndu alwụje
ọgu kpịritakwaru ntse
bya awata alwụ ọgu!
10 Unu kpụkwaa ọ́gù unu g'ọ
bụgbaaru ogu-echi!
Unu akpụa nwọkarara unu
g'ọ bụru arwa!
G'onye ike bvụru pfukwaa sụ:
“Mu bụakwaa onye
ọkpehu dụshi ike!”
11 Unu dzukọbe ẹgwegwa;
unubẹ ọhamoha l'ophu!
Unu shikpọo l'ẹkameka bya
edzukọbe l'ẹka ono!
Gụbe Chipfu;
menaa gẹ ndibe ngu,
bụ ndu ike dụ shi
l'imigwe lwazeta l'alị!
12 “G'ọhamoha tsulihunu!
G'ẹphe zenuru jeshia
lẹ nsụda Jiehoshafatu;
kẹle ọo l'ẹka ono bẹ mu
a-nọdu kpee ọhamoha
mgburugburu ikpe.
13 Unu watanụ egbu mma unu
swịiswiiswii; kẹle iphe,
a kụru l'opfu chawaru.
Unu bya azọshia akpụru
vayịnu ọbu;
kẹle ẹka aakụje mẹe
jiwaru.
Nsụkutu iya jiwaru ejiji;
kẹle ẹjo-ememe,
phẹ parụ ẹka.”
14 “Igwe-ọha; igwe-ọha kụru lẹ
nsụda,
aanọduje pfua opfu pfukaha;
kẹle mbọku kẹ Chipfu
dụkwaa ntse lẹ nsụda,
aanọduje pfua opfu
pfukaha.
15 Ẹnyanwu yẹe ọnwa bẹ ee-me
g'ọ gbaa ọchii.
Ọphu kpokpode ekehẹdu
paapaapa.
16 Chipfu a-gbẹ l'úbvú Zayọnu
sụa ekiri;
nọdukwapho lẹ
Jierúsalẹmu dee ririri.
Eliphe yẹe akpaminigwe
anmaa jiijiijii.
Obenu lẹ Chipfu a-bụru onye
ndibe iya a-gbabẹje lẹ
mkpula je anọdu
zee ndzụ.
Mbụ l'ọo-bụru ụlo,
a kpụshiru ike doberu
ụnwu Ízurẹlu.”
Iphe-ọma ndu kẹ Chileke
17 Noo teke unu a-maru l'ọo
mbẹdua bụ Chipfu bya
abụru Chileke unu;
lẹ mu bu ebubu l'úbvú
Zayọnu; mbụ úbvú ono,
dụru mu nsọ ono.
Noo teke Jierúsalẹmu a-dụ nsọ;
ọphu ndu ọhozo agbabaẹdu
iya ophorokpo.
18 “O -rwua mbọku ono bẹ
úbvú úbvú a-nọdu
asọshi mẹe ọ̀phúú.
Eli obvu obvu asọshi
mini-ẹra-eswi.
Mini atụko asọshigbaa l'iphe,
bụkpoo nggele,
dụkota l'alị Jiuda.
Ọgba-mini agbafuhu shi
l'eze-ụlo Chipfu wata asọ
gborogboro je agbaa
mini lẹ nsụda Shitimu.
19 Obenu l'alị ndu Ijiputu
a-bụru ochobu.
Alị ndu Edọmu abụru
echiẹgu,
dabyiru kẹ mmanụ.
Ọ bụru iphe, a-kpa iya nụ bụ
iwashị, ẹphe weru ndu
Jiuda,
bụ ndu ẹphe nọ l'alị phẹ
gbushia ndu adụdu iphe,
ẹphe meru.
20 Obenu lẹ ndu Jiuda e-buru
l'alị phẹ jasụ l'ojejoje.
L'e buru lẹ Jierúsalẹmu;
e -shi l'ọgbo sweru ọgbo.
21 Noo teke mu a-gụru phẹ nvụ
l'ikpe-ọchi
ọphu mu te eshidu
gụhawaru phẹ nvụ
iya.”
“Chipfu bu l'úbvú Zayọnu!”