54
Obu, Chipfu yeru Jierúsalẹmu
1 “Gụa ebvu; gụbe nwanyị,
ta atsụdu ime!
Mbụ gụbe onye teke
ezedaswee nwa.
Chikpọta ebvu!
Rwua gerwugerwu;
mbụ gụbe onye ono,
ime teke emeswee ono;
kẹle ụnwu gụbe nwanyị,
dabyiru mgbegere
a-kakwa shii eme
l'ụnwu nwanyị alụ ji.”
Nokwa iphe, Chipfu eepfu.
2 Phọribekwaru ụlo-ẹkwa,
i bu ebubu g'ọ ka ọsa!
Mee g'ẹkwa, e gude mee
ụlo ngu ọbu ha
phalaphala;
ba lọ-phukwa iya azụ!
Mekwaa g'eri iya kabaa
ogologo!
Mekwaa g'abara iya kabaa
angụru angụru!
3 Noo kẹle ii-mechaa jaa àjàjà
buru laa l'ẹkutara
buru laa l'ẹkicha.
Awa ngu phẹ l'a-naphuchaa
ọhamoha ono azụ;
je ebuchishichaa mkpụkpu
phẹ ono,
bụgbaa ochobu ono.
4 Gẹ ndzụ ba agụkwa ngu!
E tee mekwa ngu
iphe-iphere.
Gẹ ndzụ ba agụkwa ngu
k'a nọnyaa e kpua
ngu iphu lẹ ntụ!
Kẹle a ta abyadụ eme
ngu iphe-iphere.
Ii-mecha zọhachaa iphere
ono,
meru ngu teke ị bụ
ọgbolanu ono;
ọphu ị byadu anyatabaa
mkpatsu aphụ,
dụ l'abụ onye ji iya
nwụhuru;
5 kẹle ọo onye ono meru ngu
nụ ono bụ ji, alụ ngu nụ.
Chipfu,
bụ Ọkalibe-Kakọta-Ike
bụ ẹpha iya.
Ọ kwa Onye nsọ kẹ ndu
Ízurẹlu ono bụ onye
gbatarụ ngu nụ.
Iphe, eekuje iya bụ Chileke
kẹ mgboko l'ophu.
6 “Kẹle Chipfu ono e-kuphu
ngu azụ;
g'ị bụ nwanyị, aalụ alụlu,
a tọgboru mgbegere;
ọphu obu adụdu iya ree;
mbụ nwanyị,
a lụru teke ọ bụ nwata;
ji iya parụ iya haa.”
Nokwa iphe, Chileke ngu epfu.
7 “Mu harụ ngu kpọo nwụpfu
nwanshịi;
ọle mu a-phụkwanuru ngu
eze obu-imemini gude
duphuta ngu azụ.
8 Ẹhu ghuru mu eghu nwanshịi.
Mu woru iphu mu
domiaru ngu kpọo
nwụpfu nwanshịi.
Obenu lẹ mu e-ye ngu obu
ojejoje gude phụaru
ngu obu-imemini.”
Nokwa iphe, oopfu;
mbụ Chipfu,
bụkwapho onye agbafụtaje
ngu.
9 “L'ẹhu nkemu bẹ ọwa-a
dụkwaa gẹ teke kẹ
Nuwa,
bụ teke mu riru nte sụ l'utso,
dụ teke ono taa dụbaedu
lẹ mgboko ọzobaa.
Nta-a bẹ mu riwaru nte sụ
l'ẹhu tee ghubaẹdu mu
eghu l'opfu ẹhu ngu;
ọphu mu ababaẹduru
ngu mba ọzo.
10 O -betakpọ úbvú l'ophu
nmakọta jiijiijii;
a pashịa obvu obvu,
l'ẹka ẹphe nọgbaa;
bẹ n-yemobu ojejoje ono,
mu yeru ngu ono ta
aphọngakwa aphọnga;
ọphu ọgbandzu
ẹhu-guu nkemu ono
egbukahụkwa egbukahụ.”
Nokwa iphe, oopfu;
mbụ Chipfu ono,
aphụru ngu obu-imemini
ono.
11 Gụbe mkpụkpu ono,
eje iphe-ẹhuka ono,
oke phẹrephere enwunga;
ọphu ọ dụdu onye
agbaru ngu mkpu;
mu e-gude mkpuma,
amashị mma ike
kpụ-phu ngu azụ.
Mu egude mkpuma sáfàyà
tụ-phu ọkpa-ụlo
igbulọ ngu azụ.
12 Mu e-me g'eli igbulọ
ngu ono g'ọ ha
bụkotaru
mkpuma rubi.
Mu egude mkpuma,
aphụ ngerengere,
gude kpụa ọnu-abata
ngu;
gude mkpuma,
vu oke aswa kpụkota
igbulọ ngu l'ophu.
13 Ụnwegirima ngu g'ẹphe ha
bụ mụbe Chipfu e-zi
phẹ iphe l'onwomu.
Tẹme ụnwu ngu bẹ ẹhu
a-dụkpoo guu mebyi
adụdu.
14 Ee-me g'ị ngụru angụru l'ụzo,
pfụru ọto.
Ọ tọ dụdu onye byaru eme
ngu mmegbu;
ọphu ọ dụdu iphe,
byaru eme ngu g'ị
tsụa ebvu.
Ndzụ-agụgu bẹ ee-wofu
l'ẹka ị nọ je edobe ụzenya;
ọphu ọobyadu ngu
ntse ililekpọo.
15 O -nweru onye tsoru ngu
opfu;
ọ tọ bụduru mu bẹ o
shi l'ẹka.
Onye etso ngu opfu bụ:
o -mechaa l'o yeru
ngu ẹka l'alị.
16 “Tii ledu; ọ kwa mbẹdua
meru onye-ụ́zú ono,
anmajẹ eko l'icheku
jasụ l'o nwuhu ọku ono;
gude iya kpụa ngwa
ọgu l'ọ dụ k'egude
alwụ ọgu.
Tẹme ọ bụkwarupho mbẹdua
meru onye mmebyi g'o
mebyishia iphe.
17 Ọ tọ dụkwa iphe,
a kpụru g'e
gude meka ngu iphe,
byaru evujeru ire.
Tẹme iphe, bụkpoo onye ebo
ngu ibo bẹ ire
a-gwọje ẹji.
Nokwa iphe, ndu-ozi kẹ
mụbe Chipfu eketa
l'ẹka mu.
Tẹme ọ bụkwarupho ono
bụ ọdzori;
mu nọdu agbaru phẹ iya.”
Nokwa iphe, Chipfu eepfu.