38
Iphe-ememe guderu Hezekáya
(2Ndu 20:1-11)
1 Ọ bụru teke ono bẹ iphe-ememe guderu Hezekáya; k'ọphu bụ l'ọ nọwaa l'ọnu ọnwu. Onye mpfuchiru Chileke, bụ Azáya; nwa Emọzu bya ejepfu iya je asụ iya: Chipfu sụru-a: “Dozia ibe ngu ree; kẹle ịibyawa anwụhu; ị tịi kadụ mma.”
2 Noo ya; Hezekáya bya aghaa iphu l'ụzo igbulọ pfuru nụ Chipfu sụ:
3 Gụbe Chipfu; nyatanụ gẹ mu bụ-be onye gude ire-lanụ; mẹ obu mu g'ọ ha tsoo ụzo nkengu; mẹ gẹ mu gude meberu iphe, dụ ree l'ẹnya ngu. Hezekáya raa ẹkwa kpọo pfụla pfụla.
4 Tọbudu iya bụ; Opfu Chipfu bya atụba Azáya lẹ nchị sụ iya:
5 “Je akaru Hezekáya lẹ-a: Waa iphe, o pfuru; mbụ Chipfu, mbụ Chileke kẹ nna ngu, bụ Dévidi: Mu nụmawaru epfupfu, i pfuru nụ mu; bya ahụmawaa ẹnya-mini, shi ngu l'ẹnya. Mu e-yekwafụa apha iri l'ise lẹ ndzụ ngu.
6 Ọzo bụ lẹ mu a-nafụta ngu; nafụta mkpụkpu-a l'ẹka eze ndu Asiriya. Mu a-gbaru mkpụkpu-a ọdzori.
7 “Waa iphe-ọhubama, Chipfu e-goshi ngu baa; g'i gude maru lẹ Chipfu e-me-a iphe ono, o pfuru ono.
8 Nwonyonyo iphe ono, a kpụshiru, ee gudeje enyi ụlo-eli Éhazu ono; bẹ mu e-me g'o gude ntụ-ọkpa iri tsụ-phu azụ.” No iya; onyonyo ono tsụa rịbo; gude ntụ-ọkpa iri tsụ-phu azụ eme lẹ g'o shi habe ogologo.
9 Ọwa-a bụ iphe, Hezekáya deru; mbụ eze ndu Jiuda g'iphe-ememe ono mechaarụ iya; ọ kachaa mma.
10 Mu sụkwaru: ?Bụ lẹ
mkpakpọnu ndzụ mu-a
bẹ mu jeru je eshisweta
ọnu ọguzo alị-maa?
A naa mu nfụ nafụ mu nwa
apha ndzụ mu ọphu
phọduru nụ?
11 Mu sụkwaru lẹ mu taa
hụmabaedu Chipfu
l'alị ndu dzụ ndzụ.
Ọphu mu egudebaẹdu
ẹnya ahụma nemadzụ,
dzụ ndzụ;
ọzoo kẹ g'anyi lẹ ndu
nọkwadu l'eliphe-a
bubaaru.
12 A lashịru ndzụ mu g'onye lashịru
ẹswa l'ụlo ụnwu-eswi;
mbụ l'ọo g'onye akpa iphe
akpakpa aphụkobeje iphe,
ọ kpagheru akpaghe-a
bụ gẹ mu
phụkobewaru ndzụ mu.
Ọ bya atụwaa mu eri
gbụpyia l'iphe, aakpajẹ iphe;
bya egbubufu iya.
Ọ bụru-a shi l'eswe gẹ nchi
jihu bẹ i mebufụwaru
nụ kẹ ndzụ mu.
13 Mu nọdu atajẹkpoepho
nshi jasụ nchi abọhu.
Obenu l'o gwerụ mu
ọkpu arakabya g'ẹka
oduma ata anụ.
Ọ bụru-a shi l'eswe gẹ nchi
jihu bẹ i mebufụwaru
nụ kẹ ndzụ mu.
14 Mu gbọaha chachacha
g'apya ọzoo g'ẹsha.
Mu deahaa kukuku
g'ede-kuukuu.
Mu lenyaa ẹnya l'eligwe;
ẹnya meahaa mu ẹhuka.
Mu sụ: Jiko Nnajịuphu;
mu eje iphe-ẹhuka;
byanụ agbaarụ mu
mkpu!
15 Ọle ọ bụ; ?mu a-sụkwanu
agha?
O pfuakwaru opfu nụ mu;
mbụ ọ bụru yẹbedua
l'onwiya meru iphe ono.
Mu a-nọdukpoepho eje
nwa gelee jasụ gẹ mu
a-nọ-beru;
kẹle obu atawa mu
nyịkinyiki.
16 “Gụbe Nnajịuphu;
ọ kwa ụdu iphe,
dụgbaa ẹgube-a bẹ
nemadzụ gude buru.
Ọ bụkwaru iya phọ bẹ unme,
nọ mu l'ẹhu byaru bya
egudewaa nọdu ndzụ nta-a.
Jiko menaa gẹ mu wekọrohu;
menaa gẹ mu nọdu ndzụ!
17 Ọkpobe opfu;
ọ kwa g'ọo-dụru mu lẹ ree
bẹ mu gude jee iphe-ẹhuka,
dụ nno.
Ọ bụru l'ọo l'i yeru mu obu
bẹ i ti kwedu gẹ mu
bahụ lẹ nsụkutu ọla-l'iswi.
Ị bya atụko iphe-ẹji mu l'ophu
chịru ye onwongu l'azụ;
18 kẹle ndu nọwaa l'alị-maa te
etukwa ngu ẹpha.
Ọphu ndu nwụhuwaru anwụhu
agụkwa ebvu egude etu
ngu ẹpha.
Ọphu ndu e kpochiru l'ilu
eleẹkwa ẹnya ire-lanụ
nkengu.
19 Ọ kwa ndu nọ ndzụ;
mbụ l'ọo ndu nọ ndzụ bụ ndu
anọduje etu ngu ẹpha gẹ
mu etu ngu iya ntanụ-a.
Ọ bụru ndu bụ nna anọduje
akọru ụnwu phẹ g'ị bụ-be
onye ire-lanụ.
20 Chipfu a-bya adzọo mu ndzụ.
Ọo ya bụ l'anyi a-nọdu agụ
ebvu akpọ iya l'une
jasụ g'anyi a-nọ-beru ndzụ.
Ọ bụru l'eze-ụlo Chipfu bẹ
anyi a-nọdu gụa ya.”
21 Azáya pfuwaru sụ g'e meta iphe oshi figu tsua etsutsu debechaa Hezekáya l'ẹjo-onwo ono, phọkashiru iya l'ẹhu ono; l'o -mewaa ya nno; l'o wekọrohu.
22 Hezekáya bya ajịa sụ: “?Bụ gụnu bụ iphe-ọhubama, e-goshi lẹ mu e-mechaa bahụbaa l'eze-ụlo Chipfu ọzo?”