26
Ebvu Ajaja
1 O -rwua mbọku ono; waa ebvu,
aa-gụ l'alị ndu Jiuda baa:
“Anyi nweru mkpụkpu,
shihuru ike.
Ọ bụru ndzọta bẹ Chileke
gude kpụ-phee ya
mgburugburu g'igbụlo.”
2 Unu gụhaa ụzo mkpụkpu
ono ghebe ọnu;
k'ọphu ọha ono,
pfụberekoto ono,
bụ ndu apfụshije ike l'iphe,
ẹphe pfuru ono abahụ.
3 Ii-kebe iya l'ọma; mbụ onye ono,
uche iya dụ l'ẹka ị nọ;
opfu l'ọ kpọru obu yeru
ngu ono.
4 Unu kpọru obu yeru Chipfu
jasụ lẹ tuutuutuu lẹ mịimiimii;
kẹle Nnajịoha,
bụ Chipfu bụ oke agbara
mkpuma ojejoje.
5 Ndu woliru onwophẹ eli
bẹ o kuzetaru;
bya emee gẹ mkpụkpu, a kpụru;
ọ ha ephekerephe
ephekerephe lwazetakpọ
mkpulalị;
mbụ l'o gwerụ iya
pyakapyaka jasụ o rwua alị;
o woru iya gwọo
l'urwuku.
6 E gude ọkpa azọ iya tọlitoli;
mbụ ọkpa ndu e shi
emekpa ẹhu;
mbụ ntụ-ọkpa ndu adụdu
g'ọ dụ phẹ.
7 Ụzo, ndu pfụberekoto
eshi pfụru nhamụnha.
Sụ-a; gụbe onye obu gụru
ìphóró;
ọo ngu meru ụzo ndu
pfụberekoto;
ọ nọdu akwọ tẹretere.
8 Gụbe Chipfu;
anyi nọkpoepho eme iphe,
ekemu ngu pfuru;
gude nno daa gbẹe
ngabẹru ngu.
Ẹpha ngu;
yẹe ẹngiringa ngu bụ iphe,
adụje anyi ree l'obu.
9 Oghoroko ngu adụje mu
l'ẹnyashi.
O -be l'ụtsu l'ọ dụkwa mu phọ
g'asụ lẹ mu hụmaru
ngu.
Teke i kpeẹrupho
ụnwu-eliphe ikpe;
ndu bu iya nụ amaru iphe,
bụ apfụbekoto.
10 Ndu ẹjo-iphe abụjeru;
e -mechakpọoru phẹ
eze-iphe-ọma;
ẹphe ta anwụtadu iphe,
bụ apfụbekoto.
Ẹphe -nọduchakponu l'alị
ndu obu phẹ gụru ìphóró;
ẹphe emelẹ-a iphe,
bụ iphe, apfụduru-ọto.
Ẹphe ta akpadu ishi kẹle
Chipfu parụ ẹka.
11 Gụbe Chipfu;
ị paliwaru ẹka ephekerephe;
obenu l'ẹphe ta ahụmaduru
iya.
G'ẹphe hụmanu g'opfu-ẹhu
ndibe ngu aphụ-beru
ngu l'ẹhu;
g'iphere adụ phẹ!
G'ọku, dụru ndu ọhogu ngu
tsupyashịkwaa phẹ!
12 Gụbe Chipfu;
ọ bụ ngu e-me gẹ nchị
dụ anyi doo.
Iphe, bụkpoo iphemiphe,
anyi meru bụkota ngu
bẹ meru iya nụ anyi.
13 Gụbe Chipfu, bụ Chileke anyi;
ndu bụ nnajịuphu ọzo,
abụdu gụbedua shiakwa
bụru nnajịuphu anyi.
Obenu l'ọo gụbedua kpoloko
bẹ anyi akwabẹ ùbvù.
14 Ndu k'ono nwụhuakwaru;
ẹphe ta anọekwa ndzụ.
Ndu maa, lashịwaru nụ;
ta alwajeẹkwa azụ.
Ị hụ̀ru phẹ ahụ̀hù; mee phẹ;
ẹphe bụru ọla-l'iswi;
bya emee phẹ g'a ta
nyatajẹhe phẹ anyata ophu.
15 I mewaru ndu ndu-anyi;
ẹphe ka igwerigwe;
gụbe Chipfu.
I mewaru ndu ndu-anyi;
ẹphe ka igwerigwe.
I shi ẹgube ono mee
onwongu;
a kwabẹahaa ngu ùbvù;
gụbe onye kpọribecharu
oke alị ono l'ophu.
16 Mbụ-a Chipfu;
ọ kwa ngu bẹ ẹphe
gbapfutaru teke iphe atsụ
phẹ l'ẹhu.
Teke ịihù phẹ ahụ̀hù bẹ ẹphe
tụkoru wata ngu araku.
17 Ọo gẹ nwanyị, dụ ime;
ime nọdu emewaa iya;
anọduje aswịkposhi onwiya;
echi mkpu l'oome iya ẹhuka-a;
noo g'anyi shi dụ nọdu
ngu l'iphu; gụbe Chipfu.
18 Anyi shi dụ ime;
anyi nọdu aswịkposhi
onwanyi l'ẹka oome
anyi ẹhuka.
E mechaa; ọ dụ g'anyi nwụru
phẹrephere;
mbụ l'anyi ta adụdu ike
dzọta ụnwu-eliphe;
ọphu ndu buchiru mgboko
adadụru.
19 Sụ-a; ndibe ngu,
nwụhuru anwụhu
e-mechakwaa nọdu
ndzụ ọzo.
Ogwẹhu phẹ e-teta gbalihu.
Unubẹ ndu bu l'ime urwuku;
unu gbalihu rwua okwe
ẹhu-ụtso.
Iji, akwaru unu dụkwa g'iji,
akwa lẹ nchi-abọhu.
Mgboko e-mechakwaa
chịfutagbua ndu shi
nwụhuhawa nụ,
dụ iya l'ime.
Adzọ ndu Ízurẹlu ndzụ
20 Ndu mu; unu tụgbua bahụ l'ụlo unu je agụ-chia onwunu ụzo! Unu domia onwunu nwanshịi; jasụ oke ẹhu-eghu iya adazeta;
21 kẹle-a; unu lenu! Chipfu shiakwa ẹka o bu eje afụta; g'ọ bya ahụ̀a ndiphe ahụ̀hù k'iphe-ẹji, ẹphe meru. Mgboko l'ophu e-kpofutakọta ndu e gburu l'ime iya; ọphu oodomiẹdu ndu a nọ iya l'ime phụshia.