11
Ẹkali Jiesi
1 Mkpirikpu upfu-oshi ono,
bụ Jiesi l'e-rwuta irwu.
Ọ bụru l'ọgbarabvu iya bẹ
ẹkali e-shi nyịkata.
2 Unme kẹ Chipfu a-nọdu iya
l'ẹhu; mbụ Unme,
emeje g'a maru iphe;
bya abụkwarupho Unme,
emeje g'iphe doo ẹnya;
Unme mgbazi;
bya abụkwarupho Unme,
emeje g'ike dụ;
Unme, emeje g'a nwụta iphe;
bya abụkwarupho Unme,
emeje g'a tsụ Chipfu ebvu.
3 Ọ bụru iphe, a-dụje iya ree
bụ g'a tsụje Chipfu ebvu.
Ọ tọ bụkwa iphe,
o gude ẹnya hụma bẹ
oo-gudeje ekpe ikpe;
ọphu ọ bụkwa iphe,
ọ nụmaru lẹ nchị bẹ
oo-gudeje kpebua iphe,
dụ k'ekpebu.
4 Ọ chia iphe, meru nụ bụ
l'oo-kpeje ndu adụdu
g'ọ dụ phẹ ikpe, pfụru ọto.
Ọ bụru ikpe,
pfụru nhamụnha bẹ
oo-gudeje kpebua ikpe
ndu ụkpa l'eliphe-a.
Eliphe l'ophu bẹ oo-gude
mgbọro,
dụ iya l'ọnu chia gbaagbaa.
Ọ bụru unme,
ọ tụru atụtu bẹ oo-gude
phụa ndu ẹjo-iphe tẹerii.
5 Apfụbekoto a-bụru iphe,
oo-ke l'upfu.
Apfụshi ike, l'iphe,
o pfuru abụru iphe,
ọo-tubutajẹ uwe iya l'upfu.
6 Ẹjo-nkụta-ọswa bẹ oo-me;
yẹe ụnwu atụru akpaahaa
ẹghirigha.
Agụ yẹe eghu adọaha l'ẹka
lanụ.
Nweswi; mẹ nwoduma;
mẹkpoo anụ,
atsụje onwiya ẹbà a-tụko
akpa ẹghirigha.
Ọ bụru nwatanshịi bẹ
a-nọduje eche phẹ nụ.
7 Ne-eswi; yẹe ẹjo anụ-ẹgbudu,
bụ bịye a-nọdu ata nri
ẹghirigha.
Ụnwu phẹ atụko adọ l'ẹka lanụ.
Tẹme oduma abụru anụ,
a-nọdu ata ẹswa g'oke-eswi.
8 Nwa, angụ ẹra a-nọduje
l'ọnu ẹnu óghù ebvu ebvu.
Nwatanshịi, a mịfuwaru ọnu
l'ẹra ewojeru ẹka ye
l'ẹnu ogiji.
9 Iphemiphe ono ta adụdu
ọphu emeka nemadzụ iphe;
ọphu ọ bụro k'emegbu l'úbvú,
e doberu mu nsọ l'ophu;
kẹle ọo gẹ mini do-jiru
ọma ẹnyimu-a bụ g'eliphe
l'ophu a-madzuru Chipfu.
Alwalwa ndu a kpụru lẹ ndzụ
10 O -rwua teke ono bẹ ọgbarabvu Jiesi ono a-bụru ẹkwa-ọhubama k'ụnwu-eliphe. Ọ bụru iya bẹ ọhamoha a-nọduje agba agbapfu; ọkpoku iya a-dụ akpabiri l'ẹnya.
11 Mbụ l'o -rwua mbọku ono bẹ Nnajịuphu a-machị ẹka iya ọzo k'ugbo ẹbo nafụtafuchaa nwandibe iya ndu ọphu a-phọdu l'alị ndu Asiriya; mẹ l'alị ndu Ijiputu; mẹ l'alị Paturọsu; mẹ ndu ọphu e-shi l'alị ndu Kushi; mẹ ndu ọphu e-shi l'alị ndu Elamu; mẹ ndu ọphu e-shi l'alị Shịna; mẹ ndu ọphu e-shi lẹ mkpụkpu Hamatu; mẹ ndu ọphu e-shigba l'ọha, bukube eze-ẹnyimu.
12 Ẹkwa-ọhubama bẹ ọo-paliru ọhamoha; bya atụko ndu Ízurẹlu, a kpụru lẹ ndzụ chịtachaa; l'o rwukọbe ndu Jiuda ono, a tụkaru nanụnanu ono. Ẹka oo-shi rwukọbe phẹ bụ lẹ nkulahụ eliphe ụzo ẹno ono.
13 Okophoo ndu Ifuremu e-phukashịhu; l'e mee gẹ ndu ọhogu ndu Jiuda chịhu. Mbụ lẹ ndu Ifuremu te ekoẹduru ndu Jiuda okophoo; ọphu ndu Jiuda adụeduru ndu Ifuremu ẹhuka.
14 Ẹphe e-zi phaa je ndu Filisitayinu bu l'ụzo ẹnyanwu-arịba swọkoswoko. Ẹphe abyakwaphọ erwukọbe onwophẹ je akwagwoo ndu bu l'ụzo ẹnyanwu-awawa. Ẹphe a-zụ ndu Edọmu yẹe ndu Mówabu gburumu. Ẹphe emee ndu Amọnu ẹphe anọdu phẹ l'ẹka.
15 Chipfu l'e-me g'ọ tahụ; mbụ nkulahụ eze-ẹnyimu Ijiputu. Ọ bụru phẹrephere, ekpo pharaphara bẹ oo-zi gude phee ẹka l'eli eze nggele Yufurétisu. Oo-me iya l'ọ ta-bushihu atabushihu; tabuha uzi ẹsaa; k'ọphu nemadzụ a-zọje gẹdengu gẹdengu gẹdengu ghata iya.
16 Nwandibe iya ndu ọphu phọduru nụ, e-shi l'alị ndu Asiriya alwa bẹ aa-tọgboru oji, a-dabyiru kẹ phorokotokongu; ẹgube ono, a tọgboru iya ndu Ízurẹlu teke ono, ẹphe shi l'alị ndu Ijiputu alwa ono.