49
Jiékọpu agọ ọnu-ọma anụ ụnwu iya
1 Noo ya; Jiékọpu bya ekua ụnwu iya; sụ phẹ:
“Unu dzukọbe gẹ mu kọoru
unu iphe, a-nwụru unu
l'atatiphu!
2 Unu dzukọbe bya
angabẹ nchị;
unubẹ ụnwu Jiékọpu!
Unu ngabẹru nna unu,
bụ Ízurẹlu nchị!
3 Rúbẹnu; ọo gụbedua bụ
ọkpara mu;
bya abụru ike mu;
mbụ l'ị bụ nwa ivuzọ,
mu nwụru teke ike dụ mu.
Ọo ngu bẹ a kachaa akwabẹ
ùbvù; bya abụru ngu bẹ
kakọta ọkpehu.
4 Eshinu ịinoduje atụ kpereree
g'akpara-mini l'eme iphe,
erwubeduru ngu nụ;
bẹ ị tịi kaẹdu ndu ọphuu shii;
noo kẹle ị zẹru l'iphe-azẹe
nna ngu;
mbụ je eworu iphe,
mu azẹje azẹe merwua.
5 Simiyọnu; waa Lívayi
bụ unwune.
Ẹphe egudeje ogu-echi
phẹ emekpa ndu ọzo ẹhu.
6 Mu ta abyakwa ayịru l'ìdzù,
ẹphe achị; ọphu mu abyakwa
anọdu l'echilabọ phẹ;
noo kẹle ẹphe gude ẹhu-eghu
gbushia nemadzụ;
bya egbubushia oke-eswi
akwara azụ ọkpa k'iwashị.
7 G'ẹhu-eghu phẹ vuru ọnu;
noo kẹle ooghughajẹru
phẹ ẹka.
G'obu-ọku phẹ vuru ọnu;
noo kẹle ọopanukaje phẹ
ẹka l'ẹhu.
Mu a-chịkashi-dzuru phẹ
l'alị Jiékọpu;
mbụ dokashidzuru phẹ
l'alị Ízurẹlu l'ophu.
8 Jiuda; ụnwunna ngu
a-nọduje ekele ngu ekele.
Ẹka ngu a-zụchaa ndu
ọhogu ngu
l'ẹkpiri kẹ pfụurii.
Ụnwunna ngu g'ẹphe ha
ephozeru ngu.
9 Gụbe Jiuda bụ nwa oduma
ẹgbara.
Gụbe nwa mu;
i shiwaa l'ẹka i gbushiru iphe,
i riru lwa.
Nta-a bẹ o gbushiwaru ikpere
zẹ azẹe g'oduma;
mbụ g'akahụ oduma;
?bụ onye sụru iya ekute?
10 Jiuda ta abụ-buhuduru
eze abụ-buhu; ọphu
mgbọro-eze ono abyadụ
alụfu iya alụfu lẹ mgbaka
ọkpa; gbiriri jasụ teke onye
ọ kụru ishi l'ẹka a-bya.
Ọ -byaẹpho bẹ ọha l'ophu
a-ngabẹru iya nchị.
11 Nkapfụ-ịgara iya bẹ
oo-libeje lẹ vayịnu.
Nwa nkapfụ-ịgara iya bẹ
oo-libeje l'ẹkali vayịnu
ono ọphu mịshiru
mebyi kẹ wọgalaa.
Ọo-sajẹ uwe iya lẹ
mini akpụru vayịnu.
Akpụru vayịnu ono,
enwuje kẹ pfụu
gẹ mee ono bẹ
oo-gudeje asa
akpawuru-uwe iya.
12 Mẹe e-me; ẹnya
achaa ya vaa.
Ẹra-eswi emee;
eze acha iya phuuphuu.
13 Zebulọnu bẹ e-buru lẹ
mgboru eze-ẹnyimu.
Agụga ẹnyimu iya a-bụru
ọdu ụgbo-mini.
Oke alị iya e-jerwu Sayịdonu.
14 Isaka bụ nkapfụ-ịgara,
ọkpehu dụ;
mbụ gude ẹda labọ,
a nmakoberu iya
l'okpurukpu zẹ azẹe.
15 Ọ hụmaepho g'ẹka
oodzu ike dụ-be ree;
waa g'alị iya ono dụ-be guu;
o phozeta nmakota ivu-ẹrwa
iya jikoru l'ukuvu;
bya ejeahaa ozi,
e kebutaru iya g'o je.
16 Danu bẹ a-nọduje ekpe
ndu nkiya ikpe,
pfụru ọto;
mbụ ẹgube ono,
ọkpa-ipfu Ízurẹlu ndu
ọphuu ekpeje iya phọ.
17 Danu a-dụ g'agwọ,
nọ l'agụga ụzo;
mbụ g'ogiji,
nọ l'agụga gbororo,
abụjeru:
Ọ -taa ịnya l'ichirupfu ọkpa
l'ọ tụfu onye agba iya
nụ l'azụ.
18 Gụbe Chipfu;
mu ele ẹnya teke
ịi-dzọta mu.
19 Gadu bẹ ndu ọ-lwụa-ọlaa
a-dapfu;
ọle ọoghakobe chịpyabe
phẹ.
20 Asha bẹ a-nọdu akọ
ọkpobe nri.
Nri, ọo-nọdu akọ bụ nri,
atsọ ụtso,
gbaru ndu eze l'eriri.
21 Nafụtali bụ ele,
agbaphe g'ọ dụ iya.
Ọonwuje nwa,
ama ntụmatu.
22 Jiósẹfu bụ vayịnu,
amịje ntụmatu;
ọ bụ vayịnu,
nọ-kube mgboru ẹka
mini dụ,
amịje mebyi shii.
Ẹkali iya baa ụba tụko
igbulọ sweta.
23 Ndu ọgba-apfụ gude
ẹhu-eghu byapfuta
iya ọgu.
Ẹphe gbaru iya apfụ;
shi nno mekpaa ya ẹhu.
24 Ọle apfụ iya keẹrupho
jịngujingu g'o keru;
tẹme e mee ọkpu ẹka iya;
o shihu ike.
Ọ bụru shita l'ike k'onye bụ
Ọkalibe kẹ Jiékọpu;
mbụ onye ono,
bụ onye-nche;
waa onye mgbobuta kẹ
Ízurẹlu.
25 Onye ike ono shi l'ẹka bụ
Chileke kẹ nna gụbe Jiósẹfu,
bụ onye eyejeru ngu ẹka;
mbụ onye ono,
bụ Ọkwoolemkpa,
bụ onye emejeru ngu
iphe-ọma.
Oomejeru ngu iphe-ọma
ọphu shi l'imigwe;
bya emejekwaru ngu
phọ iphe-ọma ọphu shi
lẹ mini ime-alị.
Tẹme ọ bụru iya bụ onye
egudeje nwa;
waa eche nwa ẹra meeru
ngu iphe-ọma.
26 Ọnu-ọma ọphu nna ngu
gọru ngu kakwa k'oke-úbvú
ndiche shii;
mbụ l'ọ kakwa iphe-ọma
ọphu úbvú,
shi teke ndiche nọduta
anụje shii.
G'iphe-ọma ono g'ọ hakọta
bụkwaru kẹ Jiósẹfu;
mbụ g'ọ bụkotakwaru kẹ
yẹbe onye ono,
a họfutaru l'echilabọ
unwune iya dobe iche ono.
27 Benjiaminu bụ ẹjo-nkụta-ọswa,
ẹgu alabushi akụrepho.
O -rwua l'ụtsu l'o gbua iphe taa.
O -rwua l'ụzenyashi l'o kee iphe,
ọ lwụtaru l'ọgu.”
28 Ndu ono bụkota ọkpa-ipfu Ízurẹlu ẹphe n'iri l'ẹbo. Tẹme iphe ono bụkotaru iphe, nna phẹ pfuru yeru phẹ teke o gọru phẹ ọnu-ọma. Ọ gọerupho onyenọnu ọnu-ọma, rwuberu iya nụ.
Anwụhu Jiékọpu
29 Noo ya; ọ bya ekeru ekpe nụ phẹ sụ: “Mu abyawaa alapfu ndiche mu phẹ. Unu likwa mu l'ẹka e liru nna mu phẹ l'ọgba, nọ l'alị Ẹfuronu, bụ onye Hetu.
30 Ọgba ono yẹle alị ono nọ l'alị Makupela ono, nọ lẹ mgboru Mamure l'alị Kénanu; bẹ Ébirihamu zụtaru l'ẹka Ẹfuronu onye Hetu dobe; g'ọ bụru ẹka ee-lije odzu.
31 Ọ bụru ẹka ono bẹ e liru Ébirihamu; yẹe nyee ya, bụ Sera; tẹme e likwaphọ Áyizaku; yẹe nyee ya, bụ Ribeka l'ẹka ono; tẹme mu bya elia Lii l'ẹka ono.
32 Alị ono yẹe ọgba, nọ iya nụ bẹ a zụru ndu Hetu.”
33 Jiékọpu keghechaẹpho ekpe nụ ụnwu iya; bya azẹ-zeta azẹe; tụa unme ikpazụ; ọ bụru iya alapfu ndiche iya phẹ.