27
Iphe, e-me ndu Taya
1 Tọbudu iya bụ; Chipfu bya epfuru opfu yeru mu sụ:
2 “Nwa ndiphe: yọoru ndu Taya ọshi;
3 sụ iya: Gụbe mkpụkpu Taya, nọ l'ọnu ẹka eeshije abahụ l'eze-ẹnyimu; bụru mkpụkpu, iphe, bụ ndu bugbaa l'agụga eze-ẹnyimu abyajẹ azụta aswa. Wakwa iphe, Nnajịuphu, bụ Chipfu epfu baa:
“ ‘Oowaa gụbe Taya;
ị sụru l'ị maẹberu mma.
4 Ẹka oke alị ngu kparụ
bẹ bụgbaa l'echi
eze-ẹnyimu.
Ndu kpụru ngu nụ kpụtsee
meru ngu k'ọphu ị
mafụfuru mma ngu
l'ishi.
5 Ndu kụru ụgbo-mini
ngu bẹ bụ l'úbvú
Seniru bẹ ẹphe gburu
oshi payịnu gude kụa ya;
bya ejekwaphọ l'úbvú
úbvú Lébanọnu bua
oshi sida gude bvua
itso ụgbo-mini ngu ono.
6 Ọ bụru oshi-akpụrata,
shi l'alị Beshanu bẹ
e gude pyịshia eku-ụgbo
ngu;
ọ bụru oshi-sayịpuresu,
e bukọru l'agụga
ẹnyimu Sayịpurosu
bẹ e gude mee ọmali
ụgbo-mini ngu ono;
bya egude eze-enyi
mee ya ọna.
7 Ẹkwa-ọchaa, a kparụ ọ dụ ẹguru,
shi lẹ Ijiputu bẹ e kweru
l'imeli ụgbo-mini ono;
bụ iya bụ iphe,
emeje iya g'ọ gba ọso;
bya abụru iya bẹ
eegudeje ahụbe
iya ama.
Iphe, e gude kwekọta
l'ugbo-mini ono
gẹ mini ta abahụjeshi
iya bẹ bụ ẹkwa,
dụ urwukpu-urwukpu;
mẹ ẹkwa, dụ uswe-uswe,
shi l'agụga ẹnyimu
mkpụkpu Elisha.
8 Unwoke mkpụkpu Sayịdonu;
mẹ unwoke mkpụkpu
Avadu bẹ bụ ndu
shi akpọkotaru ngu ụgbo;
gụbe Taya.
Unwoke ngu, bụ ndu
iphe doru ẹnya bẹ
bụkota ndu
angakọtaru ngu
ụgbo-mini.
9 Ndu-bụ-ọgerenya mkpụkpu
Gebalu, mẹ ndibe phẹ,
maru eme ọna;
bẹ anọduje l'ụgbo-mini ngu;
emezigbaa ẹka o
rifushihuru ụzo.
Iphe, bụ ụgbo-mini,
nọkota l'eze-ẹnyimu;
mẹ ndu angakọta
ụgbo-mini ono bẹ
abyajẹ ngu azụta aswa.
10 “ ‘Unwoke ndu Peshiya; mẹ unwoke ndu Lidiya; yẹe unwoke ndu Putu shi bụkotaru ndu ojọgu ngu alwụru ngu ọgu. Ẹphe achịjeru iphe, ẹphe egudeje egbobuta onwophẹ; mẹ okpu-igwe phẹ kobegbaa l'eli igbulọ ngu. Ẹphe meru ngu ị du úbvú.
11 Unwoke ndu Avadu; mẹ unwoke ndu Helẹku bẹ bụ ndu echejeru ngu igbulọ ngu nche gba mgburugburu. Unwoke ndu Gamadu bụ ndu anọdujeru ngu l'ụlo-eli. Ẹphe ewojeru iphe, ẹphe egudeje egbobuta onwophẹ kobegbaa l'eli igbulọ, e gude kpụ-buta mkpụkpu ngu. Ẹphe meru; mma ngu dzua edzudzu.
12 “ ‘Ndu Tashishi shi bụru ndu azụje ngu aswa; kẹle i nweru ẹku, parụ ẹka l'ụdu iya l'ụdu iya. Ẹphe shi egudeje mkpọla-ọchaa; mẹ iphe-ígwè; mẹ ogbongu; mẹ mkpuma ọta-njele; bya azụ-nweta ngu ọphu i nweru.
13 Ndu Jiavanu; mẹ ndu Tubalu; mẹ ndu Mẹsheku shi achịjeru ohu; mẹ ngwa, e gude onyirubvu mee; gude bya ngu azụta aswa.
14 Unwoke Bẹtu-Togarama shi akpụjeru ịnya, eegudeje eje ozi; mẹ ịnya, eegudeje alwụ ọgu; mẹ ịnya-mulu bya ngu azụta aswa.
15 Unwoke ndu Dedanu bẹ unu l'ẹphe shi azụgbaje aswa. Igwerigwe ndu bugbaa l'agụga eze-ẹnyimu shi bụkotaru ndu azụ ngu aswa. Ọ bụru eze-enyi yẹle oshi-eboni bẹ ẹphe shi egudeje pfụa aswa iphe, ẹphe zụru.
16 Ndu Edọmu bẹ shi azụje ngu aswa; kẹle iphe, iimeshi emeshi bẹ dụ igwerigwe. Ẹphe shi egudeje mkpuma emeralụdu; bya ngu azụta aswa; mẹ ẹkwa dụ uswe-uswe; mẹ ẹkwa, a kparụ ọ nọdu ama mma; mẹ ẹkwa ọchaa; mẹ mkpuma koralu; mẹ mkpuma rubi.
17 Ndu Jiuda; mẹ ndu Ízurẹlu bẹ unu l'ẹphe shi azụgba aswa. Ẹphe shi egudeje witi, shi lẹ Minitu; mẹ igberi; mẹ manụ-ẹnwu; mẹ manụ mmanụ; waa manụ-balụmu; bya ngu azụta iphe, i meshiru.
18 “ ‘Ndu Damasụkosu gudekwaphọ l'i meshiru iphe, dụ igwerigwe; waa kẹle i nweru ẹku ntụmatu; ẹphe nọdu egudeje mẹe, shi lẹ Hẹlubonu; mẹ ẹji atụru, shi lẹ Zaharu azụ ngu aswa.
19 Ndu Danu; mẹ ndu Jiavanu, shi lẹ Uzalu bẹ azụje ngwaswa ngu. Ẹphe nọdu egudeje ígwè, a kpụru akpụkpu; yẹe kashiya; mẹ kalamọsu, bụkota iphe, eegudeje eme manụ-anyịnyi, eshi kwẹekweekwee; bya ngu azụta aswa.
20 Ndu Dedanu shi egudeje ukpo, eegudeje nọdu l'eli ịnya bya ngu azụta aswa.
21 Ndu Arabu; mẹ iphe, bụ ndu-ishi ndu Keda bẹ bụkota ndu shi azụje ngu aswa. Ẹphe achịjeru atụru; mẹ ebili; yẹe eghu bya ngu azụta aswa.
22 Ndu Sheba; mẹ ndu Rama bẹ shi azụjekwa ngu phọ aswa. Ẹphe shi egudeje manụ, vu oke aswa; mẹ mkpuma, vu oke aswa; mẹ mkpọla-ododo; bya azụ-nweta ngwaswa ngu.
23 Ndu Haranu; mẹ ndu Kane; mẹ ndu Édẹnu; yẹe ndu agbagbaa oke-nghọ, shi lẹ Sheba; mẹ ndu agba oke-nghọ, shi lẹ mkpụkpu Ashuru; mẹkpoo mkpụkpu Kilimadu bẹ shi azụkotakwa ngu phọ aswa.
24 Iphe, ẹphe shi azụje ngu aswa iya bụ uwe, amagbaa mma; mẹ ẹkwa, dụ urwukpu-urwukpu; yẹle ẹkwa, a kparụ dengashịa ya iphe edengashị; mẹ jịlajila ukpo, vọkashiru avọkashi, aatọgboje l'ọma-ụlo; mbụ ọphu e gude ọkpukpu swịa; bya elichaa ya kẹ kpụkpurukpu.
25 Ụgbo-mini ndu Tashishi bụ gụbe Taya bẹ ẹphe anọduje evuru iphe.
“ ‘Ị dụepho g'ụgbo-mini,
e dojiru iphe,
anyịshi ẹrwa ike;
ọ nọdu l'echilabọ
eze-ẹnyimu.
26 Ndu l'akpọ ngu l'ụgbo
kpọtawaru ngu je
edegebe l'echi
eze-ẹnyimu.
Obenu lẹ phẹrephere,
shi l'ụzo ẹnyanwu-awawa
a-bya ezijashia ngu
iphiriba iphiriba
l'echilabọ eze-ẹnyimu
ono.
27 Ẹku ngu; mẹ iphe,
i gude agba nghọ;
mẹ ngwaswa ngu;
mẹ ndu etso ụgbo-mini ngu;
mẹ ndu angaru ngu
ụgbo-mini;
mẹ ndu aguchijeru ngu
ụgbo-mini;
mẹ ndibe ngu,
agba oke-nghọ;
mẹkpoo ndu ojọgu ngu
g'ẹphe ha; mẹ iphe,
bụkpoo ndu ọzo nọ
l'ụgbo ngu ono;
bẹ e-kpolahụ l'echilabọ
eze-ẹnyimu mbọku ono,
ụgbo-mini ono e-kpu.
28 Agụga agụga
eze-ẹnyimu bẹ
a-nmahụkota jiijiijii
lẹ teke ndu angaru
ngu ụgbo-mini
a-tụshi ụzu-ẹkwa.
29 Iphe, bụkpoo ndu gude
eku-ụgbo akpọ ụgbo
bẹ a-pakọtaru ụgbo
phẹ nwuhaa.
Ndu anga ụgbo-mini;
mẹ ndu etso ụgbo-mini
ono bẹ a-pfụchaaru
l'agụga eze-ẹnyimu.
30 Ẹphe a-kwatakpọo akwata
chia oke mkpu ẹkwa;
mbụ kwatakpọo rashịa
ẹkwa ngu ike.
Ẹphe e-kpota ntụ kpukposhi
onwophẹ l'ishi;
bya arwaswikọta
onwophẹ lẹ ntụ.
31 Ẹphe a-kpụshi ishi ngu;
bya eyee uwe-aphụ.
Ẹphe e-gude obu,
aphụ jiru ejiji kwaa
ẹkwa ngu;
mbụ gụa aphụ ngu
gụshia ya ike.
32 Ọ bụru teke ono,
ẹphe a-nọdu ara ẹkwa ngu;
agụ aphụ ngu ono;
bẹ ẹphe a-gụru ngu
ebvu-aphụ ọwa-a sụ:
?Bụ mkpụkpu ole bẹ
bụjekporu
mkpurupyata l'echilabọ
eze-ẹnyimu ẹgube-a,
mkpụkpu Taya
bụ iya-a?
33 Teke e shi evushije
ngwaswa ngu e -shi
l'eze-ẹnyimu;
bẹ i shi emeje ẹpho
eji ọha, dụ igwerigwe.
Ọ bụru ẹku ngu,
parụ ẹka;
mẹ ngwaswa ngu bẹ
i gude mee ndu eze,
nọgbaa lẹ mgboko-a
ẹphe nweru iphe.
34 Obenu lẹ nta-a bẹ mini
mebyishiwaru ngu
l'ọhu eze-ẹnyimu.
Ngwaswa ngu ono;
yẹe ndu tso ngu nụ;
bẹ mini rikọtawaru
unu l'ẹphe.
35 “ ‘Iphe, bụkpoo ndu bukọta l'agụga eze-ẹnyimu bẹ iphe, meru ngu nụ nyịru ishi ẹdzu; ndu bụgbaa eze phẹ nmahụkota rwuurwuu l'ẹka ndzụ-agụgu rwutaru phẹ. Iphu gbapfụbechaa phẹ agbapfụbe l'ẹka ndzụ agụ phẹ.
36 Iphe, bụ ndu agbagbaa oke-nghọ l'ọhamoha bẹ ata mgbede lẹ k'iphe nwụru ngu nụ. Ị lawarụ ẹjo alala; ọphu ị tị byadu adụbaa adụdu ophu.’ ”