19
Ebvu-aphụ, a gụru ndu-ishi ndu Ízurẹlu
1 “Gụaru ndu-ishi ndu Ízurẹlu ebvu-aphụ.
2 Gụa ya sụ:
“Ne ngu shi bụru ne oduma,
nọ l'echilabọ oduma.
Ọ zẹ l'echilabọ ẹka ụnwu
oduma dọru ehe
ụnwu iya.
3 O hefu nwa lanụ l'ime
ụnwu iya ono.
Nwa iya ono bya abụru
oduma, ọkpehu dụ;
Ọ bya anwụta g'eeshije
egbu anụ;
bya ata nemadzụ pyaapyaa.
4 Ọhamoha bya anụahaa
kẹ nkiya.
Ẹphe mee ya o nwulahụ
l'iduma phẹ.
Ẹphe gude eze ịkekee
nmata iya kpụru lashịa
alị Ijiputu.
5 Ne iya ahụma l'iphe,
ọ tụberu te ejedu
g'ọ tụberu iya;
o duta nwa iya lanụ ọzo;
hekwaa hefuta;
ọ bụru oduma,
ọkpehu dụ.
6 O tsoru oduma ibe iya
jepheahaa g'ọ dụ iya;
noo kẹle ọobyawaa
abụru oduma, ọkpehu dụ.
Ọ bya anwụta g'eeshije
egbu anụ;
bya atahaa nemadzụ
pyaapyaa.
7 O woru ẹka ẹphe
kpụshigbaaru ike
nwutsushia;
mbụ ẹka egbobutajẹ
phẹ nụ;
bya atụko mkpụkpu
phẹ mee umerekete.
Ndzụ-agụgu nọdu erwutajẹ
ndu alị ono l'ekiri,
ọosuje.
8 Tọbudu iya bụ; iphe,
bụ ọhamoha bya
akwageberu iya;
mbụ ndu shikọta
l'ẹkali ibiya ono
mgburugburu.
Ẹphe bya eworu ụgbu
phẹ geberu iya.
O nwulahụ l'iduma,
ẹphe bvuru.
9 Ẹphe gude ịkekee nmata
iya kpụfuta;
bya enwuru iya ye lẹ
mkpuchi;
pata iya pajẹru eze
ndu Bábilọnu.
Ẹphe nwuru iya ye
lẹ mkpọro.
Ọo ya bụ; a nụma-buhu
ẹka ọosu ekiri l'úbvú
ndu Ízurẹlu.
10 Ne ngu dụepho g'ome
vayịnu,
nọ l'opfu-vayịnu ngu.
E yeru iya l'agụga mini;
ọ mịa wọpfuru awọpfuru;
jashịa ẹka igwerigwe;
kẹle mini,
tsụru iya l'ẹhu mebyi
atsụru.
11 Ẹkali iya ono shihukọta ike;
dụepho ree kẹ g'ọ bụru
mgbọro onye eze.
Ọ jakpọo dụ kpuchii
kakọta ẹpfukala ọzo shii.
Ụba iya kakọta ẹpfukala
ọzo l'eli k'ọphu o
sengoru iphemiphe
ọzo barụ ụba l'ọswa.
12 Obenu l'e gude
ẹhu-eghu vụa ya
l'ọgbarabvu;
mbụ vụta iya tọgbo
l'alị.
Phẹrephere, shi l'ụzo
ẹnyanwu-awawa
bya ezia;
akpụru iya kpọshihu
nkụ.
A bya anyịswoshikota
iya akpụru.
Ẹkali iya ono, shihukọtaru
ike ono bya
akpọshihuchaa nkụ;
ọku woru iya nmaa
swọkoswoko.
13 Nta-a bẹ e je eworu
iya dzabẹ l'echiẹgu;
mbụ l'alị, kpọru gbengu;
mini adụdu mẹ ililekpọo.
14 Ọku bya eshi l'ẹkali
iya lanụ gbanwuhu;
kepyashịchaa
akpụru iya.
Ọphu o nweẹdu ẹkali,
shihuru ike,
nọkwadu iya nụ;
mbụ ọphu dụkwadu
ree k'abụru mgbọro
onye eze.
Ọwa-a bụ ebvu-aphụ g'e
rwujekwa iya erwubvu.”