3
Iphemiphe nweru teke emeje iya
1 Iphemiphe nwekwarụ teke
eemeje iya;
mbụ l'iphemiphe,
eeme ememe nweru
teke eemeje iya lẹ
mkpula igwe-a.
2 Teke aanwụ nemadzụ
anwụnwu dụ;
teke aanwụhu anwụhu
dụkwapho.
Teke eemebe iphe l'alị dụ;
teke aakpata iphe,
e meberu l'alị akpata
dụkwapho.
3 Teke eeme g'a nwụhu
anwụhu dụ;
teke eeme g'a ka mma
l'iphe-ememe dụkwapho.
Teke eetsukpọshi etsukpọshi
dụ;
teke aakpụ-li akpụ-li
dụkwapho.
4 Teke aara ẹkwa dụ;
teke aachị ọchi dụkwapho.
Teke aagụ aphụ dụ;
teke eete ebvu dụkwapho.
5 Teke eetuphashị mkpuma
etuphashị dụ;
teke aatụtukobe mkpuma
atụtukobe dụkwapho.
Teke aanma akpa dụ;
teke eesela onwonye
azụ dụkwapho.
6 Teke aachọ iphe achọcho dụ;
teke aamị ẹnya l'iphe
dụkwapho.
Teke aakwakọbe iphe
akwakọbe dụ;
teke eetupha iphe etupha
dụkwapho.
7 Teke aalajashị iphe alajashị
dụ;
teke aagbakwa iphe
agbakwa dụkwapho.
Teke aanọdu nggujingguji
dụ;
teke eeye ọnu l'opfu
dụkwapho.
8 Teke eeye obu dụ;
teke aadụ ashị
dụkwapho.
Teke aalwụ ọgu dụ;
teke nchị-adụ-doo
dụkwapho.
9 ?Bụ gụnu bẹ onye akanya erita l'akanya, oose?
10 Mu hụmawaru ivu, Chileke boru ndiphe.
11 O deru ẹnya lẹ mini mee iphemiphe; ọ nọdu l'ògè iya. Ọ bya emee amadụ g'ọ rịje k'ojejoje. Ọle amadụ ta adụdu ike maẹberu iphe, Chileke meru e -shi l'ishi jeye l'ẹka ọ bvụru.
12 Ọphu mu maru bụ l'ọ tọ dụdu iphe, kabarụ amadụ ree; abụdu g'ẹhu tsọje iya ụtso; l'oome iphe, dụ ree teke ọ nọ ndzụ.
13 G'onyemonye rije g'ọ dụ iya ngụje g'ọ dụ iya; akanya, oose eji iya ẹpho. Ọo ono bụ iphe-ọma, Chileke eme.
14 Iphe, mu maru bụ l'iphemiphe, Chileke eme a-nọ ojejoje. Ọ tọ dụdu iphe, ee-yekwa iya eyekwa; ọphu ọ dụdu iphe, ee-wofu iya ewofu. Iphe, o gude mee ya nno bụ g'amadụ hụmaje iya tsụa yẹbe Chileke ebvu.
15 L'iphemiphe, dụ nụ shikpọo dụhawaa. Iphe, l'e-mechaa dụ nụ shikwaphọ dụhawaa. Ọ bụru Chileke e-me g'a nyata iphe, a zọharu azọha.
Ẹjo-ememe, jiru mgboko
16 Mu byakwa ahụma iphe ọzo lẹ mkpula ẹnyanwu-a: L'ẹka e gege anọdu kpee ikpe, pfụru nhamụnha bẹ a gbẹ nọdu eme ẹjo-iphe; ẹka e gege anọdu eme iphe, pfụru ọto bẹ a nọkwapho eme ẹjo-iphe.
17 Mu bya arịa l'ime obu mu sụ: “Chileke e-mechakwaa tụko ndu pfụberekoto mẹ ndu ẹjo-iphe kpee ikpe; kẹle iphemiphe nweru ògè; mbụ l'iphemiphe, eeme ememe nweru ògè teke eemeje iya.”
18 Mu byakwa arịa ọzo sụ: “Chileke ahụjekwa nemadzụ ama gude goshi phẹ l'ẹphe l'anụ-ẹgbudu bụ iphe lanụ.
19 Ọo iphe, eme nemadzụ emekwaphọ anụ-ẹgbudu; mbụ l'ọo iphe, swiru anụ-ẹgbudu swiru nemadzụ. Ọo g'ọnwu egbu ọphuu bụ g'oogbu ọphuu; ọ bụru g'ọphuu atụ unme bụ g'ọphuu atụ. Ọ tọ dụdu iphe, nemadzụ nweru gude ka anụ-ẹgbudu. Iphemiphe tụkoru bụru iphe-mmanụ.
20 G'ẹphe ha tụkoru ala ẹka lanụ. G'ẹphe ha tụko shi l'ẹja; ọ bụru l'ẹja bẹ ẹphe tụkoru ala.
21 ?Bụ onye maru mẹ maa nemadzụ alajẹepho l'eli eviya; k'anụ-ẹgbudu nọdu alajẹ l'alị?”
22 Mu hụma l'ọ tọ dụdu iphe, kabarụ nemadzụ ree, abụdu g'akanya, oose tsọ iya ụtso; kẹle ọwa iya bụ okiphe iya. Kẹle-a; ?bụ onye sụru iya eduphu azụ g'ọ bya ahụma iphe, l'e-mechaa nwụa l'okotazụ iya?