5
Patanggal a komapet do kapangadwan
1 Manganak, kadngeyen mo o somnivog a kasolivan kano konseho a inanawo ko dimo,
2 tapian mapanmo mo o mayanong a dadakay as kaparin mo pa anti a masinchad do kapayliliak mo a ompavoya nia o somnivog a kasolivan.
3 No arek no kakovot no kadwan am makakakey kano manentasion,
4 asna moyvoh mo a mahap dia am pakasisian kano lijat no viay.
5 No akma saw a mavakes am pawnoten naymo do rarahan no kadimanan a di mo pakavolawan.
6 Karoan na o rarahan no viay. Matodin ava o pangwanan na takwan mapanmo nava o mayanong.
7 Inio a kamanganakan ko am adngeyen nio yaken as kaentero nio a di makawayak dia o vatahen ko saya.
8 Pachivawan nio sa o malalapos saya mavavakes as entero am maypasngen kamoava do aran pantaw no vahay da,
9 ta nia o ompakaro so anib dinio as kararayaw no viay nio so makalo do tanoro da no malolotod saya a tawo.
10 Otapan da dinio o kaynakman nio no di nio saya masinchad as no lijat nio am mangay do kadwan.
11 Mangwan kamo do vovon nio a mapatawos no ganit o karakohan nio,
12 as kavata nio anti sia, “Ango paro o di ko nanngeyan as kano ango paro chinaskeh ko a paynananawhen.
13 Nidngey ko sava o omnanawo diaken as nisikaso koava o niyokoyokoran niaken.
14 As sichangoriaw am tayto ko na didiwen o mahara a pakasnekan do kabo dana no anib diaken.”
15 Voyvoh o kakovot mo a torohan mo so addaw mo as kavidin mo a iya so ichaddaw.
16 No manganak do kadwan sa a mavavakes am tomoroh ava ya so ichapia mo.
17 No manganak mo sa o mismo a mayrakorakoh a somidong dimo asna sirava o kadwan.
18 Dawa makontento ka na do mismo mo a kakovot a iya so tomoroh so pakamian mo.
19 No addaw na kano mapia a kaparin na o tomoroh dimo so kayayakan.
20 Ta ara paro o inakyan mo nia o kahoho mo pa no kadwan a mavakes? Ango paro pipian mo sia o kakovot no kadwan.
21 Katovidan mo sa ya takwan no Apo taya am mavoya na o atavo a parinyen mo as aran dino angayan mo am mapanmo na pa.
22 As no gatos no asa ka tawo o mismo a omtolo sia a akmay pinospos a omvahod sia.
23 Madiman ya a makayamot do kadi na penpenan so karakohan na. No kakolangan no pinangtoktoan na o ompawnot sia a mangwan do vovon na.