24
-19-
1 Ichaynanahet mo sava o mararahet so parinyen as kano machirarayay kava dira,
2 ta nawri chitahen da o golo. Maday do kapayliliak da am mian sa o rarayawen da.
-20-
3 Maytetnek so mahni o familia do fondasion no kasolivan kano mapia a pinangtoktoan.
4 Ta do yanan no rakoh a kasolivan am oyod a mavid o katitiban no asa ka familia.
-21-
5 Mapipia o kayan no kasolivan as kano ayet. Oyod o kaimimportante no kasolivan as kano ayet no karakohan,
6 ta aran do gira am manma pa o kapaydisna a mapakapia sia iktokto o logar a parinyen. As do kaaroan no mapia konseho o ichapanghomis.
-22-
7 No mapia a vavatahen am taywara so karahem do abo so pinangtoktoan. Arava o mapia a mapavata na nia an mian o importante a pangononongan.
-23-
8 An fermi ka mayplano so marahet am mavahey ka anti a makey no golo.
9 Arava o mian do aktoktohen no marahet so pinangtoktoan an dia no marahet. Makapsopsok o fermi a nawri so parinyen o kaparahet na so kadwan.
-24-
10 An makaha ka do tiempo a kayan no problema am somnivog ka a makaha.
-25-
11 Omraradin kava a omlibri so tawo a abo so gatos a tori da gorogoren a mangwan do kadimanan na.
12 Maparin mo a vatahen o kabo no pachahapan mo do mapaparin do kadwan a tawo, pero no Dios o makapanmo so chintokto mo. Fermi naymo a tiban no Dios as iya o omprimio do tawo do parinyen da.
-26-
13 Manganak ko, tahaman mo o polot a oyod a mawnawnas.
14 Akma ya so mapia a kasolivan a oyod a makakakey. Katodahen mo tapian mapia o andelak mo.
-27-
15 Mayplano kava manakaw do mapia a tawo anmana pohsen moava o kaviayan na, ta oyod ya a marahet.
16 Aran masanib a madodog o mapia a tawo am mirwa sia mayvangon, pero mararayaw sa o omonot do marahet.
-28-
17 Ichayak moava o kayan no pakasisian no kakontran mo,
18 ta mapanmo na ya no Dios as ichakey nava ya, as tarek a do kwana anti saw am kastigoan na pava.
-29-
19 Problema mo sava o tawo a omonot do marahet anmana ichaynanahet mo sava.
20 Arava o mapia andelak no marahet so pariparinyen. Arava o mapia a panayahen na.
-30-
21 Sincharan mo a aniven o Apo taya, manganak, as kasinchad mo pa do patol. Machahap kava dira do machirebelde sa.
22 Ta maparin sa ya mararayaw so bigla. Ta mapanmo mo paro so hosto o rahmet no soli no Dios anmana no patol?
Makarapa pa sa a vavatahen
23 Vinata da pa ya no masosolib a tawo: Marahet do asa ka hoyis o kapangatatarek na.
24 An ideklara na o mian so sinadan a abo so gatos am mavay sia as kasoli nia no atavo a tawo,
25 pero no omhosga dira do somnada am mapia anti o viay na kano kasincharan sia.
26 No matalineng a atbay am asa ka kavoyan so somnivog a mapia kayvan.
27 Sigorohen mo o kaviayan mo manma kano kapatnek mo so vahay.
28 Maytestigo kava a laban do kapayengay mo an abo o mapia a rason mo anmana maychirin kava so maparahet sia.
29 Anmana vatahen moava, “Parinyen ko sia o pinarin nawri diaken. Vahsan ko sia.”
30 Minhavas ako do takey no matalakak as abo so pinangtoktoan a tawo.
31 Masaypet ya as kano magla o tamek dia as kararayaw no yongo na.
32 Tiniban ko as kapangtokto ko as kapanghap ko dia so nanawo.
33 Mangay ka maydisna as kapakaycheh mo. Pabolsahen mo o tanoro mo as kapaynehah mo pa,
34 pero do katori mo anti a makaycheh am mawara anti o kapakasiasi a akmay manakanakaw a omatake dimo.