3
No Paglintegan Dan Mangipangōlo do Iglisya
(1 Tim. 5:17-25; Tito 1:5-9; 1 Ped. 5:1-4)
1 Nyaya panyinyirin, ki oyod. No tawo a makey a mayparin a asa mangipangōlo dyirad manganohed saw, ki maganay ranta na, ta mapateg nya tarabāko.
2 Dawa, iyaw makey a mangipangōlo, ki machita a abaw pamagatosan da sya, as kan asa lang baket na. Machita maganay kapangtokto na, maigpet naw inawan na, kan anyiben dan tawotawo. Machita managpadagos kan maganay a mangnanawo.
3 Dyi pakono a maboboken, kan dya maranggas mana machidiman, an dya māsisyen. Machita rōpa aban kwarta.
4 Machita maornos kan mabilin na a mapyaw pamilya na tan mapanganohed na saw anak naw kan manganyib sa,
5 ta an kosokoso bōkod na pamilya do dyi na karawan a omaywan sira, maypāngo a maonongan na saw manganohed?
6 Asa pa, no makey a mayparin a pangōlo no manganohed, ki machita dya mawnged do kapanganohed na, ta āngonchan tomangsit a nawriw paynamotan na okomen no Dyos a madōsa akmas naparinaw di Satanas.
7 Asa pa a masisīta, ki nāw na pakono a malinteg do tabo kaparin na tan dyi da parahrahten no dyi paya manganohed, as kan tan dya masdok ni Satanas.
Siraw Kasidong do Iglisya
8 Masaw, siraw dyakonwaw do iglisya, ki machita a anyiben da sa no tawotawo kan dya sīping rida da. Maybobok saba mana mayāgom so kwarta, naten dana do makasnesnekaw a kapaychichwas.
9 Machita a nāw da mayit a abwa polos kapagmangamanga da do kapanganohed da do oyodaw a nanawo a inpakatoneng no Dyos dyaten.
10 Siraw nyaya a mayparin a kasidong do iglisya, ki machita manma masintir dadakay da, ta an mapaneknekan a maganay dadakay da, maparin sa a magsīrbi.
11 Komwan saw baket da saw. Machita anyiben da san tawotawo, kan maparaherahet saba. Machita taykalo saba do aran āngo a kalikāgom, kan mapagtalkan sad tabo a kaparin da.
12 Iyaw mayparin a dyakono, ki asa lang baket na, as kan maornos kan mabilin na pakono a mapyaw anak na sa kan pamilya na.
13 On, siraw dyakono saw a maganay a magsīrbi do rebbeng da, ki rakoh anchiw dāyaw no kapayngay da manganohed dyira, as kan sitotored sanchi a maychirin a maynamot do kapanganohed dad Kristo Jesos.
No Makaskasdāaw a Maynamot do Kapanganohed Ta
14 Hahawen ko a makalo kasarongkar ko dyimo. Ki aran komwan, itolas ko nya,
15 ta an mabalabalay ako, nyaya tolas ko pakatonngan mo an maypāngo maganay a kapaybibyay no manganohed saw. On, yaten a nanganohed, ki mimbros no pamilya no Dyos a iyaw iglisya no sibibyay a Dyos. Akma taw parey kan pondasyon a napatēnek kan mangtengtengel so oyod a maynamot di Kristo.
16 Ipodno taw makaskasdāawaya a kaoyodan a inpakatoneng no Dyos dyaten a inanohdan ta, ta iyaw nya a naitayo do nakarahan a maynamot di Kristo, ki malawag danas changori.
Ta si Kristo, ki nayparin a tawo kan nangay do lōbongaya.
Napaneknekan kalinteg na maynamot do Ispirito Santo
a aba polos pagkorāngan na,
as kan naboya dan tabo anghilis saw katan-ok na.
Naikaskasaba dyirad tawotawo do matatarek saw a nasnasyon,
kan āro dana sa do lōbongayaw nanganohed dya,
as kan inhap no Dyos do mismo a madaydāyaw kan matan-ok a yanan na.