13
Si Amnon kan si Tamar
1 Si Absalom a pōtot ni Dabid, ki myan mapintas a kakteh na a mabakes a mayngaran so Tamar. Do nakapaypahabas no chimpo, si Amnon a pōtot met ni Dabid, ki taywara iganyit na si Tamar.
2 Si Amnon, ki maynamot do taywaraw a kapāay na do kakteh naw a si Tamar, in-ganyit na. Ta si Tamar, ki birhin pa, kan iktokto na a dyi na maparin aran āngo a chakey na dya.
3 Ki myan di Amnon sīt na a mayngaran so Jonadab a pōtot ni Simea a kakteh a mahakay ni Dabid. Si Jonadab, ki oyod a masīkap a tawo.
4 Inyahes na di Amnon a kāna, “Āngo ta maydyagānyit pōtot nayan āri kāda mabekas? Ibahey mo pa dyaken.”
Binata ni Amnon dya a kāna, “Chadaw kwaya si Tamar a iyaw kakteh naw a mabakes no kakteh kwaw a si Absalom.”
5 Binata ni Jonadab dya a kāna, “Na, mangay ka maypoktad do katri mo, kan maysin-gaganyit ka. Anchan mapatakan ni āmang mo as yangay naymo a chiban, ibahey mo dya a kon mo, ‘Palobōsan mo paw kakteh kwaw a mabakes a si Tamar a mangay dya, kan manoroh dyaken so mākan. On, palobōsan mo pa a iyaw no mangisagāna so mākan do salapen ko tan maboyabōya ko, as kan tan pasobwan na yaken.’ ”
6 Dawa, nangay a naypoktad si Amnon kan naysin-gaganyit. Do nakangayaw no āryaw a omchideb sya, inbahey ni Amnon a kāna, “Palobōsan mo paw kakteh kwaw a mabakes a si Tamar a mangay dya, kan mamarin so tināpay do salapen ko tan pasobwan na yaken.”
7 Do dāwri, inpaibahey ni Dabid di Tamar do palasyowaw a kāna, “Mangay kad bahay no kakteh mwaw a mahakay a si Amnon, kan mangisagāna ka so mākan a para dya.”
8 Dawa, nangay si Tamar do bahay no kakteh naw a mahakay a si Amnon a myan a naypoktad. Nanghap so arina, as nakamāsa na sya, namarin so tināpay do salapen naw, as nakarotong na sya.
9 Do nakatayoka naw, inhap na a yapo do panotonganaw, as nakaidasar na sya. Ki chinaskeh ni Amnon komninan, kan inmandar na a mohtot sa tabo myanaw daw. Dawa, komnaro sa tabo.
10 Do dāwri, binata na di Tamar a kāna, “Yangay mo mākanaya do mamansokelaw a kwarto a pakaychehan ko tan pasobwan mo pa yaken.” Dawa, inhap ni Tamar iyaw no insagāna naw a tināpay, kan inyangay na do kakteh naw a si Amnon a myan do kwarto na.
11 Ki do nakaiyangay naw sya dya tan koman, tiniliw nas Tamar, as nakaibahey na sya a kāna, “Ka dya machoknod ka dyaken mo ādi ko.”
12 Tinbay na si Amnon a kāna, “Enggam akang! Pilīten mwaba yaken, ta rombeng aba maparin komwan do Israel! Parinen mwabaw nyaya oltimos karahet.
13 An yaken, āngo danaw rōpa ko a isalap ko dyirad tawotawo a maynamot do kasnek ko? As imo? Mayparin kanchi a akmas asa dyirad kararahtanaw a abos arang do Israel. Yahes mo pa do āryaw, ta baywan nabanchi yaken a machikabahay dyimo.”
14 Ki inadngey naba si Tamar, kan maynamot ta mayyiyit, rinames na.
15 Do dāwri, natādyan so taywara kaipsok iyaw no adaw naw ni Amnon di Tamar. No kaipsok na dya, ki mangamangay pa kan iyaw kadaw naw sya do dāmo. Inbahey na di Tamar a kāna, “Maybangon ka, as kahbot mo!”
16 Ki inatbay ni Tamar a kāna, “Enggam ākang, ta iyaw kapahbot mwaya dyaken, ki ad-adda pa a madi kan iyaw no pinarin mwaya dyaken.”
Ki inadngey naba si Tamar.
17 Tinawagan naw magsirsīrbyaw dya, kan binata na a kāna, “Paksyaten mo nyaya mabakes do salapen ko, kan itolbek mo anebaw anchan makahbot dana!”
18 Dawa, pinaksyat no magsirsīrbyaw si Tamar, as nakaitolbek nas anebaw do nakapahbot naranaw sya. Nakalaylay si Tamar so mayid a kagay a myan so mayid a tachay, ta nawriw gagāngay a laylay dan birhin a babbalāsang no āri do dāwri a chimpo.
19 Pinangayan ni Tamar so ahbek oho naw, as nakapirit nas mayidaw a kagay na a inlaylay na. Pinangay naw kakamay naw do oho na, as nakakaro na nakalyak a tomnanyis.
20 Iyaw kakteh naw a mahakay a si Absalom, ki binata na dya a kāna, “Naypariparinan nawri imo ni Amnon a kakteh mo? Magolimek ka, ta kakteh mo nawri. Ririboken mwabaw inawan mo do dyaya.” Dawa, minyan si Tamar do bahayaw no kakteh naw a si Absalom, ki nāw na maychaychatanyi a malidliday.
21 Do nakapatakaw sya ni Āri Dabid so tabo nyaya a naparin, taywaraw nakapakasoli na. Ki abaw pinarin na di Amnon maynamot ta iyaw matoneng a pōtot na kan chadaw na iya.
22 As si Absalom, ki aba polos inchirin na di Amnon a aran maganay mana madi. Inipsok na si Amnon maynamot do nakasnesnek na si Tamar a kakteh na a mabakes.
No Kadiman ni Absalom si Amnon
23 Do nakatayoka danaw no dadwa a katawen, pinagogodan ni Absalom karniro na saw do Baal-hasor a masngen do Epraim. Inawis na sa tabo pōtotaw a mahahakay ni āri a mangay daw a machipagpasken.
24 Nangay si Absalom do āryaw kan binata na a kāna, “Mo āri, ari akwaw a mapagogod siras karniro kwaw. Maparin abawri a awisen ko āri kan siraw magsirsīrbi dya a opisyalis na a machipasken dyaken?”
25 Ki inatbay ni āri a kāna, “Engga, mo anak ko ah. Tod kami a mangay a riribok dyimo an mangay kami a tabo.” Aran ipapīlit ni Absalom a machangay, ki alit na chinaskeh naw nangay. Basbāli a binindisyonan narana.
26 Do dāwri, binata ni Absalom a kāna, “An dyi kamo a mangay, palobōsan mo pa si Amnon a kakteh ko a machangay dyamen.”
Inyahes no āryaw a kāna, “Na, āngo paw angayan ni Amnon dyimo?”
27 Ki inpapīlit ni Absalom a nandan pinalobōsan na a machangay sa Amnon kan tabo kadwan pa saw a pōtot no āryaw dya.
28 Sinpangan na, inbilin ni Absalom dyirad magsirsīrbyaw dya a kāna, “Poōten nyo! Anchan madinyat dana si Amnon do kaynom naw anchi so palek, kan ibahey konchi dyinyo nya, ‘Kelbaten nyos Amnon,’ nawri dimanen nyo na. Chamo nyo aba. Nyaw bilin ko dyinyo. Payiten nyo kapangtokto nyo kan tomored kamo.”
29 Dawa, pinarin dan magsirsīrbyaw ni Absalom di Amnon an āngo inbilinaw ni Absalom dyira. Do dāwri, nanyeng a somnakay saw kadwanaw a pōtot ni āri dyirad mola da saw as nakapayyayo da.
30 Do kayan da paw do rarahan, nadāmag ni Dabid a “Diniman sa tabo ni Absalom iyaw pōtot saw ni āri. Aba polos natokos a mabyay dyira.”
31 Naytēnek iyaw āryaw, pinirit naw laylay naw, kan naydidiporis do tana. As sira tabo magsirsīrbyaw dya, ki naychatetēnek sa a nangpirit met so laylay da saw.
32 Ki si Jonadab a pōtot ni Simea a kakteh a mahakay ni Dabid, binata na a kāna, “Mo āpo ko, iktokto mwaba a tabo babbaro a pōtot mo, ki nadiman sa. Ta si Amnon lang iyaw nadiman. Iyaw nawri a bilin ni Absalom, ki inpangta na makayapod arawaw a nakarames ni Amnon so kakteh naw a mabakes a si Tamar.
33 Dawa, mo āpo a āri ko, chabakel mwabaw dāmagaya a nadiman sa tabo pōtot mo a mahahakay, ta si Amnon lang iyaw nadiman.”
34 As si Absalom, ki nayyayo.
Ranan kapariparin no nya, iyaw taga-wanawanaw do ahad no syodad, do nakatangay naw, ki naboya naw āro saw a tawotawo a madama a mosok do Horonaim a rarahan do bakrang naw no paytokonan do mamangketaw do lāod. Nangay na inpadāmag do āryaw a kāna, “Naboya ko āro saw a tawotawo do mamangketaw do Horonaim, do bakrangaw no paytokonan.”
35 Binata ni Jonadab do āryaw a kāna, “Chiban pa, siraw pōtot mwaw, ki tori saya īto. Naparin akmas binata kwaya a pachirawatan mo.”
36 Do nakatayoka naw ni Jonadab a naychirin, nakarapit saw pōtot saw ni āri, kan tomanyis sa so malyak. Aran iyaw āryaw kan sira tabo magsirsīrbyaw dya, ki naychatanyitanyis sa so taywara.
37 Ki nayyayo si Absalom, kan nangay do āryaw no Gesor a si Talmai a pōtot ni Ammihod. As si Āri Dabid, ki nagdongdong-aw so nahay a para do pōtot naw.
38 Do nakatayoka no nakapayyayo naw ni Absalom a nangay do Gesor, minyan daw so tatdo a katawen.
39 Do nakapakaliwliwa danaw ni Dabid do nakadimanaw ni Amnon, taywara a inahahay na a maboya si Absalom.