6
No Nakapabidi no Lakasānaw no Tōlag do Israel
1 Do nakayan danaw no papito a kabohan no lakasānaw ni ĀPO a minyan do tana dan Pilisteo,
2 pinatawagan dan tawotawowaw no Pilisteo siraw papādi saw kan mangarobōob saw, kan binata da dyira a kon da, “Āngo parinen ta do lakāsanaya ni ĀPO? Ibahey nyo dyamen an maypāngo kapabidi namen sya do gagāngayaw a yanan na.”
3 Initbay da a kon da, “An pabidihen nyo lakāsanaya no Dyos no Israel, iyangay nyo aba a abos mimyan ah, an dya parayayan nyo so dāton do gatos. Tan komwan, mapyan kamo kan matonngan nyo an āngo ta nāw na inyo a dosāen.”
4 Inyahes da a kon da, “Na, āngo dāton do gatos machitaya iyangay namen?”
Initbay da a kon da, “Dadima balitok a sinan dōgol, kan dadima balitok a sinan karam, sigon do bidang dan pangōlo no Pilisteo. Ta mayengay a pisti iyaw nangpalidyat dyinyo a tabo kan siraw pangōlo nyo.
5 Mamarin kamo siras sinan dōgol kan sinan karam a mangrārayaw so tana, kan anyiben nyo Dyos no Israel. Sigōro, dosāen na pabanchi inyo, siraw dyos nyo, kan iyaw tana nyo.
6 Āngo ta patwahen nyo pōso nyo a akmas pinarin daw no taga Egiptwaw kan si Paraon? Do nakalidyalidyataw no Dyos dyira, pinalobōsan da sabawriw Israelitaw a makahbot tan makangay sa do kwanan da?
7 “Ngay, mangisagāna kamo so bayo a karison kan dadwa a mapasoso a bāka a dyi pa napangapangayan so pāko. Ipalka nyo pākwaw no karisonaw do bāka saw, ki patengen nyo saw orbon da saw kan ipasto nyo sa.
8 Ahapen nyo lakāsanaw ni ĀPO, kan pangayen nyo do karisonaw. Posken nyo do kahonaw do bīt naw siraw naormaw a balitok a ipaw-it nyo dya a dāton do gatos. Ipaw-it nyo kan nolay nyo a mayam do rarahan na.
9 Ki chichiban nyo, ah. An somonget a komwan do bōkod na a tana do Bet-semes, chakey na batahen a si ĀPO nangyangay so rakohaya didigra dyaten. Ki an engga, chapatak ta na a iyabaw nangdōsa dyaten, kan naipatpatang lang a naparin dyaten.”
10 As dawa, pinarin daw nyaya. Nanghap sa so dadwa a mapasoso a bāka, kan pinapāko daw karisonaw kan inpasto da saw orbon daw.
11 Pinangay daw lakāsanaw ni ĀPO do karisonaw kontodo kahonaw a yanan dan naormaw a balitok a sinan karam kan sinan dogdōgol.
12 Do dāwri, tinarengteng dan bāka saw kominwan do Bet-semes a maymāma kan dya somniwasiwal do kawanan mana kaholi da. Inonotan dan pangōlo saw no Pilisteo manda do payis naw no Bet-semes.
13 Myan sa magap-āpit so trīgo daw do payahosongan siraw tawotawo saw no Bet-semes. Do nakatangay daw kan naboya daw lakāsanaw, chinasoyosoyot da do kaboya daw sya.
14-15 Nangay iyaw karisonaw do hakawanaw ni Joswe do Bet-semes, kan nagsardeng do bīt naw no rakoh a bato. Pinagchin dan Lebita saw lakāsanaw ni ĀPO kontodo kahonaw a nakaipangayan dan naormaw a balitok, kan pinalapaw da do rakohaw a bato. Inasdasda dan tawotawowaw kayo naw no karisonaw, kan sinosohan da saw bāka saw a diniman da a indāton da di ĀPO. Do dāwri met lang a araw, nangidāton saw tawotawo no Bet-semes so masosohan saw a dāton kan kadwan saw a dāton di ĀPO.
16 Naboya dan dadimaw a pangōlo dan Pilisteowaw tabo nyaya, as naybidi dana sa do Ekron do dāwri met lang a araw.
17 Siraw nyayaw balitok saw a sinan dōgol a inpaw-it dan Pilisteo saw a dāton da di ĀPO a pakapakawanan gatos da. Tayisa para do Asdod, Gasa, Askelon, Gat, kan Ekron.
18 As iyaw bidang no balitok saw a sinan karam, ki naparin sigon do bidang no syodad a Pilisteo a dyira dan dadima saw a pangōlo a nakairamānan dan nakotāan saw a idiidi kan sīcho da saw. Iyaw rakohaw a bato a napangayan da so lakāsanaw ni ĀPO do hakawanaw ni Joswe a taga Bet-semes, ki pamaneknek pa a manda sichangori.
19 Ki diniman sa ni ĀPO papito a poho dyirad tawotawo no Bet-semes, ta chiniban daw irahem no lakāsanaw ni ĀPO. Nagdongdong-aw saw tawotawo maynamot do taywara a maranggas a nakapangdiman a pinarin ni ĀPO dyira.
20 Do dāwri, inyahes dan tawotawo saw do Bet-semes a kon da, “Sino makapaytēnek do salapen ni ĀPO a iyaw masantwanaya Dyos? Dino paro pangikwanan ta sya tan maypateng dyaten?”
21 Do dāwri, nanoboy sa siras nangay dyirad omidyaw do Kiryat-jearim a nangibahey sya dyira a kon da, “Pinabidi darana no Pilisteo saw lakāsanaw ni ĀPO. Mosok kamo, ta isonget nyo na do yanan nyowaya.”