30
No Kapachigobat ni Dabid Dyirad Amalekita saw
1 Do chatatdo naw a karaw, nakarapit sa Dabid kan bonggoy na saw a mahahakay do idi a Siklag. Ki sakbay no nakawara da, rinaot dan Amalekitaw do Negeb kan Siklag. Dinarop daw Siklag, as nakasosoh da sya.
2 Inakaw da pa saw mababakes saw kan aran sino a myan daw a adedekey kan mangalkem. Abaw diniman da dyira, ki inakaw da sa tābo.
3 Do nakawara daw da Dabid kan bonggoy na saw a mahahakay do idyaw, naboya darana nasosohan, kan siraw babbaket kan pōtot da saw a mahahakay kan mababakes, ki naakaw sa.
4 Dawa, sa Dabid kan bonggoy na saw a mahahakay, ki tomnanyis sa so malyak a mandan abo danaw ayit da a tomanyis.
5 Siraw dadwaw a baket ni Dabid, ki naakaw sa met a si Ahinoam a taga Jesreel kan si Abigail a bālo ni Nabal do Karmel.
6 Rakoh kabakel ni Dabid, ta inchirichirin dan rārayay na saw a mahahakay a iya, ki oboren da. Ta kāda asa dyira, ki palālo no kapagmamayo da do kabo dan pōtot da saw a mahahakay kan mababakes. Ki si Dabid, ki pinayit naw kapangtokto na di ĀPO a Dyos na.
7 Do dāwri, inbahey ni Dabid di Abyatar a pādi a pōtot ni Ahimelek a kāna, “Yangay mo pa dyaken epodaw.” Dawa, inyangay ni Abyatar dyaw epodaw,
8 kan inyahes ni Dabid di ĀPO a kāna, “Yangay ko sawri a lakatan nangraot saw? Madas ko paro pa sa?”
Ki binata ni ĀPO dya a kāna “On, lakatan mo sa. Ta masigorādo a madas mo sanchi kan isalākan mo sa.”
9 Dawa, si Dabid kan siraw anem a gasot saw a rārayay na a mahahakay a myan dya, ki nangay sa do marahawaw a payahosongan a Besor a dawriw nakatokosan dan kadwanaw.
10 Ta siraw dadwa gasot saw a mahahakay a bōyot na, ki naanōsan dabaw mamtang do payahosonganaw maynamot do oltimo a kahopag da. Ki si Dabid kan iyaw apat a gasot saw a mahahakay a bōyot na, ki tinongtong daw manglakat.
11 Do kapanglakat daw, nakadongso sa so baro a taga Egipto a nainonolay do let-ang, kan inyangay da di Dabid. Tinorohan da so ranom kan kanen na.
12 Nanoroh sa dya so kakchid no nakolay a igos kan dadwa a kaormaan no napihpih a pasas. Kinan na kan naybidiw ayit naw, ta aba polos kinan na mana ininom na ranom do irahem no tatdo a karaw kan tatdo a kahep.
13 Inyahes ni Dabid dya a kāna, “Sino āmo mo, kan taga dino ka?”
Tinbay na a kāna, “Na, taga Egipto akwaw a adīpen no asa a Amalekita. Ninonolay naw yaken no āmo kwaw do nakaganyit kwaw do nakahabasaya a tatdo a karaw.
14 Rinaot namenaw do Negeb do tanaw a dyira no Keretita kan do tanaw a dyira no Joda kan do Negeb do tanaw a dyira ni Kaleb, as kan nakasosoh namen so Siklag.”
15 Inyahes ni Dabid dya a kāna, “Maiyosok mori yaken do yanan dan nangraotaya?”
Inatbay no barwaw a kāna, “Isapata mo pa dyaken do ngaran no Dyos a dimanen mo abanchi yaken mana pabidihen do tanoro no āmo kwaw tan iyosok koymo do yanan daw.”
16 Inyosok na sa Dabid do yanan da, kan nadongso da saw Amalekitaw a naychawpit do tana a madama sa a maychakakan kan maychaynoynom kan maychatatāda a magragragsak maynamot do kāro no nasamsam da yapo do tana daw no Pilisteo kan do Joda.
17 Dinarop da sa da Dabid nakayapo do kapaysarisari a manda do kamahep no somaronwaw a araw. Abaw nakalības dyirad Amalekita saw malaksid dyirad apat a gasot saw a babbaro a nayyayo a nakasakay do kamilyo saw.
18 Inhap na tabo ni Dabid iyaw inakaw saw no Amalekita kontodo dadwaw a baket na.
19 Abaw aran asa nabo a aran adekey mana malkem, mahakay mana mabakes, siraw nasamsam saw mana aran āngo a inakaw da. Pinaybidi sa tabo ni Dabid.
20 Inhap na paw tabo karniro, kalding, kan bāka dan Amalekita. As siraw rārayayaw a mahahakay ni Dabid, ki inābog da sa a pinanmanmaw binyay saw kan dyira daw da Dabid, kan binata da a kon da, “Nya sa, ki dyira tabo ni Dabid!”
21 Sinpangan na, naybidi dana sa Dabid dyirad dadwa gasot saw a natokos do marahawa a payahosongan a Besor a dya nachonot do oltimo a kahopag da. Nangay sa a minbayat da Dabid kan bonggoy na saw a mahahakay a myan dya. As do nakapaypasngen daw da Dabid, kinablaāwan na sa.
22 Ki siraw tabo marahet kan abos sirsīrbi a mahahakay dyirad rārayay na saw a nachangay di Dabid, ki binata da a kon da, “Maynamot ta nachangay sabaya dyaten, bingayan ta saba so nasamsam taya. Ki kāda mahakay, ki maparin a hapen naw baket na kan siraw anak na, as kan kayam narana.”
23 Ki inatbay sa ni Dabid a kāna, “Engga, komwan aba, kakakteh. Komwan abaw parinen nyo do intorohaya ni ĀPO dyaten. Inaywanan na yaten kan inparawat na sa do tanoro ta siraw nangay saw a nangraot dyaten.
24 Sino paro mangadngey dyinyo an komwan ibahebahey nyo? An āngo binglay no mahakay a minosok a nachigobat, ki machiyengay binglay na do natokosaw do warawara. Tabo, ki mayeyengay sa so binglay.”
25 Makayapo dāwri a araw, ki pinayparin ni Dabid nawri a pangeddeng kan kapangokom no Israel a manda sichangori.
26 Do nakapakarapit daw da Dabid do Siklag, inpapaitoroh naw kadwan saw a inhap da a mangay dyirad panglakayen daw no Joda a sisīt na, kan binata na a kāna, “Chayaw rigālo a para dyinyo a yapo do warawara daw no kabōsor ni ĀPO a inhap namen.”
27 On, inpapaitoroh na dyirad do Betel, do Ramot no Negeb, do Jattir
28 do Aroer, do Sipmot, do Estemoa,
29 do Rakal, do idiidi da saw no Jerahmeelita kan siraw Kenita,
30 do Hormah, do Bor-asan, do Atak,
31 do Hebron, as kan do tabo kadwan saw a yanan a nangangayan na a naybidibidyan ni Dabid kan bonggoy na saw a mahahakay.