20
Si Dabid kan Jonatan
1 Sinpangan na, nayyayo si Dabid a yapo do Nayot do idi a Rama, kan nangay di Jonatan. Inyahes na dya a kāna, “Āngo pinarin ko? Aryoriw marahet a naparin ko? Āngo nagkamalyan ko di āmang mo, ta rakohayaw kakey na mangdiman dyaken?”
2 “Na, abaya!” initbay ni Jonatan. “Madiman kaba met! Chiban mo, parinen naba ni āmang ko aran āngo a bānag a rakoh mana dēkey an dyi na ipakatoneng dyaken. Āngo ta itayo na dyaken nyaya? Komwan aba met ah!”
3 Ki insapata ni Dabid a kāna, “Taywara a chapatak ni āmang mo an maypāngo kasinged ta maysīt. Dawa, iniktokto na a kāna, ‘Machita dyi na mapatakan ni Jonatan nya tan dya maliday.’ Ki aran komwan, akmas kasigorādo no kasibibyay ni ĀPO kan mabyay ka, myan asa lang a dakwang do naypayawan namen kan kadiman.”
4 Binata ni Jonatan di Dabid a kāna, “Aran āngo ipaparin mo dyaken, parinen ko a para dyimo.”
5 Dawa, inbahey ni Dabid a kāna, “Anchan delak, ki Pista no Samorang. No gagāngay, ki machihanghang ako di āri. Ki mangay akonchi a tomayo dwa hakawanaw, kan nāw konchi daw mandanchan mahep no maikatdwaw a araw.
6 An madlaw nanchi ni āmang mo a abo ako daw, ibahey monchi a kon mo, ‘Nachikakaāsyaw si Dabid dyaken so pamalōbos a malisto a somabat do Betlehem a idi na, ta myan tinawen a kapangidāton a para do kapamilyaan na.’
7 An ibahey nanchi a kāna, ‘Na, maganay ah!’ Chapatak mo nanchi a abaw pakaan-anwan no pachirawatan mo. Ki an makasolinchi, nawriw kapatakan mo sya a disidido a mapaynyin dyaken.
8 As imo, ipaboya mo pakono kapodno mo dyaken a pachirawatan mo, ta nagtōlag ta do salapen ni ĀPO. Ki an naygatos ako di āmang mo, imo dana mismo mangdiman dyaken ah. Āngo ta iparawat mo pa yaken di āmang mo?”
9 Binata ni Jonathan a kāna, “Polos! An myan nasirip ko a aran akmay dedeng a panggep ni āmang ko a mangdiman dyimo, ibahey ko abawri dyimo?”
10 Inyahes ni Dabid a kāna, “Na, sino paronchiw mangibahey dyaken an tombay si āmang mo dyimo a makasokasoli?”
11 Tinbay ni Jonatan si Dabid a kāna, “May ta pa dwa hakawan.” Dawa, nangay sa.
12 Binata dana ni Jonatan di Dabid a kāna, “Si ĀPO a Dyos no Israel iyaw tistīgo. Kasarīta konchi a sintiren si āmang ko do komwan a ōras an delak mana do somaronwaw a araw. An chahwahok naymo, ipadāmag konchi dyimo.
13 Ki amnan isoli naymo kan myan marahet a panggep na dyimo, dosāen pakono yaken ni ĀPO so taywara an dyi ko a ipadāmag dyimo tan mapayyayo koymo a abaw pakaan-anwan mo. Myan pakono si ĀPO dyimo akmas kayan na di āmang ko.
14 Ki an nāw ko pa sibibyay, ipaboya mo pa dyaken no dya mabdibdis a kadaw ni ĀPO tan dyi ako a madiman.
15 Nāw na pakono no nya kadaw mo dyirad pamilya ko, aran opasen ni ĀPO tabo kabōsor mo do tanaya.”
16 Dawa, intōlag ni Jonatan di Dabid karāman pamilya na a kāna, “Si ĀPO dana pakono mamahes dyirad tabo kabōsor mom Dabid.”
17 As minirwa a inpaisapata ni Jonatan di Dabid a tongpalen naw tōlag daw a maynamot do kadaw ni Dabid dya, ta taywaraw kaipateg sya ni Jonatan a akmas kadaw naw so inawan na.
18 Sinpangan na, binata ni Jonatan di Dabid a kāna, “Delak danaw Pistaw no Samorang. Madlaw danchiw kabo mo, ta abanchiw maydisna do disnan mwaw.
19 Anchan mahep no chatatdo naw a araw, ki mangay kanchi do tinaywan mwaw, kan mangnanaya ka do nawpwaw a bato.
20 Mohtot akonchi a mapapana so tatdo a dāwa no bai do bīt naw no nawpwaw a bato a akmay dawriw nahonahohen ko.
21 Manoboy akonchi so barīto, kan ibahey konchi dya a kon ko, ‘Yay mo pa chichwasen saw dāwa no bai kwaw.’ Ki an ibahey ko dya a ‘Chiban pa, ari do salapen mwaya. Hapen mo bai saw.’ No chakey na batahen, ki mangay ka, ta akmas kasigorādo no kasibibyay ni ĀPO, abaw danag kan pakaan-anwan mo.
22 Ki an ibahey ko do barītwaw a kon ko, ‘Chiban pa, toryaya dwadaw a matateng kan imo.’ No chakey na batahen komaro ka na a sigīda. Ta si ĀPO, ki toboyen narana imo a maypabawa.
23 As nya tōlag ta, ki si ĀPO iyaw mangpaneknek do nagbaetan ta a abos pandan.”
24 Dawa, tomnayo si Dabid do hakawan. As do Pistaw no Samorang, naydisnaw āryaw a koman.
25 Naydisna iyaw āryaw do gagāngayaw a paydiydisnan na a masngen do dyindyin, kan somalap di Jonatan. As si Abner, ki myan do bīt naw ni Saulo. Ki iyaw disnanaw ni Dabid, ki abaw naydisna.
26 Naylilyak aba si Saulo do dāwri a araw, ta iniktokto na a kāna, “Ari ngataw naparin di Dabid a mapayparin dya a maibidang a dya madalos sigon do linteg. On, madalos aba, ngata.”
27 Ki do somaronwaw a araw, do kamabekasan naw no chadadwa naw a araw no Pista no Samorang, alit na pa a abo naydisna do paydisnanaw ni Dabid. Dawa, inyahes ni Saulo do pōtot naw a si Jonatan a kāna, “Āngo ta dya nangay a machihanghang potōtaw ni Jesse kakoyab paw kan aran sichangoryaya?”
28 Ki initbay ni Jonatan a kāna, “Nachikakaāsyaw a nangdaw so pamalōbos dyaken a mangay do Betlehem.
29 Binata naw a kāna, ‘Palobōsan mo pa yaken a komaro, ta myanaw kapangidāton namen a asa kapamilyaan do idi, kan inbilin ni ākang ko a myan ako daw. An chahwahok mo yaken, palobōsan mo pa yaken a mangay a manyideb siras kakakteh ko saw.’ Ta dawa, abo dyaya a machihanghang do lamisaan no āri.”
30 Somindeb iyaw soli ni Saulo di Jonatan, kan inbahey na dya a kāna, “Imo a anak no dyīdo kan ribīldi a ānang! Chapatak ko abawri a pinidi mo pōtotaw ni Jesse, kan inyasnek mo inawan mo kan iyaw bōkod mo a ānang?
31 Ranan kasibibyay no nawri a pōtot ni Jesse do tanaya, makapagāri kabanchi a polos mana mapatnek abaw pagāryan mo. Changori, manoboy ka siras mangyangay sya dyaken, ta machita a madiman!”
32 Inyahes ni Jonatan di āmang na a kāna, “Na, āngo ta ipadiman mo? Āngo pinarin na ta dawa?”
33 Ki pinalbot ni Saulo di Jonatan iyaw chibot naw. Dawa, napatakan ni Jonatan a pinanggep ni āmang na a dimanen si Dabid.
34 Komnaro si Jonatan do kanan daw a nakasokasoli. Komninan aba do dawri a somarono a araw no pista a maynamot do rakoh a kaliday na do komwan a makasnesnek a kaparin ni āmang na di Dabid.
35 Do kamabekas, nangay si Jonatan do hakawan a may a omchideb di Dabid, kan myan rārayay na a barīto.
36 Binata na do barītwaw a kāna, “Mayyayo ka, kan yay mo sa a chichwasen ipana ko saya a dāwa no bai.” Ranan na mayyayo no barītwaw, ki nangipana dana do panman naw do matatengaw kan iya.
37 Do nakapakarapit naw no barītwaw do nakanahwan naw no dāwa no bai a inpana na, binata dana ni Jonatan a kāna, “Na, toryaya dwa matatengaya kan imo.”
38 As nginēyan narana a kāna, “Ngay, kalisto ka! Nāw mwaba daw!” Dawa, kinalistwan barītwaw a binagot kan pinabidi na do āmo naw.
39 Ki chapatak naba no barītwaw an āngo chakey a batahen nawri. Sa Jonatan lang kan Dabid, makapatak sya.
40 Sinpangan na, intoroh ni Jonatan do barītwaw bai naw kan binata na a kāna, “Mayam ka na, kan sahabiten mo na a paybidi dwa idi.”
41 Do kabo danaw no barītwaw, minohtot si Dabid a yapo do bīt naw no nawpwaw a bato kan naysasakeb do tana a nagdomog so naypitdo. Naysinkepkep sa kan Jonatan a tomnanyis, naten dana di Dabid.
42 Binata ni Jonatan di Dabid a kāna, “Mayam ka na a sitatalna, ta nagsapata ta naya do ngaran ni ĀPO a kon ta, ‘Si ĀPO, iyaw tistīgo do nagbaetan ta, kan do nagbaetan dan kapotōtan ta a abos pandan.’ ” Sinpangan na, komnaro dana si Dabid, as naybidi met si Jonatan do idi.