5
No Nahon a Papil kan no Karniro no Dyos
1 Do dawri, naboya ko do kawananaw a tanoro no maydisnaw do trono iyaw no natapitapidaw a nahon a papil a maychamibit so tolas, as kan nakolaan so papito a silyo.
2 Do dawri, nakaboya ko so mabīleg a anghil a mangingengengey sya a bata na, “Sino iyaw maikari a mangalkab so silyo saya as kabolay na so nahonaya papil?”
3 Ki aba polos makaparin mana maikari do hanyit mana do tanaya mana do yanan daw no nadiman a ombolay so nahonaya a papil tan basāen na.
4 Do dawri, naychahoho ako maynamot ta abaw maikari a ombolay sya tan basāen na.
5 Sinpangan na, asa dyirad panglakayenaw nangibahey sya dyaken a kāna, “Tomanyis kaba, ta mangābak dana do marahet no mangarananaw so Lion a yapo do kapoonan no Jodya a iyaw no magdindināmagaw a kapōtotan ni Āri Dabid. Ta iya, ki natorohan so kalintegan a mapakaro so papitwaya silyo kan mamolay so nahonaya a naitolas.”
6 As do hobok naw, do payawanaw no tronwaw kan siraw no sibibyayaw a apat a parswa kan siraw panglakayenaw, naboya ko iyaw Karnirwaw a maytēnek a akmay myan so bigar a nakayapwan no nakadiman na. Myan iyaw no papito a olong na kan papito a mata na. No chakey na batahen, ki iyaw Ispirito no Dyos a myan so papito a pakapaboyan so panakabalin na kan natoboy do kāda yanan do lōbongaya.
7 Do dawri, domnakwang as nakahap nas nahonaw do kawananaw a tanoro no maydisnaw do tronwaw.
8 As do nakahap naw so nahonaw, ki siraw apataw a sibibyay a parswa kan siraw no dadwaw a poho kan apat a panglakayen, ki nagrōkob sad salapenaw no Karnirwaw. Kāda asa dyira, ki myan iyaw no pagtokaran na a arpa kan balitok a sabak a nakapnwan insinso. No chakey na batahen, ki napno do āro a dasal da no tawotawo saw no Dyos.
9 Do dawri, nagkanta sa so asa bayo a kanta a kon da,
“Imo iyaw maikari a omhap so nahonaya a pagbasāan
kan mangalkab so silyo na saya, as kan ombāsa sya.
Ta diniman daymo, kan maynamot do nakawyog no raya mo,
insalākan mo saw tawotawo a maitoroh do Dyos
a yapo do kāda tribo, nasyon, kan chirin a matatarek.
10 Pinarapa mo sa do pagtorayan mom Āpo
tan machipagtoray sanchi dyimo do lōbongaya.
On, pinayparin mo sa a papādi mo
tan nāw da magsīrbi do Dyos ta.”
Magdaydāyaw do Dyos Tabo Anghilis kan Tabo a Naparswa
11 Sinpangan na, nanyideb ako na. Ki nakadngey akod omdibonaw no trono kan siraw sibibyayaw a parswa, as kan siraw panglakayenaw so timek dan reprepaw a anghilis, kan abaw polos a makabidang sira.
12 Inngengengey da a kon da,
“Maikari iyaw Karniro a nadiman, as kan maparin a mangrawat
so panakabalin, kinabaknang, kasīrib, kan kayit,
dāyaw, tan-ok, kan bindisyon a abos pandan!”
13 Nadngey ko pa saw tabo naparswaw do hanyit kan do tanaya kan do yanan daw no nadiman, as kan do tāw a mangibahebahey a kon da,
“No maydisna do tronwaya kan iyaw Karnirwaya,
ki maitoroh pakono dyiraw pamindisyon kan dāyaw
kan tan-ok kan toray a abwa polos so pandan!”
14 As siraw no apataw a sibibyay a parswa, ki binatabata da, “Maparin pakono a komwan! Amen!” As siraw panglakayenaw, ki nagrokbab sa a nagdāyaw.