2
Siraw Bindisyon a Itoroh no Kinasīrib
1 Anak ko, rawaten mo pakono inchirin kwaya dyimo,
kan kapyahen mo bilbilin ko saya dyimo.
2 Mangikāso ka so kinasīrib,
kan ipasnek mo a iktokto tan myan kapakaāwat mo.
3 Ta an manawag ka a mangdaw so marahem a kapangtokto,
kan ingēngey mo a akdawen kapakaāwat,
4 as an chichwasen mo a akmas kapaychichwasaw so pirak,
mana kahlen mo a akmas kapanyidebaw so mabalor saw a naitayo,
5 dāwrinchi maawātan monchiw kaanyib di ĀPO,
kan masarakan monchiw kapakatoneng a maynamot do Dyos.
6 Ta si ĀPO, manoroh so kinasīrib,
kan yapo pa dyaw kapakatoneng kan kapakaāwat.
7 Iyaw mangapya so kosto a kinasīrib dyirad malinteg,
kan iya paw sarāpa dan maybibyayaw a masingpet.
8 Gwardyaan naw ayayaman no kinalinteg,
kan aywanan naw rarahan dan mapopodno.
9 Do dāwri, maawātan monchi an āngo kinalinteg, kosto, kan dya mangidomdōma.
On, maawātan monchiw tabo ayayaman a maganay.
10 Ta kinasīrib anchiw mangigpet so pangtokwan mo,
kan kapakatoneng, ki paragsaken nanchimo.
11 Kosto a kapangeddeng, ki aywanan nanchimo,
kan kapakaāwat, ki onongan naymo.
12 Idichan nanchimo no kinasīrib do dadakay dan marahet,
dyirad nailabay saw do dyīdo a kapaychirin
13 a somiwal do rarahan no malinteg a kabibyay
a mayam do ayaman no masari a kayiyan
14 a magraragsak a mamarin so madi,
kan masoyosoyot do tayib a dadakay no marahet.
15 Siraw nya tawo, madyīdo so ayayaman,
as kan masīkap payrarahanan da.
No Kadichan so Kapachikamalāla
16 Kinasīrib, mapadichan dyimo do machikamalāla a mabakes,
do baket a dya mapodno a malalamōyot so kapaychirin.
17 Kinarwan naw kabahay na a yapo do kabayobayo da pa,
kan inkaskāso na pabaw kari na do salapen no Dyos.
18 Ta iyaw bahay na, ki myan do rarahan a mapawnot dyimo do kadiman,
kan siraw ayaman a komwan dya, mangay do yanan nadiman.
19 Aba polos makapaybidi a somdep do bahay na
mana makapirwa lomongo do maganay a byay.
20 Dawa, manakey ka do rarahan no maganay a kabibyay,
kan nāw mo dyirad ayaman no kinalinteg.
21 Ta siraw malinteg, omyan sanchi do tanaya,
kan siraw abwaw so pakapilāwan, mabidin sanchi.
22 Ki siraw marahet, pakarohen sanchi ni Āpo Dyos do tanaya,
as siraw maranggas, mabagot sanchi a akmay mohamoha.