18
1 No tawo a machitarek, chichwasen naw bōkod na a chakey,
kan kontraen naw tabo kosto a kinasīrib.
2 No abos arang a tawo, chasoyot nabaw kapakaāwat,
basbāli a charagsak naw mangibahey so mismo na a kapangtokto.
3 Do kayan karahet, machirayay kabon anyib,
kan do kayan abos dāyaw, mangay pas asnek.
4 Chirin saya a mohtot do dangoy, akmay marahem a ranom,
as iyaw akbod no kinasīrib, akmay oksong a nāw na moyog.
5 Maganay abaw mangisakit so marahet a tawo
mana mangbalat so kalintegan no malinteg.
6 No chirin do bibi no abos arang, mapahtot so kapaydidiman,
kan no chirin do dangoy na, mangāwis so kapagbāot.
7 Iyaw chirin a yapo do dangoy no abos arang, nawriw pakarārayawan na,
as no ichirin naw do bibi na, mangasdok so mismo na inawan.
8 Siraw chirin a kaparaherahet, akma say taydedekey a maīmas
a romapit do makatayrahem a katatawo.
9 No masadot do kapaytarabāko na,
ki akmay kakteh no asa mangrārayaw.
10 Iyaw ngaran ni ĀPO, akmay mahnyi a kōta.
Pachikamītan no malinteg a tawo, kan maparoparo aba.
11 Iyaw kinabaknang no mabaknang, akmay mayit a syodad dya,
kan arapaapen na a akmay ahad a dya makayat kakarang na.
12 Sakbay no karārayaw, mapangas tawo,
ki kapakombaba, manmanma kan kaidāyaw.
13 No makatbatbay sakbay a mangadngey,
nawriw mangipaboya so kabon sīrib kan kasnekan na.
14 No kakey no tawo a mabyay, manoroh so kaibtor na do ganyit,
ki an maōpay ispirito na, makaibtorori?
15 Iyaw aktokto no makailāsin, manghap so kapakatoneng,
as no tadyinya dan masīrib, chichiwasen daw kapakapatak.
16 Iyaw rigālo, mangiwang so pantaw do manoroh,
kan mangyangay sya do salapen dan mabīlegaw a tawo.
17 Iyaw manma a mangilawlawag do pangokoman so kāso na, akmay iya danaw kosto
a mandad kangay no matarek a mangosisa sya.
18 Iyaw kapagbibinōnot, penpenen naw kapaydidiman,
kan mapaysonong do payapayawan dan mabibīleg saw a maglalāban.
19 No napaynyinan a kakteh, malidyalidyat machikapya dya kan somdep do naahadan a syodad,
as kapaydidiman, mapaysisyay a akmay narihasan a rowangan no kōta.
20 Yapo do omno a kapaychirin na, mabsoy tawo,
kan do chirin no bibi na, iyaw mangapnek sya.
21 Kadiman kan kabyay, myan do panakabalin no rida,
as siraw madaw a maysawasawat, kanen da sanchiw asi na.
22 No makachichwas so baket na, makadongso so maganay,
kan rawaten naw pakahwahokan ni ĀPO.
23 No mapobri a tawo, mapakombaba a mangdakdaw,
ki no mabaknang, tombay a mangbogkaw.
24 Myan saw machisīt a machisīsisit a maparin a mangrārayaw,
ki myan sīt a masingsinged pa kan mismo naw a kakteh.