3
No Rebbeng a Parinen no Maychakabahay
(Epe. 5:22; Kol. 3:18)
1 Changori, inyo a mababakes, mapaitoray kamo dyirad kabahay nyo. Ta an myan dyiraw dya manganohed do chirinayan Āpo Dyos a ononotan nyo, nawriw paynamotan da manganohed a aran dyi nyo a ilawlawag dyira.
2 Ta maboya danchi a mismo do manyib kan masingpet a kabibyay nyo.
3 Iktokto nyo abaw makatayhapot lang a kapintas nyo a akmas kaornos nyo so boboh nyo kan kapangosar nyo so mangingīna a alahas mana kapaylaylay nyo so mapintas.
4 Ad-adda masisīta a nawriw mangpapintas dyinyo maganayaw a kapangtokto nyo a yapo do makatayrahem a katatawo nyo a akmas kapakombaba nyo kan kaānos nyo. Siraw nyaya pakono manoroh so kapintas nyo, ta siraw mapapateg di Āpo Dyos, as kan marārayaw saba.
5 Iyaw nyayaw pinarin daw no masisingpet saw a mababakes kaychowa a nagtalek do Dyos, ta pinangpapintas da so inawan da iyaw kaipaitoray daw so inawan da dyirad kabahay da.
6 Ta akmas simna Sara, ki nanganohed di Abraham a kabahay na, as kan inbidang na a iya, ki āmo na. As dawa, inyo a mababakes sichangori, maibidang kamo na a anak ni Sara an tolāden nyo pinarin naya, kan apabaw chabakel nyo.
7 Ki inyo a mahahakay, masisīta iyaw kaaywan kan kaitoroh nyos anyib dyirad kabahay nyo saya. Ta aran makapkapsot sa kan inyo a mahahakay, ki alit na machirāman sa dyinyo a mangrawat so byay a abos pandan. Tan komwan, ki adngeyen Āpo Dyos dasal nyo.
No Kapangnanawo Maynamot do Kinalinteg
8 Sichangori, kakakteh, no paytābwan no chakey na batahen dya, ki māsa kamo pakono do kapangtokto kan kapachipangdidiw do kapayngay nyo a manganohed. Maysin-aadaw kamo pakono a akmay mismo a makakakteh, kan maysinchachāsi kamo, as kan maysinpapakombaba kamo.
9 An myan mapaynyin dyinyo, bahsen nyo aba. Masaw an myan omabay dyinyo, abayen nyo aba, basbāli a mamarin kamos maganay dyira. On, parinen nyo pakono maganay dyira, ta tinawagan naynyo ni Āpo Dyos tan bindisyonan naynyo so abos pandan a byay.
10 Ta akmas naitolasaw do Masantwan a Tolas a kāna,
“No makey a mayparin a maganay so byay do tanaya
kan mayparin a maragsak,
machita dya maychirin so marahet
kan dya maybayataw.
11 Machita a tadyichokodan na saw marahetaya kaparin na,
kan nawriw parinen naw maganay.
Machita a nāw na chichichwasen kapachikapya
a machikayban dyirad rārayay na.
12 Ta no kapanyideb ni ĀPO, ki ari dyirad malinteg saw,
kan kadngeyen naw katanyis da so sidong.
Ki kontraen sa ni ĀPO siraw mamarinaw so marahet.”
13 Ta sino paro mapaynyin dyinyo an ipasnek nyo mamarin so maganay?
14 Ki aran paynyinan daynyo a maynamot do kapamarin nyowaya so malinteg kan maganay, ki alit na magāsat kan masoyot kamo. Dawa, mamo kamo aba dyira, kan mariribokan kamo aba,
15 basbāli a nāw nyo pakono a anyiben si Kristo kan dayāwen nyo a Āpo nyo do makatayrahem a aktokto kan pōso nyo. Machita a pirmi a nakasagānaw atbay nyo an myan manahes dyinyo so kailawlawag no hahawen nyowaya do Dyos. Ki parinen nyo nyaya do makahwahok a kapaychiychirin nyo a mapawnotan so anyib nyo.
16 Nāw nyo pakono a madalos so pangtoktwan kan abo marahet a dadakay nyo. Ta siraw mangoyawaw dyinyo do maganay a pinarin nyo a maynamot do nakawnot nyo di Kristo, ki tod sa masnesnekan a maynamot do chinirichirin daw.
17 Ta an nawriw chakey ni Āpo Dyos, maganaganay an makataham kamo so lidyat a maynamot do nakapamarin nyo so maganay kan iyaw maglak-amaw so lidyat a maynamot do nakapamarin nyos marahet.
18 Ta aran abo gatos ni Kristo, ki alit na tinahaman naw kadiman tan mapakawan tad āro a naygatosan ta. On, no chakey na batahen, naypisa lang a nadiman malintegaw tan mapaybidi na do Dyos siraw dya malinteg. Ta oyod a diniman da si Jesos do inawan na, ki pinagōngar no Dyos, as kan nāw na a sibibyay do ispirito.
19 As do ispirito naya, ki nangay a nangasaba dyirad nabahod saw a pahad no nadiman pa kaychowa.
20 On, siaānos a nangnanaya si Āpo Dyos so kapagbabāwi da no nawri a tawotawo a ranan kapamarin ni Noyi so biray naw. Ki alit na dyi sa nagbabāwi do dawri, as kan alit na dyi sa nanganohed di Āpo Dyos. As dawa, wawaho sa lang somindep do biray naw, kan sira lang naisalākan do layosaw.
21 Iyaw nyaya layos, ki iladāwan naw kapagbawtisar taya kan iyaw no kaisalakānan ta sichangori, maynamot aba do kapakaro no lapos do inawan ta, an dya pangilasīnan a oyod a nagbabāwi ta do āro saya a nakagatosan ta. Nyaw pakayapwan na a insalākan na yaten maynamot do nakapagōngaraw ni Āpo Dyos si Kristo.
22 Naybidi dana si Āpo Jesos do hanyit. On, sichangori, ki ari dana naydisna do mangketaw do kawanan ni Āpo Dyos, as kan itorayan na sa a tabo no anghilis saw do hanyit kan sira tabo myan saw so toray kan panakabalin a dya maboya.