22
No Pangarig a Maynamot do Kasar
(Lk. 14:15-24)
1 Ki minirwa dana nagpangārig si Jesos dyirad tawotawo saw.
2 Binata na a kāna, “Maiyarig paw pagtorayan ni Āpo Dyos do asaya āri a nangisagāna so kasaran maynamot ta magkasar anak naw a mahakay.
3 Tinoboy na saw tobotoboyen naw a manawag siras rinara na saw do pagkasaran naw, ki nakey saba nangay.
4 Dawa, minirwa nanoboy so kadwan pa saw a tobotoboyen na, kan inbilin na dyira a kāna, ‘Ibahey nyo pa dyirad rinara kwaw a nakasagāna dana tabo. Naparti dana saw napataba ko a bāka ko, kan nahoto dana saw ichan. Dawa, basta mangay dana sa.’
5 “Ki inkaskāso daban rinara naw, basbāli a tinongtong da do sīgodaw a plāno da. Nangay asa do talon na, as no kadwan, ki nangay do pagnigosyowan naw.
6 Ki siraw kadwan saw, ki tiniliw da saw tobotoboyen no āryaw, as nakalidyalidyat da sira, kan nakadiman da sira.
7 “Ki taywaraw nakapakasoli no āryaw, dawa, tinoboy na saw soldādo naw a nangdiman siras nangdimanaw siras tobotoboyen naw, as nakaipasosoh nas idi daw.
8 “Do dawri, binatan āryaw dyirad kadwan pa saw a tobotoboyen na a kāna, ‘Naisagāna danaya tabo para do pagkasaran, ki polos a dyi dana sa maikariw rinara kwaw.
9 Dawa, mangay kamod kalkalsāda, ta rarahen nyo sa tabo maboya nyo a tawo, ta mangay sa machakan do dya pagkasaran.’
10 “Dawa, nangay saw tobotoboyen naw do kalkalsāda, as rinara da sa tabo naboya da tawo, marahet kan maganay so dadakay. Do dawri, nakapno sad pagkasaranaw.
11 “Ki do kasdepaw no āryaw a mangay a manyideb siras nangayaw daw, ki naboya naw asaw a tawo a dya nakalaylay so pachikasar.
12 Ki inyahes no āryaw dya a kāna, ‘Hoy, mo Sit! Maypāngo kasdep mo dya, an dyi ka naylaylay so laylayaw a gagāngay an mangay kad pagkakasaran?’
“Ki naylilyak abaw mahakayaw.
13 “Sinpangan na, binatan āryaw dyirad magsirsīrbi saw daw a kāna, ‘Tiliwen nyo nya mahakay, as karimpong nyo sya, as kan kapaksyat nyo syad mamansokelaw a kasarisaryan a yanan dan tomanyitanyis saw kan mayngaletnget a tawotawo do lidyat da.’ ”
14 Sinpangan na, binata pan Jesos a kāna, “Aro matawagan, ki papere lang pidyen no Dyos a makasdep do pagtorayan na.”
No Kapanahes Maynamot do Kapagbāyad so Bwis
(Mk. 12:13-17; Lk. 20:20-26)
15 Do katayoka no nawri, komnaro saw Parisyo saw, as nakapagtotōlag da an maypāngo kasdok das Jesos maynamot do kapanahahes da.
16 Dawa, tinoboy da saw kadwan saw a nanawhen da kan kadwan saw a nanawhen ni Āri Herodes a mangay a manahahes di Jesos.
“Mo Maistro,” binata da, “chapatak namen a tabo a ichirin mo, ki oyod. Abaw matarek a inanawo mo, an dyi lang a iyaw oyodaw a chakey no Dyos a parinen tawotawo. Chapatak namen pa a mangidomdōma kaba, kan itatārek mo sabaw matohos so saad.
17 Dawa, ibahey mo pa dyamen an āngo myan do aktokto mo. Maikontrawri do linteg iyaw kapagbāyad namen so bwis do impirador do Roma mana engga?”
18 Ki nadlaw ni Jesos marahetaw a plāno da dya, kan binata na dyira a kāna, “Inyo a maysinsīsingpet, āngo ta sōoten nyo yaken?
19 Ipaboya nyo pa dyaken plata nyowaw a pagbāyad nyos bwis nyo.”
Do dawri, tinorohan das plata.
20 Ki inyahes ni Jesos dyira, “Sino akin ladāwan kan akin ngaran syay?”
21 Ki initbay da, “Nas Impirador.”
Do dawri, binata ni Jesos dyira a kāna, “Dawa, an komwan, itoroh nyod Impirador dyira naw, as itoroh nyo do Dyos dyira naw.”
22 Ki do nakadngey daw so nyaya, ki nasdaāwan sa. Sinpangan na, kinarwan das Jesos.
No Kapanahes Maynamot do Kapagōngar
(Mk. 12:18-27; Lk. 20:27-40)
23 Ki do dawri pa a araw, myan saw nangay di Jesos a yapo do gropo dan Sadosyowaw a siraw Jodyo saw a makabata a dya mirwa mabyay nadiman. Inyahes da dya a kon da,
24 “Maistro, innanawowaw ni Moyses a kāna, ‘An madiman iyaw asa mahakay a myan so kabahay, as abo paw pōtot na, machita ahapen a kabahayen kakteh naw bālwaw a ipag na tan potōtan na so pinakaanak no kakteh naw a nadiman.’
25 “An komwan linteg, āngo mabata mo do dyaya pangarigan? Myan saw papito a makakakteh a mahahakay do idi namenaya. Iyaw matonengaw, ki nangabahay, as kan sakbay a myan pōtot na, nadiman. Dawa, kinabahay no adyen naw iyaw bālwaw.
26 Ki komwan naparin dya a nadiman a abos pōtot. Masaw, naparin do chatatdo daw a nandad nakadiman da a tabo a papito a abos pōtot.
27 Do kapanawdyanaw, nadiman mabakesaw.
28 “Dawa, an komwan,” inyahes dan Sadosyowaw di Jesos, “anchan araw a kapagōngar, sinonchi dyirad papito saya makakakteh iyaw akin kabahay so nya mabakes, ta kinabahay daya a tabo?”
29 Ki initbay ni Jesos dyira a kāna, “Samna! Matikaw kamo, ta maawātan nyo abaw naitolasaw do Masantwan a Tolas, as kan maawātan nyo abayaw panakabalin no Dyos!
30 Ta anchan mirwa mabyay tawotawo a nadiman, ki mangabahay pa sabanchi daw, ta akma dana sanchis anghil saw do hanyit.
31 Ki an maynamot do kapirwa mabyay no nadiman, nabāsa nyo abawriw binataw no Dyos dyinyo a kāna,
32 ‘Yaken, ki yaken Dyos daw da Abraham, Isaak, kan Jakob’? No chakey na batahen, ki iyabaw Dyos no nadiman, an dya iyaw Dyos no sibibyay.”
33 Ki do nakadngey daw no tawotawowaw so nawri, nasdaāwan sa do komwanaya a kapangnanawo na.
Iyaw Kasisītaan a Bilin
(Mk. 12:28-34; Lk. 10:25-28)
34 Ki do kadngey daw no Parisyo saw a dyi da natbay no Sadosyowaw si Jesos, ki naychipeh sa a nagtotōlag.
35 Ki do dawri, myan asa abogado a rārayay da, kan pinadas na sōoten si Jesos maynamot do nakapanahes na dya.
36 “Maistro,” binata na di Jesos, “āngo kasisītaan a bilin do linteg taya a Jodyo?”
37 Ki binata ni Jesos dya a kāna, “ ‘Machita chadaw nyo Āpo a Dyos nyo do tābo pōso nyo, do tābo katawo nyo, as kan do tābo aktokto nyo.’
38 Iyaw nawriw manma kan kasisītaan a bilin.
39 Ki no somarono a kasisītaan, ki nyaya: ‘Machita chadaw nyo kapayngay nyo a tawo a akmas kadaw nyo so inawan nyo.’
40 Siraw nya dadwaw nangornos so tabo Linteg ni Moyses kan intolas da saw no tabo a propīta.”
No Kapanahes a Maynamot di Kristo
(Mk. 12:35-37; Lk. 20:41-44)
41 Ki do nakapaychipeh paw daw no Parisyo saw, inyahes ni Jesos dyira a kāna,
42 “Āngo mabata nyo maynamot di Kristo? Āngo a kapotōtan iyaw pakayapwan na?”
Ki binata da dya, “Yapod kapotōtan Āri Dabid.”
43 Ki inyahes dana ni Jesos dyira a kāna, “Na, āngo ta sigon do inpaltiingaw no Ispirito Santo di Dabid, ki tinawagan nas Kristo so Āpo na? Binata na a kāna,
44 “ ‘Binata ni Āpo Dyos di Āpo ko a kāna,
“Maydisna ka do kawanan kwaya
a mandad kaābak ko siras kabōsor mo saya,
kan ipapitapita ko sad kokod mwaya.” ’
45 “An tawagan ni Dabid so ‘Āpo,’ maypāngo nakahtot ni Kristo do kapotōtan Dabid?”
46 Ki aba polos naitbay da, as kan somniknan do dawri, apabaw makaitored a manahes di Jesos.