3
No Kapangdōsa no Dyos kan Kapangnamnāma Dya
1 Yaken tawowaw a taga-tolas a nakapadas so tōok
yapo do babāot no soli no Dyos.
2 Binoyaw kan pinayam na yaken
do kasaryan a dya do kasēdangan.
3 Syirto a pinadna naw kakamay na dyaken.
Piropirwahen na a maychaychasaryan.
4 Rinonrōnot no Dyos asi kan kodit ko,
as kan pinotopotot naw tohatohang ko.
5 Dinibon kan linakob na yaken
do kakpad no kabibyay kan katōok.
6 Pinaomyan na yaken do kasaryan
a akma siras am-āmang danaw a nadiman.
7 Dinibon na yaken tan dyi ako a makalības.
Kinadinaan na yaken so marahmet.
8 Aran malyak kapangdakdaw ko so kasidong,
binengbeng naw tadyinya na tan dyi na madngey dasal ko.
9 Binalatan naw kwanan ko so rarakoh a napōtar a bato.
Dyinīdodyīdo na saw ayayaman ko.
10 No Dyos, ki akmay ōso a mangnanaya mangsaneb dyaken.
On, akmay lion a tomayotayo a makey a mangdiman.
11 Ginoyod na yaken do ayaman ko.
Linisalisay na yaken a ninonolay a makakāsi.
12 Inabhok naranaw bai naw,
kan pinayparin na yaken a pontirya na.
13 Pinana na yaken do dawa no bai na saw
a nachibono do pōso ko.
14 Nayparin ako a chamimyeng dan tabo tawotawo ko.
Ikankanta da yaken a oy-oyawen a maychasaryan.
15 Inabsoy na yaken do kakpad,
kan sinōya na yaken so apdo.
16 Pinanggalemgem na yaken so bato.
Pinadesdes naw rōpa ko a maysasakeb do ahbek.
17 Nasodib dyaken talna.
Nawayakan ko na an āngo kinaragsak.
18 Dawa, bata ko a kon ko, “Arabaw kinadayag ko.
Mabo danaw tabo namnāma ko yapo di ĀPO.”
19 Manakem kwayaw kalidyat kan kapayadiyadis ko.
On, manakem ko kakpadaw kan apdwaw.
20 Pirmi ko sa manakenakem,
kan nāw ko a maōpay.
21 Ki iyaw nyaw komorikor do aktokto ko.
As dawa, myan paw namnāma ko.
22 No kanāw no kadaw ni ĀPO, ki mayhāt aba.
No kāsi na, ki machipanda saba.
23 Kāda mabekas, ki bayo sa.
Ay, āngwa kapodno na!
24 Bata ko do inawan ko, “Si ĀPO, iyaw pinakadyira ko.
Dawa, iyaw nanayahen ko.”
25 Maganay si ĀPO dyirad magtalek dya,
dyirad omchichwasaw dya.
26 Dawa, maganay mangnanaya a sioolimek
so kapangisalākan ni ĀPO.
27 Maganay do tawo iyaw makaibtor so maipasabhay dya
do kadama no kapaychakatobo na.
28 Nolay mo iya a maychatanyi a maydisna a sioolimek,
ta si ĀPO iyaw nangipasabhay sya dya.
29 Nolay mo iya a magdōmog a sipapakombaba do tana.
Arā a myan paw namnāma na.
30 Nolay mo iya a mangisarang so pisnyi na do mangsipataw sya,
kan mapnonchi so kairoromen.
31 Ta si Āpo, ki chaskeh na sabanchiw
tawotawo na a abos pandan.
32 Aran mangyangay so pagmamayowan,
ki mangipaboya anchi so kāsi
sigon do maboslon a kanāw no kadaw na.
33 Ta chaskeskeh naw mapaynyin
mana mapagmamayo siras anak no tawotawo.
34 On, ipsok naw manokap a siraranggas
siras tabo nabahod do tanaya,
35 On, ipsok naw mangitayo do tawo so kalintegan na
do salapen no Katotohosan,
36 On, ipsok naw mangdyīdo so kinalinteg do kāso.
Naon, chawahok na saba ni Āpo.
37 Aryoriw makapagbilin kan makaipatongpal
an dya inkeddeng ni Āpo?
38 Yapo abawri do dangoy no Katotohosanaw
iyaw maganay kan didigra?
39 Āngo ta iyaw tawo a sibibyay maynonohed
an madōsa do gatogatos na?
40 Nolay ta a imangmangen kan sintiren ta saw kaparin ta,
as kan maybidi ta pakono di ĀPO.
41 Nolay ta a patohosen tanoro ta a sipopōso
a maydasal do Dyos a myan do hanyit a kon ta,
42 “Naygatos kami kan nagsōkir dyimo,
as kan pinakawan mwaba yamen.
43 “Pinagtoray mwayaw kasoli mo,
kan linakatan mo yamen a diniman a abos kāsi.
44 Pinanglangeb mwayaw inawan mo so konem
tan abo dasal a romapit dyimo.
45 Pinayparin mwaya yamen
akmay basōra a naipoha dyirad nasnasyon.
46 “Tabo dan kabōsor namen,
makatagada sa a kontra dyamen.
47 Kataranta kan kasday do aridos,
didigra kan karārayaw, ki naparin dyamen.”
48 Akmay moyog a oksoksong hō a yapod mata ko
maynamot do nakarārayaw dan tawotawo ko.
49 Nāw na maychawoyog hō ko.
Magsardeng saba a abo kapakalmonaw ko
50 mandan maylalawong a manyideb
si ĀPO a yapo do hanyit.
51 Pagmamayo ko maboya dan mata ko
iyaw naparin dyirad tabo babbalāsangaya do syodad ko.
52 Siraw kabōsor kwaw, ki inanop da yaken
akmay manomanok a abos paynamotan.
53 Inpoha da yaken do bobon a sibibyay,
as kan tinohong da so rakoh a bato.
54 Tinonep na yaken no ranom,
kan binata ko do aktokto ko a pandan ko na.
55 Tinawagan ko ngaran mo, mo ĀPO
a yapo do kensadaw no bobon.
56 Nadngey mo kapachikakaāsi ko a kon ko,
“Bengbengen mwabaw tadyinya mo
do katanyis ko a mangdaw so sidong mo!”
57 Naypasngen ka do nakatawag ko dyimo,
kan binata mo a kon mo, “Mamo kaba.”
58 O Āpo, imo nangikalintegan dyaken do kāso ko,
ta sinobbot mo byay ko.
59 O ĀPO, naboya mo madi a pinarin da dyaken.
Do kapangokom mo, ikalintegan mo pa yaken.
60 Naboya mo tabo kapamahes da,
tabo pangta da a kontra dyaken.
61 O ĀPO, nadngey mo saw kapangiroromen da,
tabo pangta da kontra dyaken.
62 Siraw arasāas kan dinabadabay dan kabōsor ko,
ki kontra sa dyaken a maychaychasaryan.
63 Chiban mo pa do kapaydisna kan kapaytēnek da.
Ikankanta da yaken a oy-oyawen a maychasaryan.
64 Bahsen mo sa mo ĀPO,
sigon do kaparin dan kakamay da.
65 Patwahen mo pōso da,
kan nolay mo abay mo a maitopak dyira.
66 Lakatan mo sa do kasoli mo.
Opasen mo sa do tanaya mo ĀPO.