6
No Katapaw no Oho no Wasay
1 Binata da no bonggoy daw no propīta di Eliseo a kon da, “Chiban mo pa, iyayaw yananaya pachibayatan namen dyimo, ki taywarayas kadēkey para dyaten.
2 Mangay ta do payahosongan no Oksong a Jordan, ta dawriw panghapan katakatayisa dyaten so toroso, kan mapatnek ta so asa yanan daw para dyaten a paybabayatan ta.”
Binata na a kāna, “Na, mangay kamo ah.”
3 Sinpangan na, binata no asaw dyira a kāna, “Chasoyot namen an machangay ka dyamen a pachirawatan mo.”
Initbay ni Eliseo a kāna, “On, machangay ako.”
4 Dawa, nachangay dyira. As do nakapakarapit daw do masngenaw do Oksong a Jordan, nanongeh sa so kayokayo.
5 As no asaw dyira propīta a madama a manongeh so kayowaw, nakso ohwaw no wasay a nasday do oksongaw. Inngēngey na a kāna, “Ayya, mo āpo ko! Binohodaw a wasay nawri!”
6 Inyahes no tawowaw no Dyos a kāna, “Dino nakasdayan na?” Do nakaipaboyaw sya no propītaw an dino nakasdayan na, namatpat si Eliseo so kayo, kan pinagsid na do nakasdayanaw no ohwaw no wasay, kan tominpaw.
7 Binata na a kāna, “awnen mo na.” Dawa, tinodah no propītaw kan inawon na.
No Kawtap ni Eliseo Siras Nagbolsekaw a Arameo
8 Do naypisa, nakapachigobat no āryaw no Aram do Israel. Do nakatayoka no nakapachioman na dyirad opisyalis naw, binata na a kāna, “Magkampo akonchi do dawri a logar a nabata ta.”
9 Ki inpaw-it ni Eliseo a tawo no Dyos iyaw ballāag di āri no Israel: “Magannad ka do kahabas mo do dawrya logar, ta mosok sa daw Arameo saw.”
10 Dawa, inyangay no āryaw no Israel a inpachideb logaraw a binata no tawowaw no Dyos. Pinaybibidi ni Eliseo a inballāag do āryaw, tan komwan myan annad na do matatarek saya logar.
11 Nyayaw taywara chinariribok no āryaw no Aram. Pinatawag na saw opisyalis naw, kan inyahes na dyira a kāna, “Sino dyinyo manglipot a machirārayay a somidong do āryaw no Israel?”
12 Binata no asaw dyirad opisyalis na a kāna, “Aba dyamen, mo āpo ko a āri. Si Eliseo a propīta do Israel mangibahey do āryaw no Israel a aran siraw chirin a batahen mo do kwarto a pakaychehan mo.”
13 Inbilin no āryaw a kāna, “Mangay kamo kan chichwasen nyo an dino yanan na tan manoboy ako siras mangtiliw sya.” Do dāwri, naybidiw dāmag a: “Myan si Eliseo do Dotan.”
14 Sinpangan na, nanoboy siras nakakabalyo kan loglogan saw a pachigobat, kan rakoh a bōyot do dawri a yanan. Nangay sa do kamahep kan dinibon daw idyaw.
15 Do kamabekasan naw, nasāpa a naybangon pachirawatanaw no tawowaw no Dyos, kan minohbot. Naboya na saw bōyot saw a nakakabalyo kan loglogan saw a pachigobat a nangdibon do idyaw. Somindep kan inyahes na di Eliseo a kāna, “Mo āpo ko, āngo paro parinen ta?”
16 Initbay ni Eliseo a kāna, “Mamo kaba, ta siraw myan saya dyaten, ki ārwaro sa kan siraw myan saya dyira.”
17 Do dāwri, naydasal si Eliseo a kāna, “Mo ĀPO, iwangan mo pa saw mata no pachirawatan kwaya tan maboya na.” Sinpangan na, iniwangan ĀPO mata na saw, kan naboya na saw paytoytokonan saw a nakapno so kabalyo sa kontodo loglogan a pachigobat a somdesdeb a dya marōnot a naypadibon di Eliseo.
18 As do nakawsok daw no bōyot no Arameo a naypasngen di Eliseo, naydasal di ĀPO a kāna, “Pagbolseken mo pa saw nyaya a tawotwo.” Dawa, pinagbolsek sa ni ĀPO akmas indasalaw ni Eliseo.
19 Inbahey ni Eliseo dyira a kāna, “Iyabaw nyayaw rarahan, kan iyabaw nyayaw syodad. Monot kamo dyaken, kan yangay konchi inyo do mahakayaya a chichichwasen nyo.” Do dāwri, inyangay na sa do Samarya.
20 Do nakasdep daranaw do syodadaw, binata ni Eliseo a kāna, “ĀPO, iwangan mo pa saw mata da no nyaya mahahakay tan makaboya sa.” Do dāwri, iniwangan na saw mata da, kan nakaboya sa a myan sa do irahemaw no Samarya.
21 Do nakaboyaw no āryaw no Israel sira, inyahes na di Eliseo a kāna, “Āmang ko, dimanen ko sawri? Dimanen ko sawri?”
22 Initbay na a kāna, “Dimanen mo saba. Dimanen mo sawriw natiliw mo do bōkod mo a ispāda mana bai? Idasaran mo sa so mākan kan ranom da tan koman kan minom sa, as kapayam mo na dyira a maybidi do āmo daw.”
23 Dawa, inpaisagāna no āryaw rakoh a pasken para dyira. Do nakatayoka daw a komninan kan mininom, pinayam na sa, as naybidi sa do āmo daw. Dawa, siraw bōyot naw no Aram, ki insardeng daw nangraot so tana a Israel.
No Kapaychapteng do Nakalakob no Samarya
24 Homnabas chimpo, ki chinpeh ni Ben-hadad a āri no Aram iyaw intīro a bōyot na, kan nagmarcha sa kan linakob daw Samarya.
25 Nyaw naynamotan na a myan rakoh a kapaychapteng do irahemaw no syodad. As maynamot do kahay da a nalakob, iyaw asa kaoho no asa asno, ki nalāko so wawaho a poho a pidāso a pirak. No asa kabāso no tachi no boyit, ki nalāko so dadima a pidāso a pirak.
26 Do nakapaypahabas naw no āryaw no Israel do ayamanaw do ahadaw no syodadaw, myan mabakes a nangngēngey a kāna, “Sidongan mo pa yaken mo āpo ko a āri!”
27 Initbay no āryaw a kāna, “An dyi naymo a sidongan ĀPO, sino ako paro a pakahapan mo so kasidong? Aryoriw kanen ko yapo do pangirkan mana palek a yapo do pamitosan so ōbas?”
28 As kan inyahes na do mabakesaw a kāna, “Āngo pakariribokan mo?”
Initbay no mabakesaw a kāna, “Do asa paw a karaw, no nyaya mabakes dya, ki binata na dyaken a ‘Itoroh mo anak mwaya mahakay tan kanen ta sicharaw, kan anchan delak patādyen taw anak kwaw a mahakay a kanen.’
29 Dawa, linaneg namen anak kwaw a mahakay kan kinan namen. Do somaronwaw a araw, binata ko do mabakesaya a kon ko, ‘Itoroh mo anak mwaya mahakay tan iya danaw kanen ta.’ Ki intayo no mabakesaya.”
30 Do nakadngeyaw no āryaya so chirinaw no mabakesaya, pinirit naw kagay naw. As do nakayan naw a nayam do ayamanaw do ahadaw, naboya dan tawotawo saw a myan a nakalaylay so makersang a pinakatayrahem na do inawan na.
31 Binata no āryaw a kāna, “Dosāen pakono yaken no Dyos so taywara an iyaw oho naya ni Eliseo a pōtot ni Sapat, ki myan pa do pakoh na saya sichangori a araw!”
32 Ki do dāwri, myan a maydisna si Eliseo do bahay na, kan myan sa maychadisdisna do yananaw panglakayen saw. Nanoboy āryaw so nanma dana a mahakay. Ki sakbay a nawara, binata ni Eliseo dyirad panglakayen saw a kāna, “Īto tinoboyaw no mangdimdimanaw a mangay a mamotoh so oho kwaya. Na, anchan makarapit natoboyaw, paneben nyo anebaw, kan pagpeten nyo tan dya makasdep. Madngey nyonchiw kadagpas ni āmo na do dyichodan naw?”
33 Do kadamaw ni Eliseo a machisarsarīta dyirad panglakayen saw, minosok a nangay dyaw no āryaw. Binata no āryaw dya a kāna, “Nyaya riribok, ki yapo di ĀPO. Āngo ta tongtongen ko paw mangnanaya di ĀPO?”