4
No Kasidong ni Eliseo do Mapobri a Bālo
1 Iyaw baketaw no asa dyirad bonggoy dan propīta saw, ki tinanyisan na si Eliseo a kāna, “No pachirawatan mwaw a si lakay ko, ki nadimanaw, kan chapatak mo a myan anyib na di ĀPO. Ki sichangori, iyaw nakaotāngan naw, yangay narana a hapen saw dadwaya anak ko a mahahakay tan adīpen na.”
2 Tinbay ni Eliseo a kāna, “Maypāngo koymo a sidongan? Ibahey mo dyaken an āngo myan a dyira mo do bahay mo.”
Binata na a kāna, “Arabaw aran āngo do bahay no pachirawatan mwaya malaksid do dēkey a garapon a lana no olibo.”
3 Binata ni Eliseo a kāna, “Mangay ka dyirad tabo karoba mo saw, kan mamohod ka so angang da saw a abos mimyan. Mamohod kaba so papere lang ah.
4 Katayokan nawri, somabat ka kan anak mo saw a mahahakay, as kan panben mo aneb naw no pantawaw. Do dāwri, irogi mo a padohen lana mwaw do tabo saw a angang. Apāman a mapno kada asa, patarken mo do asa yanan.”
5 Kinarwan mabakesaw iya, kan somnabat a kinayrayay na saw anak naw a mahahakay, as kan inanban naw anebaw no pantawaw. Inhap naw dēkeyaw a garapon a yanan lana na, kan pinado na dyirad angang saw a inyangay dan anak naw dya.
6 Do nakapno daranaw a tabo no angang saw, binata na do asaw dyirad anak na saw a kāna, “Mangyangay ka pa dyaken so asa.”
Ki binata na a kāna, “Arabaw natokos a angang.” Do dāwri, nagsardeng a minoyog lanaw.
7 Nangay na a inbahey do tawowaw no Dyos, kan binata na dya a kāna, “Yangay mo na ilāko lanaw, kan bayādan mo na saw ōtang mwaw. Imo kan anak mo saya mahahakay, ki maparin nyonchi a chabyay matokosaw a yapo do nalākwan nyo.”
Si Eliseo kan Iyaw Sonammita
8 Do asa karaw, nangay si Eliseo do idi a Sonem a niyanan asaw a mabakes a myan so mapariparin. Inpapīlt na si Eliseo a mangay a koman. Dawa, do kāda homabas daw si Eliseo, magsardeng daw a koman.
9 Binata na di lakay na a kāna, “Chapatak ko na a iyaw nyaya a mahakay a kanāyon a somibah do bahay taya, ki masantwan a tawo no Dyos.
10 Mamarin ta so dēkey a kwarto na do tohos no bahay taya, kan mapangay ta daw so katri, lamisaan, disnan kan soho a para dya. Tan komwan, magdagos daw an kāda mangay dyaten.”
11 Do asaw a karaw a nakangay ni Eliseo, komnayat a nangay do kwarto naw kan naypoypoktad daw.
12 Binata na di Gehasi a pachirawatan na a kāna, “Tawagan mo mabakesaw a Sonammita.” Dawa, tinawagan na, kan naytēnek do salapen naw.
13 Binata ni Eliseo di Gehasi a kāna, “Ibahey mod mabakesaya a kon mo, ‘Taywarayaw nakariribok mos inawan mo do nakapadagos mwaya dyamen. Sichangori, āngo maparin namen para dyimo? Chakey mori a isarita namen imo di āri mana do komander daw no bōyot?’ ”
Initbay na a kāna, “Myan a tabo machita ko do kayan kwaya omyan dyirad kaliposan ko.”
14 Inyahes ni Eliseo di Gehasi a kāna, “Āngo paro maparin ta dya?”
Binata ni Gehasi a kāna, “Abaw anak na mahakay, kan malkem danaw si lakay na.”
15 Binata ni Eliseo di Gehasi a kāna, “Tawagan mo iya.” Dawa, tinawagan na, kan naytēnek mabakesaw do pantawaw.
16 As binata ni Eliseo dya a kāna, “Do akma syay a chimpo do somaronwaya a tawen, kepkepen monchiw anak mo a mahakay.”
Ki initbay na a kāna, “Engga mo āpo ko! Imo a tawo no Dyos, bayatawan mwabaw pachirawatan mo!”
17 Ki nabōgi iyaw mabakesaw, kan do somaronwaw a tawen do dāwri met lang a chimpo, naymanganak so mahakay akmas binataw ni Eliseo dya.
18 Nayparakoh adekeyaw, kan do asa karaw, minohtot a nangay di āmang na do yanan daw no magranyaw.
19 Binata na di āmang na a kāna, “Maynyin oho kwaya! Maynyin oho kwaya!”
Inbahey ni āmang na dyirad pachirawatan naw a kāna, “Katkaten mo as yangay mo di ānang na.”
20 Do nakakatkataw sya no pachirawatan naw a inyangay na di ānang na, sinapnyi ni ānang na a manda do kayegen no araw, sinpangan na nadiman.
21 Inkayat naw anak naw, as nakapapoktad na sya do katri naw no tawowaw no Dyos, as kan pinaneb naw aneb naw no pantawaw kan minohtot.
22 Tinawagan na si lakay na, kan binata na a kāna, “Pachitoboy mo paw asaw dyirad pachirawatan mo a mangay dyaken kan mapanawbi so asa asno, tan malisto ako a mangay do tawowaw no Dyos, as kan maybidi ako met lang.”
23 Inyahes no kabahay naw a kāna, “Āngo ta mangay ka dya sichangori? Samorang abaya mana Araw no Kapaynaynahah.”
“Na bali, ta maganay anchi a tabo,” binata na.
24 Pinasangaan no mabakesaw asnwaw, kan binata na do pachirawatan naw a kāna, “Imo manma, as makawayid kaba malaksid an ibilin ko dyimo.”
25 Dawa, inikwan na a nangay do tawowaw no Dyos do Tokon a Karmel.
Do nakaboyaw sya ni Eliseo a īto do midyo mateng pa, binata na di Gehasi a pachirawatan na a kāna, “Chiban mo pa! Toryayaw Sonammitaw!
26 Mayyayo ka machibayat dya, kan iyahes mo dya kon mo, ‘Maganay kawri? Na, maganayoris lakay mo? Maganayoriw anak mwaw?’ ”
“Tabo, ki maganay,” binata na.
27 Do nakapakarapit no mabakesaw do tawowaw no Dyos do tokonaw, inigpet no mabakesaw kokod saw no tawowaw no Dyos. Naypasngen si Gehasi a mapawadin so mabakesaw, ki binata no tawowaw no Dyos a kāna, “Nolay mo, ta taywaraw kapagmamayo na. Ki inlimed ni ĀPO dyaken, inpakatoneng naba dyaken.”
28 Binata no mabakesaw a kāna, “Nanahes akori so anak a mahakay dyimo mo āpo ko? Inbahey ko abawri dyimo a allilāwen mwaba yaken a pangnamnamāen?”
29 Binata ni Eliseo di Gehasi a kāna, “Ibarikis mo kagay mwaya, ahapen mo sarokod kwaya a ig-igpet, as kapayyayo mo. An makabayat ka so aran sino, kablaāwan mwaba. An myan mangkablāaw dyimo, atbayen mwaba. Palapawen mo sarokod kwaya do rōpa naw no adekeyaw.”
30 Ki binata no ānang naw no adekeyaw a kāna, “Akmas kasigorādo no kasibibyay ni ĀPO, kan akmas kasibibyay mo, karwan ko abaymo.” Dawa, naychakatkat si Eliseo kan minonot do mabakesaw.
31 Nayam dana si Gehasi a nanma, kan pinalapaw naw sarokodaw do rōpa naw no adekeyaw, ki kominnaba. Dawa, naybidi si Gehasi a nachibayat di Eliseo, kan binata na dya a kāna, “Nayokay abaw adekeyaw.”
32 Do nakapakarapit ni Eliseo do bahayaw, myan a maylolonat a nadiman adekeyaw do katri naw.
33 Somindep si Eliseo a iya lang, as pinaneb naw anebaw no pantaw, kan naydasal di ĀPO.
34 Sinpangan na, somnakay do katryaw kan naylolonat a naysasakban naw adekeyaw, dangoy do dangoy, mata do mata, kan kakamay do kakamay. As do nakapaysasakeb na do adekeyaw, komnohat inawan adekeyaw.
35 Do dāwri, naycharang kan minidibidi si Eliseo do irahemaw no kwartwaw. Sinpangan na, somnakay dana do katryaw kan pinirwa naranaw naylolonat a naysasakban adekeyaw. Sinpangan na, naybanan adekeyaw so naypapito kan inmolagat naw mata naw.
36 Tinawagan ni Eliseo si Gehasi, kan binata na a kāna, “Tawagan mo Sonammitaw.” Tinawagan na, as do nakangay naw no mabakesaw, binata ni Eliseo a kāna, “Apen mo naw anak mwaya mahakay.”
37 Somindep mabakesaw a nagrōkob do tana a masngen do kokod na saw ni Eliseo. Sinpangan na, inhap naw anak naw kan minohtot sa.
No Makabinino do Irahem no Kardiro
38 Do naypisa, naybidi si Eliseo do Gilgal, kan myan kapaychapteng do dawri a tana. Do kayan daw no bonggoy daw no propīta a maychadisdisna do salapen na, binata na do pachirawatan naw a kāna, “Pāponen mo rakohaw a kardiro ta manglaneg ka so para dyirad propītaya.”
39 Asa dyirad propītaw, ki minohtot a nangay do hakawan a manghap so bohobohong saw a pagrikādo, kan nakachichwas so bolaw a oloten. Nangpeh so asi na saw a mandan mahap a mapongosan no kagay naw. Do nakapaybidi naw, hinariharip na sa, a pinakbong do linaneg naw do irahemaw no kardiro chapapatak naba a makabinino.
40 Naidatar linanegaw para dyirad mahahakay saw. Ki do nakapangrogi daw so koman sya, nagringgor sa a kon da, “Imo a tawo no Dyos, aryayas kadiman do kardirwaya!” As nakey saba a komninan.
41 Binata ni Eliseo a kāna, “Manghap kamo so arina.” Sinpangan na, pinosek na do kardirwaw, kan binata na a kāna, “Makey dana. Idasar mo dyirad mahahakayaya tan koman sa.” As arabaw nabinino do linanegaw do irahemaw no kardiro.
No Kapakan Siras Asa Gasot a Tawo
42 Do matarek a araw, myan asa mahakay a yapo do Baal-salisa a nangyangay do tawowaw no Dyos so dadwa poho a kamemeh a tināpay no sebāda a naparin do manōmaw a naynoy a dāwa no sebāda. Myan paw nangyangay so kararānyi pa saw a irek. Binata ni Eliseo do pachirawatan naw a kāna, “Itoroh mo dyirad mahahakayaya, ta kanen da.”
43 Ki inyahes no pachirawatan naw a kāna, “Maypāngo ko a paychakarwahen nyaya dyirad asaya gasot a mahahakay?”
Ki initbay ni Eliseo a kāna, “Itoroh mo dyirad mahahakayaya, ta kanen da. Ta nyayaw bata ni ĀPO a kāna, ‘Kanen danchi kan myan panchiw panda da.’ ”
44 Dawa, indasar na do salapen daw. Komninan sa, kan myan paw panda da sigon do chirinaw ni ĀPO.