12
No Kapaysonong ni Joas so Timplo
1 Do chapapito naw a katawen no kapagāri ni Jeho a āri no Israel, si Joas, ki nayparin a āri no Joda, kan nagāri do Jerusalem so apat a poho a katawen. No ngaran ānang na, ki si Sibya kan yapo do Beerseba.
2 Pinarin ni Joas kosto do kapanyideb ni ĀPO do tabo katawen a nakainanawo sya ni Jehoyada a pādi.
3 Aran komwan, siraw altaraw no matatarek saw a logar a pagdaydayāwan, ki napakaro saba. Tinongtong dan tawotawowaw nanoroh so dāton da kan naysosoh sa daw so insinso.
4 Binata ni Joas dyirad papādyaw a kāna, “Akpehen nyo sa tabo kwartaw a naiyangay a mapasanto a dāton do timplo ni ĀPO a magrāman tabo kwartaw a narawat do bwis no kapagsinsos, kwartaw a pinagbāyad dan nagsapataw, kan kwartaw a naiyor-or dan tawotawo a para do timplo.
5 Machita kāda pādi, ki mangrawat so kwarta yapo do tawotawo a pagsīrbyan na, kan maosar a pamaysonong so aran āngo a narārayaw a maboya do timplo.”
6 Ki do chadadwa naw a poho dana kan tatdo a katawen no kapagāri ni Āri Joas, ki ari da pa no papādyaw a dya napaysonong timplowaw.
7 Dawa, pinatawagan Āri Joas si Jehoyada a pādi kan siraw kadwan saw a papādi, kan inyahes na dyira a kāna, “Āngo ta ari nyo payad pinaysonong rārayaw naya no timplo? Mangrogi sichangori, inyo pabaw mangigpet so kwarta a marawat nyo, an dya iparawat nyo na a para do kapaysonong no timplowaya.”
8 Nachion saw papādyaw a dyi dana sa mangpeh so kwarta dyirad tawotawowaw, kan sirabaw mapaysonong so timplowaw.
9 Sinpangan na, nanghap si Jehoyada so lakāsan, kan inabotan naw tohong naw. Pinatalin naw lakāsanaw do altaraw, do mamangketaw do kawananaw do asdepanaw no timplo ni ĀPO. As siraw papādyaw a manggwardya do asdepanaw, ki mapangay sa so tabo kwartaw do irahem no lakasānaw a maiyangay do timplo ni ĀPO.
10 Kāda naboya darana a āro kwarta do lakasānaw, iyaw taga-tolasaw no āryaw kan iyaw matohosaw a pādi, ki nangay sa a namidang so kwartaw a naiyangay do timplo ni ĀPO, kan pinangay da do bayon sa.
11 Do katayoka da mangkīlo so kwartaw, iparawat da do kakamay dan naitongdwaw a manyidechideb so tarabākwaw do timplo. As sira danaw nangtangdan siras naytarabākwaw do timplo ni ĀPO a siraw karpintiro kan mapatnek saw,
12 siraw mayatoy saw kan siraw mangakchikchidaw so bato. Inosar da paw kwartaw a gomātang so toroso kan nakchikchid saw a bato para do kapaysonong so timplowaw ni ĀPO, kan mabayādan saw tabo a kadwan a paggastosan do kapaysonong so timplo.
13 Iyaw kwartaw a naiyangay do timplo, ki naosar aba a pangbayād so kapamarin siras bāso a pirak, panopit saw so pabīlo, sabsabak, trompīta saw mana aran āngo a kadwan a warawara a balitok mana pirak para do timplowaw ni ĀPO.
14 Naosar a itangdan dyirad naytarabākwaw kan paggātang so maosar a mapaysonong so timplo.
15 Siraw manyidechideb a natorohan so kwarta a pagtangdan dyirad naytarabāko, ki machita dabaw kapachikwinta, ta pinarin daw mapodno.
16 Iyaw kwartaw a yapo do dāton a para do kapaysonong a maynamot do gatos kan dāton a pakapakawanan no gatos, ki naiyangay saba do timplo ni ĀPO. Dyira da no papādyaw.
No Pandan no Kapagāri ni Joas
(2 Kron. 24:23-26)
17 Do dāwri a chimpo, si Hasael a āri no Aram, ki somnonget kan ginobat naw syodadaw a Gat kan sinākop na. Sinpangan na, naybidi a nangraot so Jerosalem.
18 Ki si Joas a āri no Joda, inhap na saw tabo a napasanto a warawara a indidikar dan aāmang na saw a sa Jehosapat, Jehoram, kan Ahasyas a ar-āri dan Joda, magrāman dyirad mismo na saw a indidikar. Inpayangay na sa a tabo a pangrigālo di Hasael a āri no Aram a magrāman tabo balitok a myan do pangapyanaw do timplo ni ĀPO kan do palasyowaw. Do dawri insardeng ni Āri Hasael kapagraot na do Jerosalem.
19 Siraw kadwan saw a napariparin do nakapagāri ni Joas kan tabo pinariparin na, ki naitolas sabawri do librowaw no pakasaritāan dan ar-āri do Joda?
20 Siraw opisyal naw, ki nagpangta sa so maikontra dya, kan diniman da do Bet-millo do rarahanaw a mosok do Silla.
21 Siraw opisyalaw a nangdiman sya, ki sa Josabab a pōtot ni Simeat kan Jehosabad a pōtot ni Somer. Nadiman si Joas, kan naitābon a nachirapa dyirad aāmang naw do syodadaw ni Dabid. Si Amasyas a pōtot na, ki nachitādi dya a āri.