7
No Gatos ni Akan
1 Ki naygatos saw Israelita do bilin ni ĀPO a dyi da hapen aran āngo a maikeddeng a marārayaw. Ta si Akan a pōtot ni Karmi a pōtot ni Simri a pōtot ni Sera a yapo do trībo no Joda, ki inhap naw kadwan a warawara. Dawa, taywara a nakasoli si ĀPO dyirad Israelita.
2 Tinoboy ni Joswe no kadwan saw a mahahakay yapo do Jeriko a mangay do Ai a idi do dayāen no Betel a masngen do Bet-aben. Minandaran na sa a may sa mangispya so tana daw. Dawa, nangay sa a nangispya so tana.
3 Do nakapaybidi daw, inpadāmag da di Joswe a kon da, “Machita taba tabo tawotawo a mangay a magraot do Ai. Toboyen mo lang dadwa mana tatdo a rībo a mahahakay. Lidyaten mwbaw tabo tawotawo a somonget a machigobat, ta tatdo sa lang tawotawo daw.”
4 Dawa, tatdo a rībo lang no makey a bidang dyirad nangay a nagraot, ki napilītan sa a nagsanod.
5 Linakatan da sa no taga Ai Israelita a yapo do rowanganaw no idi a manda do Sebarim a yanan panghapan daw so batobato. Diniman dan taga Ai sigōro tatdo a poho kan anem dyira do kawsok daw do tokon. Do dāwri, naychamirpirpir saw Israelitaw do kāmo da, kan arabaw katored da.
6 Sinpangan na, si Joswe kan siraw panglakayen no Israel, ki pinirit daw laylay da a pangipaboya so oltimo a liday da, kan pinayokpokan daw oho da so ahbek, as kan naysasakeb sa do tana do salapen no Lakāsan no Tōlag ni ĀPO. Nāw da nagrōkob a manda do kamahep.
7 As binata ni Joswe a kāna, “O Āpo a DYOS, āngo paro ta inyangay mo yamen a pinamtang do Oksong Jordan an tod mo yamen a iparawat dyirad Amoreo saya?
8 O Āpo, āngo ibahey ko sichangori do nakapagsanod no tawotawo no Israel dyirad kabōsor da?
9 Siraw Kananeo kan siraw tābo a omyan do nya tana, ki madngey danchi a nagsanod kami. An komwan, dibonen danchi yamen kan dimanen da yamen a tabo! Āngo parinen monchi a kapangaywan so kadāyaw mo?”
10 Nachisisirin si ĀPO di Joswe a kāna, “Maybangon ka! Āngo ta maparin mo maysasakeb do tana?
11 Naygatos saw tawotawo no Israel! Rinārayaw daw tōlag ko a inmandar ko a tongpalen da. Inhap daw kadwan saw a maikeddeng a marārayaw. Tinakaw da sa, inbayataw da, kan pinarapa da do bōkod da a warawara.
12 Nyaw paynamotan na a siraw Israelita, ki machigobat pa saba do kabōsor da saw. Nagsanod sa dyirad kabōsor da, ta naybadiw dana a siraw maikeddeng a marārayaw. Myan ako paba dyinyo an dyi nyo a rārayawen siraw naimandaraw a dyi nyo a hapen.
13 On, maybangon ka! Pasantwen mo saw tawotawo saya, kan pagsaganāen mo sa a mangay dyaken. Ibahey mo a magsagāna sa para anchan delak, ta yaken a ĀPO a Dyos no Israel, ki ibahey ko nya: ‘O Israel, myan dyinyo kadwan a warawara a inbilin ko dyinyo a rārayawen nyo. Polos a dyi kamo a makapaytēnek dyirad kabōsor nyo saw an dyi nyo a pakarohen siraw nya saya dyinyo!’
14 “Dawa, ibahey mo dyira a ‘Anchan mabekas, mapaboya kamo a magsarsarono do kāda trībo. As iyaw trībo a tongdohen ni ĀPO, ki machita a magabanti sa a magsarsarono do kāda partīdos. As iyaw partīdos a tongdohen ni ĀPO, ki machita a magabanti sa a magsarsarono do kāda pamilya. As kan iyaw pamilya a tongdohen ni ĀPO, ki magabanti a magsarsarono do kāda tawo.
15 Iyaw tawo a matongdo kan machichwasan a myan so warawara a naikeddeng a marārayaw, ki machita a madiman do apoy kontodo pamilya na kan tabo dyira na. Ta iya, ki rinārayaw naw tōlag ko kan pinarin naw taywara a pakasneknekan no Israel.’ ”
16 Nasāpa do somarono a araw, inpaabanti ni Joswe do salapen ni ĀPO kāda trībo a magsarsarono. As iyaw trībo no Joda, ki natongdo.
17 Siraw partīdos no Joda, ki inpaabanti sa ni Joswe a magsarsarono. As iyaw partīdos ni Sera, ki natongdo. Somarono, inpaabanti naw kāda pamilya do partīdos ni Sera a magsarsarono. As iyaw pamilya ni Sabdi, ki natongdo.
18 Sinpangan na, inpaabanti ni Joswe iyaw kāda tawo no pamilya ni Sabdi a magsarsarono. As si Akan a pōtot ni Karmi a pōtot ni Sabdi a pōtot ni Sera a yapo do trībo no Joda, ki natongdo.
19 Binata ni Joswe dya a kāna, “Anak ko, itoroh mo pagdāyaw di ĀPO a iyaw Dyos no Israel do kaipodno mo so oyod. On, ibahey mo pa dyaken an āngo pinarin mo. Itayo mwaba dyaken ah.”
20 Initbay ni Akan a kāna, “Oyod sawen! Nakagatos ako di ĀPO a Dyos no Israel. Nyaw pinarin ko:
21 Do nakasamsam namenaw so warawara, naboya ko mapintasaw a kagay a yapo do Babilonya, dadwa gasot a plata a pirak, kan asa kamemeh a balitok a nasorok godwa kakilo. Inapālan ko sa, as inhap ko. Naikadi sa do tana do irahem no tolda ko, kan iyaw pirak, ki nakatayrahem.”
22 Dawa, nanoboy si Joswe siras tobotoboyen na saw, kan nakalisto sa nangay do toldaw. Nachichwasan da a oyod a naitayo do tolda naw, kan nakatayrahem iyaw pirakaw.
23 Pinahtot da do toldaw, kan inyangay da saw warawara di Joswe kan sira tabo Israelita. Do dāwri, pinadisna da sa do salapen ni ĀPO.
24 Sinpangan na, si Joswe kan tabo tawotawo, ki inhap da si Akan, iyaw pirakaw, kagayaw, kan balitok kontodo siraw pōtot naw a mahahakay kan mababakes, bāka, asno, kan karniro a dyira na, tolda na kan tābo a dyira na, as kan inyangay da do logaraw a mayngaran so Payahosongan Riribok.
25 Binata ni Joswe a kāna, “Āngo ta inyangay mo dyamen nya riribok? Sichangori, si ĀPO manoroh dyimo so riribok.”
Do dāwri, inob-obor no tābo tawotawo si Akan a manda do nakadiman na. Komwan pinarin da do pamilya na, as sinosohan da sa kan warawara da.
26 Kinatohos da pinōnan so bato sa Akan kan pamilya na kontodo warawara na saw. Ari pa daw a mandas changori. Ta dawa, iyaw nya logar, ki matawagan so Payahosongan no Riribok. Do katayoka no nya, nabāwan dana si ĀPO do taywara a kasoli na.