4
No Bato Saya a Pakanaknakman
1 Do nakapakabtang danaw no intīro a nasyon a Israel do Oksong Jordan, binata ni ĀPO di Joswe a kāna,
2 “Mamidi ka so asa poho kan dadwa a mahahakay, tayisa do kāda trībo.
3 Mandaran mo sa a manghap so asa poho kan dadwa a bato a yapo do hobokaw no Jordan do yananaw a naytēnekan dan papādyaw. Ibahey mo dyira a isabhay da, kan pangayen da do pagkampwan nyowaw sichahep.”
4 Do dāwri, tinawagan sa ni Joswe siraw asa pohwaw kan dadwa a mahahakay a natongdo do kāda trībo no Israel.
5 Inbahey na dyira a kāna, “May kamo do hobokaw no Jordan, as manmanma kamo kan Lakāsanaw no Tōlag ni ĀPO a Dyos nyo. Mapenged kamo a maysabhay so tayisa a bato sigon do kāda trībo no Israel.
6 Siraw nya saya bato, ki pakanaknakman so pinarinaw ni ĀPO. Do masakbayan, anchan iyahes da dyinyo no anak nyo saw an āngo chakey na batahen dyinyo no nya saya bato,
7 ibahey nyonchi a iyaw ranom no Jordan, ki nagsardeng a minoyog do nakaiyabtangaw no Lakāsan no Tōlag ni ĀPO. Siraw nya saya bato, ki nāw da ipanakenakem do tawotawo no Israel iyaw naparin do dya.”
8 Tinongpal dan mahahakay saw mandaraw ni Joswe. Nanghap sa so asa poho kan dadwa bato a yapo do hobokaw no Jordan, kan tayisa do kāda trībo a akmas inbaheyaw ni ĀPO di Joswe. Inyangay da do kampo daw a pinadisna.
9 Napangay pa si Joswe so asa poho kan dadwa a bato do hobokaw no Jordan do yananaw a naytēnekan dan papādi saw a nangisiw so Lakāsanaw no Tōlag ni ĀPO. Siraw nya saya bato, ki ari pa daw a mandas changori.
10 As siraw papādyaw, ki nāw da nakatēnek do hobokaw no Oksong Jordan a manda do nakapatayoka da tabo so inbilinaw ni ĀPO di Joswe a parinen dan tawotawo saw. Iyaw nyaw inmandaraw ni Moyses di Joswe.
As siraw tawotawowaw, ki nakalyalisto sa namtang.
11 Do nakapakabtang daranaw a tabo no tawotawo saw do bīt, tinongtong dan papādyaw inibtang Lakāsanaw no Tōlag ni ĀPO do salapen dan tabo tawotawo.
12 As siraw mahahakayaw a yapo do trībo no Ruben, Gad, kan Mamandāya a Manasses, ki nakaarmas sa kan nanma sa a namtang sakbay no tawotawo saw a akmas inbilinaw ni Moyses dyira.
13 Mapatapata apat a poho a rībo no bidang dan mahahakay a siaarmas a namtang do salapen ni ĀPO a nakasagāna a machigobat. Kominwan sa do tanap a masngen do Jeriko.
14 Do dāwri a araw, pinadayāwan ni ĀPO si Joswe do salapen dan Israelita. As kan manda do tawsan byay na, nāw no tawotawo a pinadayāwan iya a akmas pinarin da do nakapadāyaw daw di Moyses.
15 Sinpangan na, inbahey ni ĀPO di Joswe a kāna,
16 “Mandaran mo saw papādi saya a nakaisiw so Lakāsan no Tōlag a tomaraya a yapo do Jordan.”
17 Dawa, minandaran ni Joswe saw papādyaw.
18 As do nakapakalasag daranaw no papādyaw a nangisiw so Lakāsan no Tōlag do talapaw naw, minirwa dana nayāyo iyaw ranomaw no Jordan a manda do nakalayos naranan ngalab naw a akmas sīgodaw.
19 Do chaasa poho naw a karaw do dāmo a bohan, namtang saw tawotawo do Jordan, kan nagkampo sa do Gilgal do dayāen no Jeriko.
20 As dawriw napatnekan ni Joswe so asaw a poho kan dadwa a bato a inhap da yapo do Jordan.
21 Binata ni Joswe dyirad tawotawowaw no Israel a kāna, “Do masakbayan, anchan iyahes da dyinyo no anak nyo saw an āngo chakey na batahen nya saya bato,
22 ibahey nyo dyira a ‘Siraw Israelita, ki namtang sa do Jordan do mabkoh a tana.’
23 Ta si ĀPO a Dyos nyo, ki yinachan naw ranomaw do Jordan para dyinyo manda do nakapakabtang nyo a akmas nakayachi naw so Mabayaw a Tāw a para dyamen a mandad nakapakabtang namen.
24 Pinarin naw nya tan tābo tawotawo do tanaya, ki matonngan da an māngo kabīleg ni ĀPO kan tan chamo nyo si ĀPO a Dyos nyo a abos pandan.”