8
No Kapangābak ni Gideon Sa Seba kan Salmonna
1 Sinpangan na, inyahes dan tawotawowaw no trībo no Epraim di Gideon, “Āngo ta tinawagan mwaba yamen do nakangay nyowaw a nanggobat siras Midyanitaw? Āngo ta pinarin nyo dyamen komwan?” Taywaraw soli da nachisopyat dya.
2 Ki initbay na dyira a kāna, “Aryoriw maganaganay a pinarin ko a maipariho dyinyo? Maganaganay abawriw nadīdid saw a asin ōbas no trībo no Epraim kan tābo āpit no partīdos ni Abiyeser?
3 Inparawat ngamin dyinyo no Dyos si Oreb kan Seeb a pangpangōlo dan Midyanita a diniman nyo. Aryoriw pinarin ko a makaābak so nawri?” Do nakaibahey naw sya, nabāwan kasoli daw.
4 Si Gideon kan siraw tatdwaw a gasot a mahahakay a myan dya, ki nangay do Oksong Jordan kan namtang sa. Aran taywara a nahopag sa, nāw da linakatan saw kabōsor daw.
5 Do nakapakarapit daw do Sokkot, inyahes ni Gideon dyirad tawotawowaw do dawri a idi a kāna, “Chāsi nyo pa yamen. Torohan nyo pa sas tināpay bōyot kwaya. Taywara dana saya nahopag, as ari namen pa saya lakatan ar-āri daw no Midyanita a sa Seba kan Salmonna.”
6 Ki tominbay opisyalis saw do Sokkot a kon da, “Natiliw mo na sawri sa Seba kan Salmonna? Āngo ta machita itoroh namen tināpay dyirad bōyot mwaya?”
7 Initbay ni Gideon a kāna, “Sigi, an komwan, anchan iparawat ni ĀPO dyaken sa Seba kan Salmonna, maybidi akonchi a mangbāot dyinyo so manonōlok a yapo do let-ang a mamiripirit so asyasi nyo.”
8 Yapo daw, nangay si Gideon do Penwel, kan nangdaw dana minirwa so mākan dyirad tawotawowaw daw. Ki nayengay initbay da a akmas atbay daw no taga Sokkot.
9 Dawa, binata ni Gideon dyirad tawotawowaw do Penwel a kāna, “Anchan maybidi ako a nagballīgi, rakraken konchiw nya pagwanawanan nyo!”
10 Sa Seba kan Salmonna, ki myan sa do Karkor kontodo bōyot da saw. Yapo do tābo bōyot dan taga dāyaw, malābit asa poho kan dadima dana rībo nabidin. Ta asa gasot kan dadwa poho a rībo nagarmas so ispāda, ki nadiman dana sa.
11 Nangay sa Gideon do ayamanaw do payis no let-ang do dayāenaw no Nobah kan Jogbehah, kan rinaot da sa a sinaneb bōyot daw no Midyanita.
12 Siraw dadwaw a āri a sa Seba kan Salmonna, nayyayo sa, ki linakatan da sa da Gideon, kan tiniliw da sa. Maynamot ta komwan, natarantaw tābo bōyot dan Midyanita.
13 Do nakapaybidyaw ni Gideon a pōtot ni Joash a yapo do paggogobatan, nayam do songtan do Heres.
14 Nakatiliw so asa baro a taga Sokkot kan inosisa na. Inpaitolas ni Gideon do barwaw ngarangaran da saw no papitwaw a poho kan papito a opisyalis kan panglakayen do Sokkot.
15 Sinpangan na, nangay si Gideon dyirad mahahakayaw do Sokkot a kāna, “Cha dya sa Seba kan Salmonna a pinachimadēkeyan nyo dyaken a binata nyo a kon nyo, ‘Natiliw mo sawri sa Seba kan Salmonna? Āngo ta machita a itoroh namen tināpay dyirad bōyot mwaya a taywara nahopag?’ ”
16 Do dāwri, inhap ni Gideon panglakayen saw a yapo do Sokkot, kan dinōsa na sa so manonōlokaw a yapo do let-ang.
17 Rinakrak na paw pagwanawananaw do Penwel, kan diniman na saw mahahakayaw do dawri a idi.
18 Sinpangan na, inyahes ni Gideon da Seba kan Salmonna a kāna, “Āngo katatawo dan mahahakayaw a diniman nyo do Tabor?”
Tinbay da a kon da, “Akma saw dyimo. Kāda asaw, ki akmaw anak no āri.”
19 Tominbay si Gideon a kāna, “Sira, ki kakakteh ko, anak sa no mismo a ānang ko. Magsapata ako di ĀPO a sibibyay a an dyi nyo sa diniman, ayket na, dimanen kwaba inyo.”
20 Dawa, binata na di Jeter a matoneng a pōtot na a kāna, “Dimanen mo sa!” Ki ināsot nabaw ispāda naw, ta barīto pa kan taywaraw kāmo na.
21 Binata da Seba kan Salmonna di Gideon a kon da, “Ngay! Imo danaw mismo a mangdiman dyamen, ta malkem lang myan so ayit a komwan.” Dawa, diniman na sa, as inhap naw bisti saw a akmay samorang a bohan a myan do lagaw daw no kamilyo da.
22 Nakatayoka no nawri, binata dan Israelitaw di Gideon a kon da, “Imo danaw mangitoray dyamen. On, imo, siraw pōtot kan siraw apoko mo a mahahakay, ta insalākan mwaya yamen dyirad Midyanita saw.”
23 Ki tinbay sa ni Gideon a kāna, “Itorayan kwabanchi inyo mana aran siraw pōtot ko a mahahakay. Si ĀPO, iyanchiw mangitoray dyinyo.”
24 As binata na pa a kāna, “Palobōsan nyo pa yaken a mangdaw so asa. Manoroh paw kāda asa dyinyo so nasamsam naw a arītos.” (Siraw kapotōtan Ismael, ki magarītos sa so balitok.)
25 Initbay da a kon da, “Chasoyot namen sa a itoroh dyimo.” Dawa, namolay sas asa kagay. As kāda asa mahakay, ki inasday naw arītos saw a sinamsam na.
26 Iyaw karahmet no balitok saw a arītos a inakdaw ni Gideon, ki nagistayan dadwa poho a kakīlo. Do dyaya, nairāman sabaw bisti, alāhas, kan obi a kīta a laylay no ar-āri daw no Midyanita, mana siraw sāryowaw a myan do lagaw dan kamilyo daw.
27 Inosar ni Gideon balitokaw a namarin so laylay a epod, as pinangay na do idi na a Oprah. Siraw tābo Israelita, nangay sa daw a magdaydāyaw so epodaw. Nyaw nayparin a akmay asdok di Gideon kan pamilya na.
28 Siraw Midyanitaw, naābak sa dyirad Israelitaw, as kan nakabangon sa paba a machiggobat. Dawa, yapo dāwri, myan danaw talna do tana daw no Israelita so apat a poho a katawen a manda do nakadiman ni Gideon.
No Kadiman ni Gideon
29 Si Jerobbaal mana Gideon a pōtot ni Joash, somnabat do Oprah, as kan minyan daw.
30 Myan papito a poho a pōtot na mahakay a mismo, ta āro baket na.
31 Myan paw binaket na do Sikem a naymanganak pa so mahakay, kan pinangaranan nas Abimelek.
32 Nadiman si Gideon a pōtot ni Joash do kamalkem na, as naitābon do tanem a aschip ni āmang na a si Joash do Oprah a dyira dan partīdos no Abieser.
33 Do nakadiman danaw ni Gideon, minirwa dana saw Israelitaw a tomnadyichokod do Dyos, kan nagdaydāyaw sa dyirad Baal. Pinatnek daw Baal-berit a dyos da.
34 Inkaskāso da paba si ĀPO a Dyos da a nangisalākan dyira do toray dan tābo saw a kabōsor da a nangdibon dyira.
35 Abaw inpaboya da a mapagtalkan sa dyira do pamilya ni Jerobbaal a si Gideon do tabo a maganay a pinarin na do Israel.