19
Iyaw Lebitaw kan Iyaw Minabakes Naw
1 Do dāwri a chimpo, do kabo paw no āri no Israel, myan asa Lebita a minyan do mateng a logar do ammyānan a partis no katokotokonan no Ephraim. Insabat naw binaket naw a yapo do idi a Betlehem do Joda.
2 Ki do naypisa, nakasoliw binaket naya dya kan komnaro a somnabat do bahay ni āmang na do Betlehem do Joda. Minyan daw so sigōro apat a kabohan.
3 Do dāwri, naktokto no lakay naw no mabakesaya a yangay na ahwahoken a pasabaten. Kinayrayay naw pachirawatan naw kan dadwa a asno. Do nakapakarapit daw daw, pinasdep no binaket naw do bahayaw ni āmang na. As do nakaboya naw sya no katogāngan naw a mahakay, siraragsak a nangkablaāw so manōgang naw.
4 Inpapāti dya no katogānganaw a mahakay a omyan pa dyira. Dawa, minyan so tatdo a karaw a nachakan, nachinom, kan nakaycheh daw.
5 Do chapat naranaw a karaw, minhep sa naybangon, as nagrobwat Lebitaw a mayam. Ki binata no katogāngan naw a mahakay do manōgang naw a kāna, “Koman ka pa manma tan payiten mo inawan mo do rarahan. Anchan tayoka, mayam ka na.”
6 Dawa, naydisna sa dadwaw mahahakayaw a nayhanghang a komninan kan mininom. Katayoka na, binata no āmangaw no mabakesaw a kāna, “Na, misan ka pano kan magragragsak ka pa.”
7 Do nakapaytēnek danaw no mahakayaw a mayam, inoy-oyotan no katogāngan naw a misan pa. Dawa, minisan Lebitaw a minirwa.
8 Do chadadima naranaw a karaw, minhep a naybangon Lebitaw a nakasagāna a komaro. Ki binata no āmangaw no mabakesaw a kāna, “Koman ka pa manma. Nayahen mo naw makoyab a kakaro mo, ah!” Dawa, minirwa sa a dadwa a nachakan.
9 Do nakasiknan daw a komaro no mahakayaw, iyaw binaket naw, kan no pachirawatan naw, binata no katongānan naw a āmang no mabakesaw a kāna, “Chiban nyo pa. Makalo danaya maysarisari. Maganaganay an misan kam pa. Īto dana somdep araw. On, misan kam pa, as magragsak kam pa so asa pa kahep. Omhep kamo nanchi anchan delak a maybangon kan somabat.”
10 Ki nakey pabaw mahakayaw a minisan so asa pa a kahep daw, basbāli a komnaro kontodo binaket naw, pachirawatan naw, kan dadwaw a asno a napasangaan. Nakarapit sa do masngen do Jebos mana Jerosalem.
11 Do nakapakasngen daranaw do Jebos, makoyāb dana. Binata no pachirawatanaw do āmo naw a kāna, “Magsardeng ta pa do idi dayan Jeboseo, as misan ta pa daw.”
12 Ki binata no āmo naw a kāna, “Misan taba do idi dan gan-ganaet a dya tawotawo no Israel. Tomongtong ta na do Gibea.”
13 Innāyon na a kāna, “Ngay, padāsen taw romapit do Gibea mana Rama, as misan ta do asa dyirad dyaya a logar.”
14 Dawa, hinabasan daw idyaw a Jebos, as tinongtong daw nayam. Kasdesdep pa no araw do kasngen daranaw do Gibea a sākop no trībo no Benhamin.
15 Somniwal sa do rarahanaw, as somindep sa do Gibea tan misan sa daw. Nay sa a naydisna do plasaw no idi, ki abaw nakey a napaysan sira.
16 Sinpangan na, do dawri a ahep, myan asa malkem a somnabat a yapo do tarabāko na do hakawan naw. Iyaw nya malkem, ki yapo do katokotokonan no Epraim a magyan do Gibea. (Siraw tawotawowaw daw, ki yapo do trībo no Benhamin.)
17 Do nakatangayaw no malkemaw, naboya naw byahyaw a maydisna do plasaw. Binata na dya a kāna, “Dino ngayan mo? Dino nakayapwan mo?”
18 Tinbay no Lebitaw a kāna, “Nangay kamyaw a yapo do Betlehem do Joda a komwan do mateng a logar do katokotokonan no Epraim a nakayapwan ko. Kayayapo kwaw do byahi do Betlehem do Joda, as somibah akwaw changori do bahay ni Āpo. Abayaw mapaysan dyaken.
19 Yamen a adīpen mo, ki aryaw kanen namen kan garami a para dyirad asno namen saw. Myan paw tināpay kan palek a para dyaken, do minabakes kwaya kan iyaw barwaya a myan dya. Abaw machita namen a aran āngo.”
20 Binata no malkemaw a kāna, “Chasoyot koymo a paysanen. Yaken makatoneng do tabo machita mo. Basta dyi ka makaycheh do dya plasa.”
21 Dawa, inhap na sa do bahay na, as pinakan na saw asno naw. Do nakatayoka daw a naylablab so kokod da, komninan kan mininom sa.
No Nakapakagatos Dan Taga Gibea
22 Do kayan daranaw a maragsak, myan saw marahet a mahahakay a mindibon so bahayaw. Tinogtog daw anebaw, nginēngeyan daw malkemaw a akin bahay a kon da, “Pahtoten mo mahakayaw a insabat mo ta oknoden namen.”
23 Ki minohtot malkemaw a akin bahay, as nakabata na sya dyira a kāna, “Enggam kakakteh! Mamarin kamwabas marahet a kaparin! Maynamot ta bisīta ko nya mahakay, parinen nyo abaw nya makasnesnek a kaparin.
24 Aryaw birhin a balāsang ko a mabakes kan iyaw binaketaya no mahakayaw. An chakey nyo, pahtoten ko sa sichangori. Ramesen nyo kan parinen nyo chakey nyo dyira. Basta dyi nyo a paypariparinan so makasnesnek bisīta kwaya.”
25 Ki inadngey daba iya. Dawa, inhap no Lebitaw binaket naw, as pinahtot na a intoroh dyira. Rinames da iya kan pinarin daw makasnesnek dya a naychararakan a mandad kapaysesēdang, as nakaari da sya.
26 Do kapaysesēdang naranaw, naybidiw mabakesaw do bahayaw no malkemaw a inisanan lakay naw. Nalba a napleng do anmwaw no aneb no bahay, as dinitā na daw a nandad nakadadaw no araw.
27 Do kamabekasanaw, naybangon lakay naw, as iniwangan naw anebaw no bahay kan minohtot a tomongtong do kayam naw. Do dāwri, nadongso naw binaket naw a naypoktad do salapenaw no bahay a nachilapaw saw kakamay naw do dapyanaw.
28 Binata na dya a kāna, “Maybangon ka, ta mayam ta na.” Ki abaw atbay a polos a yapo do mabakesaw. Do dāwri, insakay naw bangkay naw do bokotaw no asno, as tinongtong naw somabat.
29 Do nakapakarapit naw do bahay na, inhap naw bahayang naw, as inaktekteb naw bangkayaw no binaket naw do asa poho kan dadwa a kakteb. Inpaw-it na sa do tabo a tana a sinākop no Israel.
30 Kāda nakaboya sya, binata na a kāna, “Ari pad abwa polos naparin mana naboya a komwan a nakayapo do arawaw a komnaro saw Israelita do Egipto a mandas changori. Mangtokto ta kan mangikeddeng an āngo parinen ta. Āngo paro?”