16
Si Samson do Gasa
1 Asa karaw, nangay si Samson do syodad a Gasa do tana dan Pilisteo. Dawriw nakaboyan na so asaw a mabakes a maglaklāko so asi na. Nangay a nachoknod dya.
2 Naipadāmag dyirad tawotawowaw do Gasa a myan si Samson daw. Dawa, dinibon daw yanan naw, kan tinalan da a naychararakan do rowanganaw no syodad. Nāw da sinīim a naychararakan, kan inpangta da a kon da, “Nayahen ta mandan maysesēdang, as kadiman ta sya.”
3 Ki manda lang do abak no ahep a nachoknod si Samson. Do kaabak no ahep naranaw, naybangon as nakaigpet nas dadwaw a aneb no rowangan no syodad, kan inakso na tabo pati dadwa a posti da, aran balonet naw. Insabhay na sa inikwan do tōtokaw no paytokonan a machinmo do Hebron.
Sa Samson kan Delilah
4 Nakapakahabas no nya, nasirig ni Samson asaw a mabakes a mayngaran so Delilah a omyan do Payahosonganaw no Sorek.
5 Siraw dadimaw a pangōlo dan Pilisteo, nangay sad Delilah kan binata da dya a kon da, “Sikapan mo pa tan matonngan mo pakayapwanayan taywaraya kayit na kan an maypāngo a mapadso namen kayit naw tan mabahod namen, as kan payparinen namen iya a makakāsi dana. An maparin mo, kāda asa dyamen, ki torohan namen imo so asa poho kan asa gasot a pidāso a pirak.”
6 Dawa, binata ni Delilah di Samson a kāna, “Ibahey mo pa dyaken pakayapwanayan taywaraya kayit mo, as kan maypāngo kabahod da dyimo.”
7 Inatbay ni Samson a kāna, “An bahoden da yaken so papito a dyi pa nahayo a itan bai, komapsot ako a akmas gagāngayaw a mahakay.”
8 Do dāwri, inbahey ni Delilah dyirad pangōlo daw no Pilisteo. Dawa, nangyangay sa dya so papito a dyi pa nahayo a itan bai a inbahod na sya.
9 Myan saw mahahakay a nagsisīim a nangnanaya do masngenaw a kwarto. Sinpangan na, nangagay si Delilah a kāna, “Samson! Tori dana saw Pilisteowaw a mangtiliw dyimo!” Ki pinaypisa na sa binitos a akmas kasonongaw a mabitos no hobid a machisalid do apoy. Dawa, ari da pad chapatak pakayapwanaw no kayit na.
10 Maynamot do dyaya, binata ni Delilah di Samson a kāna, “Aysa, linōko mwaya yaken, kan binayatawan mwaya yaken. Ngay, ibahey mo pa dyaken an maypāngo a mabahod ka.”
11 Do dāwri, inbahey na dya a kāna, “An bahoden da yaken so hobid saw a bayo a polos a dya naosar, komapsot ako ah a akmas gagāngayaw a mahakay.”
12 Dawa, nanghap danas Delilah so bayo sa hobid a inbahod na sya. Do dāwri, nangagay a kāna, “Samson! Tori dana saw Pilisteowaw a mangtiliw dyimo!” Myan saw mahahakay a nagsisīim a nangnanaya do masngenaw a kwarto. Ki binitos na saw hobidaw do tachay naw kinakma na say bolabola.
13 Binata ni Delilah di Samson a kāna, “Aysa, mandas changori, nāw mo paya yaken a loklōkwen, as kan bayabayatawan mo paya yaken. Ibahey mo pa dyaken an maypāngo ka mabahod a dya makabitos.”
Binata ni Samson dya a kāna, “An lagāen mo saw papitwaya a nasahapidang a boboh ko do tela a panglagāan, as kairot mo sya so panopit naw, komapsot ako a akmas gagāngayaw a mahakay.”
14 Dawa, do kayan naw a nakaycheh, inlāga ni Delilah saw papitwaw a nasahapidang a boboh na do tela no panglagāan, as kan inirotan naw panopit naw.
Pinirwa narana inyagay a kāna, “Samson! Tori dana saw Pilisteowaw a mangtiliw dyimo!” Ki nayokay si Samson, kan binagot naw pinangsopit naw kan panglagāanaw, pati iyaw tela naw.
15 Do dāwri, binata ni Delilah dya a kāna, “Maypāngo a ibahey mo a chadaw mo yaken an bayatawan mo yaken? Naypitdo danaya a linōko mo yaken, kan dyi mo pa ibahey dyaken pakayapwan taywaraya kayit mo.”
16 Nāw na inrengrengreng ni Delilah do kararaw a mandad nakapalālo narana maōma ni Samson.
17 Dawa, inbahey dana dya ni Samson a tabo a kāna, “Iyaw boboh kwaya, polos a dyi ako pad napagogod, ta napatarek ako do Dyos a mayparin a Nasireo a yapo do nakaiyanak ko. An mapagogod ako, mabo kayit ko, as kan komapsot ako a akmas gagāngay a mahakay.”
18 Do nakadlawaw sya ni Delilah a nagpodno si Samson, nangipaw-it so minsāhi na dyirad pangpangōlo daw no Pilisteo. Binata na dyira a kāna, “Maybidi kamo pa so maypisa, ta inbahey naranaw a tabo dyaken.” Do dāwri, naybidi saw pangpangōlwaw kan napanaybi sa so pirak.
19 Pinakaycheh ni Delilah si Samson do pā na. As nakapanawag nas mahakay a manggogod so papitwaw a nasahapidang a boboh ni Samson. Nangrogi a komnapsot si Samson, as kan nabo danaw kayit naw.
20 Do dāwri, inyagay na a kāna, “Samson! Tori dana saw Pilisteowaw a mangtiliw dyimo!” Nayokay si Samson, kan iniktokto na a, “Mawbayan akonchi a mawayawayaan a akmas sīgodaw.” Ki chinapatak naba a komnaro dana dya si ĀPO.
21 Tiniliw dan Pilisteowaw si Samson, as hinawhaw daw dadwaw a mata na. Inyangay da iya do Gasa kan kinadinaan da so bronsi, as pinaytarabāko da a manggiling do irahem no pamahodan.
22 Ki iyaw boboh naw romogi dana romaboy.
No Nakadiman ni Samson
23 Siraw pangpangōlo daw no Pilisteo, naychichipeh sa mangidāton so machitatārek do dyos daw a si Dagon, as kan magragsak sa, ta binata da a kon da, “Iyaw dyos tayaw, nangiparawat dyaten si Samson a kabōsor ta!”
24 Do nakaboya daw no tawotawo si Samson, dināyaw daw dyos daw a kon da, “Iyaw dyos taya, inparawat na dyaten kabōsor taw a iyaw nangrārayawaw so tana ta kan diniman naw āro dyaten.”
25 Do nakadinyat daranaw, binata da a kon da, “Pahtoten nyos Samson tan yāyam ta.” Dawa, inihtot da si Samson a yapo do pamahodan kan nagpabōya dyira. Do nakapatēnek daw sya do baet daw no rarakoh saw a parey,
26 binata ni Samson do barītowaw a mangkāday dya a kāna, “Pangayen mo yaken do pakasalidan kwaw so parey saw no timplowaya tan machinareng ako dyira.”
27 Do irahem no nya timplo, napno so mahahakay kan mababakes. Myan pa daw siraw tabo pangpangōlo dan Pilisteo. As do atepaw, myan malābit tatdo a rībo a mahahakay kan mababakes a mangbōya di Samson a magpabōya dyira.
28 Do dāwri, naydasal si Samson di ĀPO, “O Āpo a DYOS, naknakmen mo pa yaken. Payiten mo pa yaken so maypisa dana lang tan golpyen ko sa bahsen Pilisteo saya a maynamot do pinarin daya do dadwaya mata ko.”
29 Nanapet si Samson dyirad dadwaw a parey a nanghobok do timplo, as nakapīlit a nangpinyay sira. No kawananaw a kakamay na, myan do asaw a parey, as no kaholyaw a kakamay na do bītaw a parey.
30 Do dāwri, binata ni Samson a kāna, “Palobōsan mo pa yaken a machidimadiman dyirad Pilisteowaya!” Pinadoydoy na saw pareyaw do tābo a kayit na, kan nalbaw timplowaw dyirad pangpangōlwaw kan tabo tawotawo do irahemaw. Dawa, siraw diniman naw do nakadimanaw, ki arwaro pa kan do kasibibyay naw.
31 Sinpangan na, siraw kakakteh naw kan siraw tabo a kakabagyan ni āmang na, minosok sa a nanghap so bangkay naw. Insabat da, as intābon da iya do baet daw da Sora kan Estaol do tanem a aschip ni āmang na a si Manoah. Indaōlwan san Samson Israelita so dadwa poho a katawen.