4
No Panakabalin a Intoroh ni Āpo Dyos di Moyses
1 Tominbay si Moyses di Āpo Dyos a kāna, “Āngwan dyi da yaken a anohdan mana adngeyen, as kan batahen danchi a kon da, ‘Taywaran nagparang dyimo si ĀPO?’ ”
2 Ki inahes dya ni ĀPO a kāna, “Āngo myanaya do tanoro mo?”
“Sarokod,” inatbay na.
3 Binata ni ĀPO a kāna, “Ngay, pagtosen mo pa do tanaya.” Dawa, pinagtos ni Moyses do tanaw, ki nānyeng a nayparin a kobra, as kan dinichanan ni Moyses.
4 Somarono, binata ni ĀPO di Moyses a kāna, “Asngenan mo ah, as kakamet mos ipos naya.” Dawa, inasngenan ni Moyses kan inipos na. Do nakaigpet naw sya, nayparin dana sarokod.
5 Binata pa ni ĀPO a kāna, “Iyaw nyaw parinen mo tan anohdan da a si ĀPO a Dyos dan kapoonan mo saw a iyaw Dyos ni Abraham, iyaw Dyos ni Isaak, kan iyaw Dyos ni Jakob, nagparang dyimo.”
6 Binata dana ni ĀPO dya a kāna, “Posken mo kakamay mwaya do irahem nayan laylay mo do barōkong mo.” Dawa, pinosek ni Moyses kakamay naw do irahemaw no laylay na do barōkong naw. As do nakapahtot naw sya, ki nagliproso kakamay naw kan nanyidak a akmay yilo.
7 Inbahey na pa di Moyses a kāna, “Changori, pabidyen mo a posken kakamay mwaya.” Dawa, pinirwa narana pinosek kakamay naw. As do nakapahtot naw sya, ki maganay dana kan naybidi do sīgod naw.
8 Binata dana ni ĀPO a kāna, “An dyi daymo a anohdan mana ikaskāso do dāmwaya a pangilasīnan, maparin a anohdan daw somaronwaw.
9 Ki an dyi da anohdan dadwa saya pangilasīnan mana dyi daymo a ikaskāso, manghap kas ranom do oksong a Nile, as kapado mo sya do mabkohaw a tana. Iyanchiw ranomaw a inhap mo a yapo do oksongaw, ki mayparin anchi a raya do tanaw.”
10 Ki binata ni Moyses di ĀPO a kāna, “Ayyam ĀPO, masiglat akwabaya maychirin. On, sīgod akwaw a masalanga a mandas changori a nakapaychirin mo dyaken a pachirawatan mo. Akmaw ngamin mabahod rida kwaya kan madomi ako a maychirin.”
11 Binata ni ĀPO dya a kāna, “Namna, sino manoroh so dangoy no tawo? Sino mapayparin sya a bitor mana omel? Sino manoroh so kapakaboya na mana kabolsek na? Yaken abawri a ĀPO?
12 Ngay, mangay ka na! Sidongan konchimo a maychirin, kan nanawhen konchimo an āngo ibahey mo.”
13 Ki binata ni Moyses a kāna, “O ĀPO, manoboy ka pas matarek a dya yaken.”
14 Do dāwri, taywara a nakasoli si ĀPO di Moyses, kan binata na a kāna, “Na, abawri si Aaron a ākang mo a asa Lebita? Chapatak ko na a maganay a maychirin. Ari dana mangay a machibayat dyimo, as kan chasoyot nanchimo a maboya.
15 Machisarīta kanchi dya, kan ibahey mo an āngo ichirin na. Sidongan konchinyo a dadwa a maychirin, as kan nanawhen konchinyo so parinen nyo.
16 Iyanchiw maychirin dyirad tawotawowaw a para dyimo. On, iyanchiw pinakadangoy mo. As imo, ki akma kanchiw pinakadyos na kan ibahey naw ichirin mo.
17 Ki hapen mo nyaya sarokod do tanoro mo a pamarin monchis pangilasīnan.”
No Kapaybidi ni Moyses do Egipto
18 Sinpangan na, naybidi si Moyses di Jetro a katogāngan na, as nakakdaw na sya dya a kāna, “Mo āmang, palobōsan mo pa yaken a maybidi dyirad kabagyan ko saw do Egipto, ta yangay ko pa chiban an arā pa sa sibibyay.”
Binata ni Jetro a kāna, “Na, mayam kam barok ah, kan myan pakono dyimo kaydamnayan no kapangtokto.”
19 Do kayan paw ni Moyses do Midyan, binata dya ni ĀPO a kāna, “Maybidi ka do Egipto, ta nadiman dana sa tabo tawotawo saw a makey a mangdiman dyimo.”
20 Dawa, inyonot ni Moyses si baket na kan siraw pōtot naw a mahahakay, as nakaisakay na sira do asno, kan kominwan dana sa do Egipto. Inhap ni Moyses sarokodaw ni Āpo Dyos do tanoro na.
21 Binata dana ni ĀPO di Moyses a kāna, “Anchan makarapit ka do Egipto, machita mo a parinen do salapen ni Paraon tabo makaskasdāaw saya a intoroh ko dyimo a panakabalin a parinen mo. Ki patwahen konchiw pōso ni Paraon tan dyi na palobōsan tawotawo saw a komaro.
22 Ibahey monchi di Paraon a kon mo, ‘Nyaw bata ni ĀPO a kāna: Siraw tawotawo no Israel, ki akmay matoneng a anak ko,
23 kan inbahey ko na dyimo a “Palobōsan mo anak kwaya tan maidāyaw na yaken.” Ki pinalobōsan mwaba. As dawa, dimanen konchiw matonengaw a mahakay a anak mo.’ ”
24 Do kayam da Moyses do Egipto, do pagdagdagosanaw a inisanan da, binayat ni ĀPO si Moyses daw kan chakey na dimanen.
25 Ki si Sippora, nanghap so matarem a bato, as nakakōgit nas anak naw a mahakay. Nakaisalid na so gineppas naw a kodit do kokodaw ni Moyses, as nakabata sya ni Sippora a kāna, “Oyod a imo lakay ko a nahap ko do raya.”
26 (Do nakabata ni Sippora a “lakay a nahap ko do raya,” kapagkōgit chakey na ibahey.) Dawa, pinalobōsan ni ĀPO si Moyses.
27 Binata ni ĀPO di Aaron a kāna, “Mangay ka a machibayat di Moyses do let-ang.” Dawa, nangay si Aaron kan binayat na si Moyses do tokonaw ni ĀPO kan dinadek na.
28 Do dāwri, inbahey ni Moyses di Aaron tabo inpaibaheyaw ni ĀPO dya kan tabo pangilasīnan saw a inbilin na a ipaparin dya.
29 Do nakapakarapit da Moyses kan Aaron do Egipto, inakpeh da saw panglakayen dan Israelita.
30 Inpadāmag dyira ni Aaron tabo binata saw ni ĀPO di Moyses. Pinarin na sa paw pangilasīnan do salapen daw no tawotawo.
31 Do dyaya naparin, nanganohed saw tawotawowaw. As kan do nakadngey daw sya a nadidiw kan naboya ni ĀPO kalidyatan daw, nagdomog sa a nagdaydāyaw dya.