38
No Altar a Paysosohan so Dāton
(Eks. 27:1-8)
1 Namarin sa pa sa Besalel so altar a yapo do kayo a akasya. Kwinadrado da so papito kan godwa a kadapan so kanaro kan kawbong. Apat kan godwa a kadapan, iyaw kakarang na.
2 Namarin sa pa so sinan olong a malogag do apat saw a sōli na tan tabo, ki mayparin a asa kapidāso, as nakalopkopan so tombāga.
3 Pinarin da a tabo longlongan na do tombāga a akmas timba saw a panahodan so ahbek, kan siraw pāla na, siraw palanggana a para panakoy, siraw panodok so karni, kan siraw pangayan so inmaya.
4 Namarin sa pa so tombāga a rarātag kan pinadātok na do ahbwaw no baha no altar tan rapiten naw godwaw no katohos no altar.
5 Namarin sa pa so apat a tombāga a sinan singsing a pamaosōkan so iisiw saw do apataw a sōli no raratagaw a tombāga.
6 Namarin sa pa siras iisiw a yapo do kayo a akasya, as kinalopkopan da so tombāga,
7 as pinaōsok da do sinan singsing saw do maybītaw no altar a pangisiwan. Kinahon daw altaraw so tappi.
No Tombāga a Paylablaban
(Eks. 30:18)
8 Namarin sa pa so tombāga a paylablaban kan tombāga a dadātok na. No inosar da, ki siraw ispiho daw no mababakes saw a magsirsīrbi do asdepanaw do Toldaw a Pachibayabayatan.
No Atat no Tabirnakolo
(Eks. 27:9-19)
9 Sinpangan na, namarin sa pa sa Besalel so atat no tabirnakolwaw. Do mangketaw do abagātan, nanglōdyit sa siras kortinaw a naparin do mapīno a tela a dadima poho a kayarda so kananaro.
10 Myan dadwa poho a tombāga a parey na kan dadwa poho a tombāga a pangsapatos siras pareyaw, as kan myan saw sadyit kan kabli a pirak a myan do pareyaw.
11 Komwan pinarin da do mangketaw do ammyānan a atat na.
12 Do mangketaw do lāod no atat naw, siraw kortinaw, ki dadwa poho kan dadima kayarda so kananaro, kan asa poho so parey kan asa poho so pangsapatos, as kan myan saw sasadyit da kan kabli da a naparin do pirak.
13 Do mangketaw do dāya a somalap do dadan a asdepan, iyaw atat naw, ki dadwa poho kan dadima pa a kayarda so kanaro.
14-15 Do maybītaw do asdepanaw, papito kan godwa kayarda iyaw kortinaw, kan tatdo so parey, as kan tatdo so pangsapatos.
16 Tabo kortina saw do omdibonaw no atat, ki naparin do mapīno a tela.
17 Siraw pangsapatos so parey saw, ki naparin sa do tombāga. Siraw sasadyit saw kan kabli saw, ki naparin do pirak. As no tōtok daw no parey, ki nakalopkopan sa so pirak. Tabo dan parey saw do omdibon naw no atat, ki nagkakāmang sa do kablyaw a pirak.
18 Iyaw kortinaw do asdepanaw do atat, ki naparin do mabondal a bolabola a matatarek so kīta a asol, obi kan mabaya, kan mapino a tela kan nabordaan do rinayit no rayem. Asa poho a kayarda so kanaro kan dadwa kan godwa kayarda so kakarang a akmas kortinaw a naypadibon.
19 Nailōdyit sa do apataw a parey a nachidātok do apataw a pangsapatos a tombāga. Siraw sasadyit da saw kan kabli saw, ki naparin sa do pirak. As no tōtok daw no parey, ki nakalopkopan sa so pirak.
20 Tabo pāsok saw no tabirnakolo kan do maypadibonaw no atataw, ki naparin do tombāga.
No Rimīnta Sa a Naosar
21 Iyaw nyaw listaan no rimīnta saw a naosar do tabirnakolo a nakakapyan no matatāpi saw a bato a nakaitolasan asa pohwaw a bilbilin. Iyaw listaanaya, ki inbilin ni Moyses kan pinarin da no Lebita saw a naytarabāko do kapangipangōlo ni Itamar a pōtot ni Aaron a pādi.
22 Si Besalel a pōtot ni Ori a apoko ni Hor a yapo do trībo no Joda iyaw namarin so tabo inbilinaw ni ĀPO di Moyses
23 No kasidong na, ki si Oholiab a pōtot ni Ahisamak do trībo no Dan. Iya, ki maganay a magkitikit, maganay a mangarti, kan magabel so mabondal a bolabola a matatarek so kīta a asol, obi kan mabaya, kan mapino a tela.
24 No tabo a naosar a balitok a naidāton para do nakapamatnekaw so tabirnakolo, ki asa rībo a kakīlo sigon do naikeddeng do pagtimbanganaw a naosar do masantwanaw a yanan.
25 Siraw pirakaw a yapo dyirad tawotawo saw a nairāman do sinsos, ki 3,430 a kakīlo rahmet da sigon do naikeddeng do pagtimbanganaw a naosar do masantwan a yanan.
26 Nyaw paytābwan intoroh dan nasinsos saw. Intoroh no kāda asa iyaw naibaheyaw a kāro no itoroh na sigon do naikeddeng do pagtimbanganaw a naosar do masantwanaw a yanan. Siraw nailistaw a mahahakay, ki 603,550. Magtawen sa so dadwa poho mana nasorsorok.
27 Naosar iyaw 3,400 a kakīlo a pirak do nakapamarinaw so asa gasot a pangsapatos so parey saw no tabirnakolo kan pangsapatos saw so kortina. Kāda pangsapatos, ki tatdo a poho kan apat a kakilo.
28 Iyaw natokosaw a tatdo a poho a kakīlo a pirak, ki naosar ni Besalel do sasadyit saw a para dyirad parey, naikalopkop sa do tōtok da saw, kan pinarin na saw a kabli.
29 Siraw tombāga saw a naidāton di ĀPO, ki 2,425 a kakilo.
30 Inosar naw nya a pinarin sa a pangsapatos do asdepanaw do Toldaw a Pachibayabayatan. Naosar pa sa do tombāga a altar, iyaw tombāga a lebleb na kan tabo rimīnta naw.
31 Nairāman pangsapatos saw a maypadibon do atataw kan siraw pangsapatos saw do asdepan naw, kan tabo saw pāsok saw no tolda kan pāsok saw a maypadibon do atataw.